.jpg)
ពលរដ្ឋហ្វីលីពីនសម្រុកបន្ថែមភាពបៃតងនៅក្នុងផ្ទះ ធ្វើឱ្យតម្លៃរុក្ខជាតិឡើងថ្លៃខ្លាំង។ រូបថត AFP
ក្រុងម៉ានីល៖ ទំនោរពេញនិយមចំពោះសួនច្បារហៅថា «Plantdemic» ទទួលបានប្រជាប្រិយភាពខ្លាំងនៅទូទាំងប្រទេសហ្វីលីពីន ក្រោយពីការរឹតបន្តឹងការធ្វើដំណើរដោយសារវិបត្ដិកូវីដបានបង្កើនតម្រូវការសួនធម្មជាតិ ដែលជំរុញតម្លៃរុក្ខជាតិហក់ឡើងក៏ដូចជាការបំផ្លាញរុក្ខជាតិពីឧទ្យានសាធារណៈ និងព្រៃអភិវឌ្ឍន៍។
រូបភាពបុប្ផាស្រស់ស្អាត និងរុក្ខជាតិបៃតងស្រស់នៅបរិវេណផ្ទះ និងលើរានហាលនៃផ្ទះ ត្រូវបានបង្ហោះជោរជន់តាមបណ្ដាញសង្គម ខណៈពលរដ្ឋហ្វីលីពីនជាប់គាំងក្នុងផ្ទះងាកទៅរកធម្មជាតិ ដើម្បីជួយរំងាប់ស្ដ្រេស និងភាពធុញថប់ក្នុងឱរា។
អ្នកធ្វើសួនសម្រាប់បរិស្ថាន អាល់វីន ឈីងឃ្យូអាងកូ ដែលដឹងថា តម្លៃរុក្ខជាតិលម្អបានហក់ឡើង ៥៥ ០០០ ប៉េសូ (១ ១៤០ ដុល្លារ) បើធៀបនឹងតម្លៃមុនៗ ត្រឹម ៨០០ ប៉េសូ បានឱ្យដឹងថា៖ «មិនគួរឱ្យជឿសោះ។ មនុស្សម្នានាំគ្នាចាប់អារម្មណ៍នឹងរុក្ខជាតិនាពេលបច្ចុប្បន្ន»។
អាឡេន ហ្គូម៉េរ៉ាប៉ាស ជាអ្នកលក់រុក្ខជាតិនៅក្រុងម៉ានីលបាននិយាយថា ការលក់ដូរប្រចាំថ្ងៃរបស់អ្នកស្រីបានកើនឡើងត្រីគុណ ក្រោយពីអ្នកបើកទ្វារហាងវិញ ដោយសារវិបត្ដិកូវីដរាប់ខែមក។
បុគ្គលិកថែសួនច្បារសាធារណៈ នៅហ្វីលីពីន។ រូបថត AFP
តម្រូវការនៅតែកើនឡើងខ្លាំង ទោះបីជាតម្លៃសម្រាប់រុក្ខជាតិដាំក្នុងផ្ទះពេញនិយមមួយចំនួនបានឡើងថ្លៃខ្ពស់កប់ពពកយ៉ាងណាក៏ដោយ។
ស្ដ្រីវ័យ ៤០ ឆ្នាំ ដែលបានទិញរុក្ខជាតិពីម្ចាស់ចម្ការនៅខេត្ដក្បែរខាង បានឱ្យដឹងថា៖ «ពិបាកយល់ចិត្ដមនុស្សយើងណាស់។ ពេលរុក្ខជាតិមានតម្លៃថោក គ្មាននរណាចាប់អារម្មណ៍ទេ»។
ប៉ុន្ដែខណៈតម្រូវការរុក្ខជាតិកើនឡើង ក្រុមអាជ្ញាធរបានព្រមានថា រុក្ខជាតិជាច្រើននៅលើទីផ្សារមិនសុទ្ធតែជាវត្ថុស្របច្បាប់ទាំងអស់នោះទេ។
ឆ្មាំការពារព្រៃបានឃ្លាំមើលចោរលួចរុក្ខជាតិ ក្រោយពីក្រុមមន្ដ្រីបានកត់សម្គាល់ពូជរុក្ខជាតិខ្លះ ដែលបង្ហោះលើបណ្ដាញសង្គមអាចមានប្រភពមកពីតំបន់ព្រៃការពារ។
វិបត្តិកូវីដធ្វើឱ្យមានចោរកម្មលួចរុក្ខជាតិពីសួនច្បារ និងព្រៃ។ រូបថត AFP
អ្នកស្រី ម៉ារីយ៉ា គ្រីស្ទីណា រ៉ូទ្រីហ្គេស ជានាយកប្រចាំតំបន់ហ្សាមបួញ៉ានៃនាយកដ្ឋានធនធានថាមពល និងធម្មជាតិនិយាយថា៖ «ទំនោរដាំរុក្ខជាតិនេះទើបពេញនិយមអំឡុងបិទប្រទេសនេះទេ»។
ចោរលួចរុក្ខជាតិពីឧទ្យានសាធារណៈនៅភាគខាងជើងក្រុងបាហ្គីណូ បានបង្ខំឱ្យក្រុមអាជ្ញាធររឹតបន្តឹងសន្ដិសុខ។
លោក រ៉េណាន់ ឌីវ៉ាស ជាមន្ដ្រីទទួលបន្ទុកការិយាល័យគ្រប់គ្រងបរិស្ថាន និងឧទ្យានក្រុងបាហ្គីណូ បាននិយាយថា៖ «អ្នកលួចអាចជាអ្នកយកទៅដាំកែអផ្សុក ឬអ្នកចង់បង្កើនប្រាក់ចំណូល»៕ AFP/HR
