.jpg)
ក្រុងហាណូយ: ប្រជាកសិករដាំផ្លែគូលែនរាប់រយនាក់បានបែងចែកប្រភេទផ្លែឈើទាំងនេះទៅតាមពុំនូកធំៗនៅទីផ្សារលក់ដុំដ៏មមាញឹកមួយកន្លែងនៅភាគខាងជើងប្រទេសវៀតណាម កាលពីថ្ងៃអង្គារ តែកសិករជាច្រើនបានត្អូញត្អែរចំពោះការធ្លាក់ថ្លៃ ដោយសារអ្នកជំនួញបរទេសបានផ្អាកការទិញអំឡុងពេលធ្វើចត្តាឡីស័ក។
ក្រោយការប្រយុទ្ធប្រឆាំងយ៉ាងសកម្មដើម្បីឆ្លើយតបនឹងការរីករាលដាលនៃវីរុសរាតត្បាតសកល ជីវិតរស់នៅក្នុងប្រទេសកុម្មុយនិស្ដមួយនេះស្ទើរតែវិលទៅកាន់សភាពដើមវិញ ហើយកម្មករនាំគ្នាចុះវាលតាំងពីព្រឹកព្រលឹមដោយមិនបានពាក់ម៉ាសការពារ ក្នុងខេត្ដបាក់ហ្គៀង ដែលម៉ូតូរបស់ពួកគេឌុបផ្លែគូលែនពេញៗកញ្ជើ។
វៀតណាម តែងតែនាំចេញផ្លែគូលែនស្រស់ប្រមាណ ១០ ម៉ឺនតោន ស្មើនឹងតម្លៃជាង ៣០ លានដុល្លារ ដែលភាគច្រើនទៅកាន់ទីផ្សារចិន និងក្រោយមកជប៉ុន អូស្ដ្រាលី និងសហរដ្ឋអាមេរិកតាមរដូវនីមួយៗ។
ប៉ុន្ដែជំនួញផ្លែឈើស្រស់បានដាំក្បាលចុះនាឆ្នាំនេះ ខណៈវៀតណាមបន្ដបិទព្រំដែន។
លោក ង្វៀង វ៉ាន ថាញ់ អាយុ ៣៥ ឆ្នាំ ដែលកសិផលរបស់លោកជាងពាក់កណ្ដាលលក់លើទីផ្សារបរទេស បានប្រាប់ AFP ថា៖ «ដោយេសារវិបត្ដិជំងឺសកលនេះ យើងមិនឃើញឈ្មួញចិនទេ ហើយយើងបែរមកលក់លើទីផ្សារក្នុងស្រុកវិញ។ ដូច្នេះ តម្លៃរបស់វាក៏ធ្លាក់ចុះខ្លាំងដែរ»។
ឈ្មួញបរទេសធ្លាប់តែមកទិញនៅផ្សារផ្ទាល់ ដែលការធ្វើដំណើរពីព្រំដែនចិនចំណាយពេលតែប៉ុន្មានម៉ោង អំឡុងពេលរដូវផ្លែគូលែនហុចផលតែ ៦ សប្ដាហ៍ប៉ុណ្ណោះ។ ប៉ុន្ដែបណ្ដាញផ្សព្វផ្សាយរដ្ឋ បានរាយការណ៍ថា កាលពីសប្ដាហ៍មុន ឈ្មួញចិន និងជប៉ុនរាប់រយនាក់ត្រូវបានធ្វើចត្ដាឡីស័ករយៈពេល ១៤ ថ្ងៃ។
ទោះបីជាអាជ្ញាធរនិយាយថា ពួកគេមិនចង់កសិផលទាំងនេះជននៅលើទីផ្សារក្នុងស្រុកយ៉ាងណាក៏ដោយ ក៏តម្លៃបានធ្លាក់រហូតដល់ពាក់កណ្ដាលពីតម្លៃលក់ឆ្នាំមុន។
លោក ដូ វ៉ាន់ធួន អាយុ ៤៧ ឆ្នាំ ដែលប៉ាន់ប្រមាណថា លោកអាចរកចំណូលជាង ៤ ០០០ ដុល្លារ ក្នុងមួយរដូវ បានឲ្យដឹងថា៖ «យើងបានខិតខំយ៉ាងខ្លាំងរយៈពេលពេញមួយឆ្នាំ តែនេះនៅមិនទាន់គ្រប់គ្រាន់សម្រាប់ការចិញ្ចឹមជីវិតឡើយ»។
ក្រៅពីកាហ្វេ ស្រូវ និងការនាំចេញត្រីអណ្ដែង ថ្មីៗនេះ វៀតណាមបានងាកមកចាប់អារម្មណ៍នឹងផ្លែឈើវិញ។ កាលពីឆ្នាំមុន ប្រទេសកុម្មុយនិស្ដវៀតណាម បាននាំចេញផ្លែឈើ និងបន្លែដែលមានតម្លៃ ៣,៧៦ ពាន់លានដុល្លារ។
បច្ចុប្បន្ន វៀតណាម បានកត់ត្រាអ្នកឆ្លងកូវីដ ១៩ ចំនួន ៣៣២ នាក់ និងគ្មានអ្នកស្លាប់។ ថ្វីដ្បិតតែប៉ុស្ដិ៍ព្រំដែនខ្លះត្រូវបានបើកសម្រាប់នាំចេញ-ចូលទំនិញ ឈ្មួញបរទេស មិនត្រូវបានអនុញ្ញាតឲ្យចូលឡើយ។
កាលពីថ្ងៃអង្គារ ក្រុងហាណូយបានឲ្យដឹងថា ខ្លួននឹងនៅតែបន្ដដណ្ដើមបាន «តំបន់សុវត្ថិភាព» ជាគោលដៅដែលគ្មានករណ៍ឆ្លងវីរុសកូរ៉ូណារយៈពេល ៣០ ថ្ងៃ៕ AFP/HR
