ភ្នំពេញ៖ ក្រុមផលិតករមកពីបណ្តាប្រទេសនៅតំបន់អាស៊ីអាគ្នេយ៍ចំនួន ៥ រូប ដែលមកពី ៥ ប្រទេសផ្សេងគ្នា បានជួបជុំគ្នានៅសាលមហោស្រពភាពយន្ត Major Platinum Cineplex នៅក្នុងទីក្រុងវៀងចន្ទន៍ ប្រទេស ឡាវ ដើម្បីធ្វើបទបង្ហាញពីគម្រោងនៃការត្រៀមផលិតខ្សែភាពយន្តស្តីពីក្តីបារម្ភនៃតំបន់ទន្លេមេគង្គ នាពេលអនាគត ឬគម្រោងដែលមានឈ្មោះថា «The Mekong River in the year 2030» កាលពីថ្ងៃទី ១១ ខែ ធ្នូ ឆ្នាំ ២០១៩ កន្លងមក ដែលមានការជួយឧបត្ថម្ភដោយមូលនិធិអាស៊ី (The Asia Foundation)។
ក្រុមផលិតករ ៥ រូបនោះ រួមមានផលិតករខ្មែរ-អាមេរិក លោកស្រី សូថូ គោលិកា (Kulikar Sotho) ផលិតករជាតិឡាវ លោក អានិស្ស័យ កែវឡា (Anysay Keola) ផលិតករជាតិ មីយ៉ាន់ម៉ា លោក សៃ ណាយខាំ ( Sai Naw Kham) ផលិតករថៃលោកស្រី អាណូចា ស៊ូវិចាខនពុង ( Anocha Suwichakornpong) និងផលិតករវៀតណាម លោកស្រី ផាំ ង៉ុកឡាន (Pham Ngoc Lan)។
តាមសេចក្តីប្រកាសព័ត៌មាន ដែលក្រុមអ្នករៀបចំមហោស្រពភាពយន្តលួងប្រាបាង ប្រទេស ឡាវ Luang Prabang Film Festival (LPFF) បានឲ្យភ្នំពេញប៉ុស្តិ៍ដឹង នៅតាមបណ្តាញទំនាក់ទំនងសារអេឡិចត្រូនិកថា៖ «គម្រោងមានឈ្មោះថា The Mekong River in the year 2030 មានគោលដៅចង់ផ្សព្វផ្សាយពីការយល់ដឹងផលប៉ះពាល់នៃបរិស្ថាននៅតំបន់ទន្លេមេគង្គ ដែលកំពុងតែរងសម្ពាធដ៏គំហុកនៃការទាញយកនូវប្រយោជន៍នៃធនធានធម្មជាតិជាច្រើនពីទន្លេ។
តួយ៉ាងដូចជាគម្រោងនៃការសាងសង់ទំនប់វារីអគ្គិសនី ការនេសាទត្រីដែលហួសប្រមាណ បម្រែបម្រួលនៃអាកាសធាតុ ការអភិវឌ្ឍគ្មាននិរន្តរភាព និងការបំផ្លាញដោយវិស័យកសិកម្មផងដែរ។ ដូច្នេះក្រោមមូលនិធិអង្គការ The Asia Foundation អង្គការ Oxfam មូលនិធិអង្គការ Heinrich Boll Foundation និងក្រុមបេសកកម្មទន្លេមេគង្គ Mekong River Commission បានជំរុញឲ្យផលិតករទាំង ៥ ប្រទេស ដែលជាប់ទន្លេមេគង្គ ចូលរួមផលិតកុនដែលស្តីពីការផ្សព្វផ្សាយពីផលប៉ះពាល់នៅតំបន់ទន្លេមេគង្គនេះ»។
សម្រាប់គម្រោងផលិតកុនរបស់ផលិតទាំង ៥ រូបខាងលើនោះ បានបង្ហាញចេញជាចំណងជើង និងសេចក្តីសង្ខេបនៃសាច់រឿងហើយមានរឿង «Soul River, Kulikar Sotho (Cambodia) រឿង The Che Brother, Anysay Keola (Laos) រឿង The Forgotten Voices of the Mekong, Sai Naw Kham (Myanmar) រឿង The Line, Anocha Suwichakornpong (Thailand) និងរឿង The Unseen River, Pham Ngoc Lan (Vietnam)»៕