.jpg)
ម្ចាស់ជយលាភីល្ពៅធ្ងន់ជាងគេលេខ ១ ពីការប្រកួតនៅក្រុងឡុដវីជប៊ើក។ រូបថត AFP
ក្រុងឡុដវីជប៊ើក៖ ក្នុងការប្រកួតប្រជែងទម្ងន់ល្ពៅប្រចាំឆ្នាំនៅអឺរ៉ុប ឯទីក្រុងឡុដវីជប៊ើក ប្រទេស អាល្លឺម៉ង់ ល្ពៅខ្នាតយក្សបីផ្លែ បានធ្វើឲ្យមហាជនស្ងើចសរសើរ ខណៈក្នុងនោះអ្នកខេត្តអេនវើប បានឈ្នះជយលាភីពីលេខ ១ ដល់លេខ ៣។
ម្ចាស់ល្ពៅយក្សលេខមួយ គឺលោក ម៉ារីអូ វ៉ាន់ ជៀល ដែលបាននាំយកល្ពៅទម្ងន់ ១ ០១៣ គីឡូក្រាម ខណៈល្ពៅយក្សជាប់លេខពីមានទម្ងន់ ៩៧៩ គីឡូក្រាម និងលេខបីមានទម្ងន់ ៨៦០ គីឡូក្រាម។
យ៉ាងណាមិញល្ពៅរបស់លោក វ៉ាន់ ជៀល នៅមិនទាន់អាចផ្ដួលកំណត់ត្រាល្ពៅធ្ងន់ជាងគេក្នុងលោកដែលមានទម្ងន់រហូតដល់ ១១៩០ គីឡូក្រាម ដែលត្រូវបានដាំថែទាំដោយកសិករបែលហ្ស៊ិក លោក Mathias Willemijns។
ទោះជាការប្រកួតត្រូវបានបញ្ចប់កាលពីសប្ដាហ៍មុនក្ដី ក៏ការដាក់តាំងល្ពៅយក្សនៅតែបន្តក្នុងសួនវិមាន ឡុដវីជប៊ើក ដែលឆ្នាំនេះមានល្ពៅដល់ទៅ ៤៥ ម៉ឺនផ្លែ ស្វាគមន៍ភ្ញៀវចូលមកទស្សនារហូតដល់ថ្ងៃទី ៣ ខែ វិច្ឆិកា ខាងមុខនេះ។
នេះជាការប្រកួតប្រចាំឆ្នាំនៅក្រុង ឡុដវីជប៊ើក ក្នុងខែតុលា ដែលស្របរដូវពិធីបុណ្យហាឡូវីនផងដែរ។
យ៉ាងណាមិញការប្រកួតទម្ងន់ល្ពៅ គឺជាកម្មវិធីដ៏រំជើបរំជួលសម្រាប់កសិករដាំដំណាំ និងសាធារណជនមកទស្សនា។
ក្រុងឡុដវីជប៊ើក បានធ្វើពិធីប្រកួតទម្ងន់ល្ពៅ ២០ ឆ្នាំរួចមកហើយ ហើយនេះក៏ជាកម្មវិធីប្រកួតទម្ងន់ល្ពៅដ៏ធំជាងគេក្នុងលោក បើធៀបនឹងកម្មវិធីនៅសហរដ្ឋអាមេរិក និងកាណាដា។
ជារៀងរាល់ឆ្នាំ កម្មវិធីប្រកួតទម្ងន់ល្ពៅនេះបានទាក់ទាញភ្ញៀវទេសចរខ្ទង់ម៉ឺននាក់មកចូលរួម មើលសកម្មភាពស្ទូចផ្លែល្ពៅយក្ស ដាក់ជញ្ជីង និងផ្ទៀងតួលេខ ហើយស្រែកហ៊ោកញ្ជ្រៀវ៕ AFP
