ភ្នំពេញ៖ បង្កភាពភ្ញាក់ផ្អើលពីមហាជនយ៉ាងខ្លាំងនៅតាមបណ្តាញសង្គមហ្វេសប៊ុក ខណៈកាលពីអធ្រាត្រថ្ងៃទី ៨ ខែ ធ្នូ ឆ្នាំ ២០២០ កន្លងមកថ្មីៗនេះ ស្រាប់តែអតីតតារាកំប្លែងស្រីជើងចាស់ មានឈ្មោះពិតថា រ៉េន សុធារី ហៅ ឃ្មឹប ប៉ុនប៉ងចង់សម្លាប់ខ្លួននៅលើស្ពានជ្រោយចង្វារចាស់ បន្ទាប់ចេញពីមណ្ឌលកែប្រែដោយបានដើរប៉ងមកលោតទឹកសម្លាប់ខ្លួន តែសំណាងល្អផុតគ្រោះវិញ ដោយសារមានអន្តរាគមន៍ជួយទាន់ពេលវេលា។
បើតាមបណ្តុំរូបភាព និងសារចេញពីអ្នកលេងហ្វេសប៊ុកបានបង្ហោះឱ្យដឹងថា៖ «អតីតតារាកំប្លែងជើងចាស់ល្បីឈ្មោះគួរសមនាង ឃ្មឹប មានវិបត្តិផ្លូវចិត្តយ៉ាងធ្ងន់ធ្ងរ ដោះស្រាយមិនចេញរហូតគិតខ្លី លែងចង់រស់ ក៏បានសម្រេចចិត្តដើរមកលោតទឹកសម្លាប់ខ្លួនលើស្ពានជ្រោយចង្វារចាស់ បង្កការភ្ញាក់ផ្អើលកាលពីវេលាម៉ោង ១២ និង ៣០ នាទី យប់រំលងអធ្រាត្រ ឈានចូលទៅថ្ងៃទី ៨ ខែ ធ្នូ ឆ្នាំ ២០២០ តាមបណ្តោយផ្លូវជាតិលេខ ៦A នៅចំណុចលើស្ពានជ្រោយចង្វារចាស់ ស្ថិតនៅក្នុងសង្កាត់ស្រះចក ខណ្ឌដូនពេញ»។
ប្រភពដដែលនេះ បានបន្តទៀតថា៖ «សាក្សីបានឲ្យដឹងថា មុនពេលកើតហេតុ គេឃើញអតីតតារាកំប្លែងជើងចាស់ គឺអ្នកនាង ឃ្មឹប បានដើរឡើងស្ពានទាំងទឹកភ្នែក រួចបានពាក់កណ្តាលស្ពាន ស្រាប់តែឈរយំមួយសន្ទុះ រួចហើយក៏តោងបង្កាន់ដៃស្ពានបម្រុងនឹងលោតចុះចូលក្នុងទឹកទន្លេ តែត្រូវបានគេតាមទាន់រត់ចូលទៅចាប់ ហើយទាញចុះមកក្រោម។ លុះពេលដែលសួរនាំទៅអ្នកនាង ឃ្មឹប បានរៀបរាប់ទាំងទឹកភ្នែកថា ខ្លួនទើបតែចេញមកពីមណ្ឌលកែប្រែ ហើយមិនមានអ្នកណាម្នាក់ អើពើនឹងជួយសុខទុក្ខនោះទេ សូម្បីតែទៅជួលផ្ទះគេក៏គេមិនជួលឲ្យដែរ មិនដឹងថា ស្នាក់នៅទីកន្លែងណា និងទីពឹងអ្នកណានោះទេ ទើបសម្រេចចិត្តគិតខ្លីលោតទឹកសម្លាប់ខ្លួនបញ្ចប់ជីវិតតែម្តងទៅ។ ក្រោយកើតហេតុ សមត្ថកិច្ចបាននាំនាង ឃ្មឹប ទៅធ្វើការអប់រំពន្យល់ឲ្យឈប់គិតខ្លីបែបនេះទៀត»។
ក្រៅពីការចុច share បន្តនោះ ក៏មានអ្នកចូលទៅផ្ដល់ជាមតិ ដើម្បីឱ្យនាង ឃ្មឹប អតីតជាប្រពន្ធដើមតារាកំប្លែង នាយ ហុងដា រូបនេះ មិនគួរជ្រើសរើសយកវិធីគិតខ្លីបែបនេះឡើយ ដោយបានលើកឡើងថា៖ «គាត់ត្រូវបន្តរស់ ដើម្បីសាងកិត្តិយសខ្លួនមកវិញ ជីវិតគឺជាការតស៊ូ មិនត្រូវចុះចាញ់វាសនាទេ! ដើមហេតុយើងគិតខុស ទើបដល់ដំណាក់កាលនេះ តើត្រូវបន្តគិតខុសទៀតទេ? មិនអាចទេ ត្រូវរស់ជាថ្មីលើសេចក្តីថ្លៃថ្នូរ និងក្លាហាន! គួរតែខិតខំតស៊ូជម្នះគ្រប់ឧបសគ្គ ដើម្បីរស់រានជាបន្តទៅទៀត កសាងទំនុកចិត្តឡើងវិញ អនាគតនាងនៅវែងឆ្ងាយណាស់»។
គួររំឭកដែរថា អតីតតារាកំប្លែង នាង ឃ្មឹប ដែលធ្លាប់ជាប់ឈ្មោះជាអ្នកញៀនថ្នាំ និងត្រូវបានសមត្ថកិច្ចនគរបាលខណ្ឌដូនពេញបញ្ជូនខ្លួនទៅកាន់សាលាដំបូងរាជធានីភ្នំពេញ នៅថ្ងៃទី ១៩ ខែ ឧសភា ឆ្នាំ ២០២០ កន្លងមក ដើម្បីសម្រេចដាក់នៅមណ្ឌលកែប្រែ ក្រោយពីត្រូវបានសមត្ថកិច្ចខណ្ឌដូនពេញ ចុះបង្ក្រាបករណីជួញដូរ និងប្រើប្រាស់គ្រឿងញៀន ១ ករណី ដែលស្ថិតនៅចំណុចក្បែរបារ៍ចតុមុខ ផ្លូវជាតិលេខ ៥ នៅក្នុងភូមិ ១៦ សង្កាត់ស្រះចក ខណ្ឌដូនពេញ និងឃាត់ខ្លួនបានជនសង្ស័យចំនួន ៧ នាក់ រួមមានទាំងតារាកំប្លែងស្រីនាង ឃ្មឹប ដែលមានឈ្មោះពិតថា រ៉េន សុធារី វ័យ ៤៦ ឆ្នាំ ដែលគ្មានមុខរបរ និងគ្មានអាសយដ្ឋានស្នាក់នៅពិតប្រាកដ។
ខណៈមកទល់ពេលនេះ អតីតតារាកំប្លែងស្រី នាង ឃ្មឹប មិនទាន់មានប្រភពព័ត៌មានណាមួយជាក់លាក់បញ្ជាក់ពីស្ថានភាពនាងនោះឡើយ ក្រោយពីត្រូវបានសមត្ថកិច្ចសង្កាត់ស្រះចកយកទៅអប់រំនោះ៕