ភ្នំពេញ៖ ខ្សែភាពយន្តខ្នាតធំ ដែលមានតួសម្តែងចម្រុះជាតិសាសន៍ ដោយមានតួឯកស្រីជាតារាសម្តែងខ្មែរមួយរូប គឺស្រីស្រស់ ផាន់ ផាត់ណា នោះ នឹងចាក់បញ្ចាំងតាមរោងកុននៅចុងសប្តាហ៍នេះហើយ ក្រោយពីទទួលបានពាន ៣ ពីកម្មវិធីមហោស្រពភាពយន្តអន្តរជាតិ San Francisco International New Concept Film Festival លើកទី ៦ នៅចិនកាលពីពេលថ្មីៗនេះ។
កុនបែបមនោសញ្ចេតនា និយាយពីទំនាក់ទំនងស្នេហ៍ឆ្លងប្រទេស មានខ្លឹមសារចង់បង្ហាញពីចំណងសេ្នហាមនុស្ស ២ ជំនាន់ របស់កម្ពុជា និងចិន ដែលជាស្នេហាដ៏ស្មោះស្ម័គ្រឆ្លងដែនដីដ៏អស្ចារ្យបានដំណើរការថតតាំងពីថ្ងៃទី ១ ខែ កញ្ញា ឆ្នាំ ២០១៨ ហើយនឹងចាក់បញ្ចាំងពេលឆាប់ៗនេះ។
តារាសម្តែងស្រី និងម៉ូដែល មានរាងស្ល៊ីម ស្រស់សោភា កញ្ញា ផាន់ ផាត់ណា ធ្លាប់ជាស្រីស្អាតតំណាងឲ្យកម្ពុជានៃកម្មវិធី Asean Transportation & Logistics Award 2015 បង្ហើបថា៖ «បើតាមខ្ញុំបានដឹងខ្លះៗនោះ នឹងមានធ្វើសន្និសីទសារព័ត៌មានធំមួយនៅទីក្រងប៉េកាំង នៅថ្ងៃទី ៧ ខែ វិច្ឆិកា ឆ្នាំ ២០១៩ នេះហើយ ដោយនាងខ្ញុំក៏ត្រូវចូលរួមដែរ។ ក្រោយពីធ្វើសន្និសីទសារព័ត៌មាន នេះទៅ គឺថាគេនឹងចាក់បញ្ចាំងនៅតាមរោងកុនទាំងនៅចិន និងកម្ពុជាយើងផងដែរ ដោយសារគេបានដាក់បញ្ចូលនូវសំឡេងជាភាសាខ្មែរចប់សព្វគ្រប់អស់ហើយ»។
កុនខ្នាតធំរឿង «ពន្លកស្នេហ៍រីកលើដីកម្ពុជា» នេះបានថតនៅឯតំបន់នានាក្នុងប្រទេស កម្ពុជា ដូចជាទីក្រុងភ្នំពេញ ប្រាសាទអង្គរវត្ត កោះរ៉ុង ភ្នំបូកគោ ជាដើម និងនៅចិនរួមមានដូចជាតំបន់ Qiao Xiang នៃក្រុង Teng Chong និងទីក្រុង គុនមិង ខេត្តយូណាន ដោយមានតួឯកស្រីខ្មែរ គឺកញ្ញា ផាន់ ផាត់ណា ជាតារាសម្តែងខ្មែរ លោក Sun Xu Bo តួឯកប្រុសចិន ព្រមទាំងតារាសម្តែងល្បីផ្សេងទៀត ជាជនជាតិបារាំង និងឆែកផងដែរ ដែលបានដាក់ទុនផលិតនៅក្នងតម្លៃចំនួន ២ លានដុល្លារ។
កញ្ញាស្រីស្អាត ផាន់ ផាត់ណា មានក្តីរំពឹងថា៖ «ដោយសាររឿងនេះ បានជ្រើសយកតំបន់សំខាន់ៗនៅស្រុកខ្មែរ នាពេលថតសម្តែងនោះ នាងខ្ញុំសង្ឃឹមថា តាមរយៈភាពយន្ត គឺពិតជាអាចជួយនាំឲ្យភ្ញៀវអន្តរជាតិនានា កាន់តែបានស្គាល់ប្រទេសខ្មែរកាន់តែច្រើន»។
បើតាមការប្រកាសនៅគេហទំព័រផ្លូវការក្រុមហ៊ុនព្រីនស៍នោះ បានឲ្យដឹងថា ខ្សែភាពយន្ត «ពន្លកស្នេហ៍រីកលើដីកម្ពុជា» គឺទទួលបានពានរង្វាន់ធំចំនួន ៣ ក្នុងមហោស្រពភាពយន្តនៅចិន រួមមានពានរង្វាន់សាច់រឿងអន្ដរជាតិល្អបំផុត ពានតួឯកប្រុសឆ្នើម និងពានរង្វាន់អ្នកនិពន្ធរឿងឆ្នើម៕