ក្រុងវ៉ាស៊ីងតោន៖ មិនយូរមិនឆាប់ ពលរដ្ឋអាមេរិកត្រូវតមទឹកប៉េងប៉ោះជ្រលក់ដំឡូងចៀន និងប៊ឺហ្គ័រ ដោយក្រុមហ៊ុនជួបឧបសគ្គក្នុងការផ្គត់ផ្គង់តាមតម្រូវការលើទឹកប៉េងប៉ោះកញ្ចប់ហែកប្រើតែម្ដង ខណៈតាមភោជនីយដ្ឋាននានាត្រូវប្ដូរសេវាកម្មមកវេចខ្ចប់អំឡុងពេលវិបត្ដិកូវីដសកលនេះ។
ប្រធានក្រុមហ៊ុន Kraft Heinz លោក ស្ដេវ ខូរនែល បានប្រាប់ AFP ថា៖ «Heinz ដ៏ល្បីល្បាញចំពោះគ្រឿងជ្រលក់ផលិតពីទឹកប៉េងប៉ោះ នៅតែលក់ដាច់បំផុត ប្រឈមបញ្ហានៃការផ្គត់ផ្គង់កើនឡើងចំពោះទឹកប៉េងប៉ោះខ្ចប់ដោយសារសេវាកម្មដឹកជញ្ជូនដល់មាត់ទ្វារផ្ទះ»។
កញ្ចប់ឯកជន ដែលប្រើប្រាស់សម្រាប់សេវាដឹកជញ្ជូន កាលពីឆ្នាំមុន បានក្លាយជាទម្លាប់ជំនួសការដាក់កែវ ឬដបជ័ររមែងឃើញនៅតាមភោជនីយដ្ឋានទៀតហើយ ទោះបីជាភ្ញៀវអាចចូលអង្គុយតុអាហារក៏ពួកគេមិនចង់ប៉ះពាល់វត្ថុទាំងនោះដែរ។
ក្រុមហ៊ុនផលិតទឹកប៉េងប៉ោះយក្សបានកែតម្រូវរួចហើយក្នុងការកែច្នៃផលិតផលរបស់ខ្លួន ដើម្បីសម្របទៅតាមស្ថានភាពបច្ចុប្បន្ន។
ក្រុមហ៊ុនបានប្រាប់ AFP តាមអ៊ីមែលថា៖ «ទោះយ៉ាងនេះក្ដី តម្រូវការមានច្រើនជាងការផ្គត់ផ្គង់»។
ជាការឆ្លើយតបនឹងតម្រូវការខ្ពស់នេះ ក្រុមហ៊ុន Kraft Heinz បានឱ្យដឹងថា ខ្លួនបានបន្ថែមចង្វាក់ផលិតផលថ្មីជាច្រើនទៀតក្នុងការផលិតនៅរោងចក្រ ដែលគួរតែអាចបង្កើនការផលិត ២៥ ភាគរយ រហូតដល់ ១២ ពាន់លានកញ្ចប់ក្នុងមួយឆ្នាំ។
ពួកគេបានអភិវឌ្ឍ «ការចាក់ទឹកប៉េងប៉ោះដោយមិនចាំបាច់ប៉ះ» សម្រាប់សវាកម្មម្ហូបក្នុងភោជនីយដ្ឋាន។ យោងតាម Wall Street Journal បានបង្ហាញដោយដកស្រង់ពីក្រុមហ៊ុនសេវាកម្មជំនួញ Plate IQ ថា តម្លៃកញ្ចប់ទឹកប៉េងប៉ោះបានហក់ឡើង ១៣ ភាគរយ តាំងពីខែមករា ឆ្នាំ ២០២០៕ AFP/HR