ភ្នំពេញៈ ដោយសារតែឪពុកបង្កើតមានឈាមជ័រជាតន្ត្រីករបុរាណម្នាក់នោះ ទើបជំរុញឲ្យក្មេងស្រី វ័យ ២៣ ឆ្នាំ កញ្ញា ទិព សាវរី មានទុនច្រើននៅក្នុងទម្រង់សិល្បៈបុរាណផ្នែកចម្រៀងមហោរី ដែលជាក្តីស្រឡាញ់ និងមានឆន្ទៈដ៏មោះមុត ចង់លើកស្ទួយ ថែរក្សាវិស័យសិល្បៈបុរាណមួយនេះបន្តមរតកពីដូនតាទៀតផង។
កញ្ញា ទិព សាវរី គឺជាយុវតីពន្លកថ្មីជំនាន់ក្រោយ ដែលមានចំណូលចិត្តទម្រង់សិល្បៈបុរាណចម្រៀងមហោរី និងប្រពៃណី មានស្រុកកំណើតនៅភូមិក្រាំងគរ ឃុំ និងស្រុកត្រាំកក់ ខេត្តតាកែវ។
យុវតីរូបនេះ ដែលមានពន្លកសិល្បៈប្រពៃណីតាំងពីក្មេង បានឆ្លើយប្រាប់ភ្នំពេញប៉ុស្តិ៍ ថា៖ «ចំពោះនាងខ្ញុំផ្ទាល់ ហាក់ដូចជាមាននិស្ស័យនឹងចម្រៀងប្រពៃណីបុរាណនេះតាំងពីតូចមកតែម្តង ខណៈរឿងនេះក៏អាចនិយាយបានថា មកពីនាងខ្ញុំមានលោកឪពុកជាតន្ត្រីករបុរាណមួយចំណែកជួយជំរុញផងដែរ»។
កញ្ញាបន្តទាំងអារម្មណ៍សប្បាយរីករាយទៅនឹងការប្រកបរបរជាតារាចម្រៀងប្រពៃណីទាំងវ័យក្មេងថា «លោកឪពុកខ្ញុំ គាត់ជាតន្ត្រីករបុរាណម្នាក់ ហើយបច្ចុប្បន្ននេះ គាត់ក៏មានក្រុមភ្លេងប្រពៃណី និងភ្លេងពិណពាទ្យផ្ទាល់ខ្លួនជួលក្នុងពិធីតាមប្រពៃណីក្នុងស្រុកភូមិផងដែរគឺឈ្មោះថា ក្រុមភ្លេងប្រពៃណីសារិន»។
តាមសង្កេតឃើញថា ទម្រង់សិល្បៈចម្រៀងបែបប្រពៃណីបុរាណ ហាក់មិនសូវជាមានចំណាប់អារម្មណ៍ពីក្រុមយុវជនខ្មែរជំនាន់ក្រោយនោះឡើយ ដោយពួកគេច្រើនមានទំនោរទៅរកសិល្បៈចម្រៀងសម័យវិញ ហើយតែងសម្លឹងឃើញពីទីផ្សាររក្សាប្រាក់បានច្រើន ឬតិចទៀតផង។
ផ្ទុយទៅវិញ កញ្ញា ទិព សាវរី បែរជាលើកឡើងតាមទស្សនៈផ្ទាល់ខ្លួនដូច្នេះថា៖ «សម្រាប់នាងខ្ញុំ គិតថា សិល្បៈចម្រៀងប្រពៃណី នាពេលឥឡូវនេះ កំពុងតែមានហាងឆេងមិនសូវចាញ់សិល្បៈចម្រៀងសម័យប៉ុន្មាននោះទេ បើតាមបទពិសោធគ្រួសារនាងខ្ញុំផ្ទាល់ ការរកប្រាក់ចំណូលចិញ្ចឹមអាត្មាលើវិថីសិល្បៈប្រពៃណីបុរាណ ដូចជាមិនបានចោទជាបញ្ហានោះឡើយ។ គឺថាអាចរស់បានដូចគេដូចឯងនៅលើវិថីសិល្បៈចម្រៀងសម័យដែរ»។
កញ្ញាបន្ថែមថា បច្ចុប្បន្ននេះ ចម្រៀងមហោរី ក៏កំពុងតែថមថយអ្នកសិក្សាតិចទៅៗ ដូច្នេះនាងខ្ញុំអាចក្រេបចំណេះនេះឲ្យបានច្រើន អាចយកទៅប្រើជាប្រយោជន៍ផ្ទាល់ខ្លួនផង និងសង្គមជាតិផង ទៅអនាគត។
ទិព សាវរី គឺជានិស្សិតបានបញ្ចប់ថ្នាក់បរិញ្ញាបត្រតូរ្យតន្ត្រីនៅសាកលវិទ្យាល័យភូមិន្ទវិចិត្រសិល្បៈ លើផ្នែកចម្រៀងជាក្រុម និងទើបតែបានជាប់នូវអាហារូបករណ៍សិល្បៈអមតៈ អាន ចនផន របស់អង្គការសិល្បៈខ្មែរអមតៈ (CLA) សម្រាប់ឆ្នាំ ២០១៩ ដោយបានសម្រេចជ្រើសយកចម្រៀងមហោរីមួយផ្នែកទៀត ខណៈកញ្ញាគឺជានិស្សិតម្នាក់ក្នុងចំណោមសិស្ស និងនិស្សិតអាហារូបករណ៍ឆ្នាំសិក្សាថ្មីឆ្នាំ ២០១៩ ដែលមានចំនួនទាំង ១០ រូបនោះផងដែរ៕