ភ្នំពេញ៖ សមាគមអ្នកនិពន្ធខ្មែរសហការជាមួយមជ្ឈមណ្ឌលឯកសារកម្ពុជា នឹងរៀបចំការប្រកួតជ្រើសរើសស្នាដៃតែងនិពន្ធរឿងខ្លី «ពានរង្វាន់អក្សរសិល្ប៍ស្លឹករឹត» លើកទី ១ នៅឆ្នាំ ២០២០ ខណៈបេក្ខជនត្រូវសរសេរឲ្យឆ្លុះបញ្ចាំងទៅតាមប្រធានបទរួម «ជីវិតរស់នៅប្រចាំថ្ងៃរបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ប៉ុល ពត»។
បើយោងតាមសេចក្តីជូនដំណឹងនៅលើគេហទំព័រផ្លូវការរបស់សមាគមអ្នកនិពន្ធខ្មែរកាលពីចុងសប្តាហ៍កន្លងមក ក្រោយពីធ្វើកិច្ចប្រជុំជាមួយមជ្ឈមណ្ឌលឯកសារកម្ពុជារួចមកនោះក៏បង្ហោះសារថា៖ «សូមប្រគេន ជម្រាបជូនដំណឹងដល់សមាជិក សមាជិកានៃសមាគមអ្នកនិពន្ធខ្មែរ និងសាធារណជនទូទៅមេត្តាជ្រាបថា ក្នុងគោលបំណងរួមចំណែកថែរក្សា ឯកសារប្រវត្តិសាស្ត្រនៃជីវិតរស់នៅ របស់ប្រជាជនខ្មែរនៅក្នុងរបបកម្ពុជាប្រជាធិបតេយ្យ ប៉ុល ពត តាមរយៈស្នាដៃតែងនិពន្ធ និងដើម្បីលើកស្ទួយតម្លៃអក្សរសាស្ត្រជាតិខ្មែរ សមាគមអ្នកនិពន្ធខ្មែរ បានសហការជាមួយមជ្ឈមណ្ឌលឯកសារកម្ពុជារៀបចំប្រកួតជ្រើសរើសស្នាដៃតែងនិពន្ធរឿងខ្លី «ពានរង្វាន់អក្សរសិល្ប៍ស្លឹករឹត» លើកទី ១ ឆ្នាំ ២០២០ នៃប្រធានបទថា «ជីវិតរស់នៅប្រចាំថ្ងៃរបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ប៉ុល ពត»។
លោក បណ្ឌិត ព្រឿង ប្រណីត ជាប្រធានសមាគមអ្នកនិពន្ធខ្មែរ បានថ្លែងឲ្យដឹងពីលក្ខខណ្ឌនៃការជ្រើសរើសស្នាដៃនិពន្ធសំខាន់ទាំង ៣ ចំណុច នៃការប្រកួតតែងនិពន្ធរឿងខ្លី ពានរង្វាន់អក្សរសិល្ប៍ស្លឹករឹត លើកទី ១ នេះថា៖ «ចំណុចទី១ ខ្លឹមសាររឿងខ្លី ជាស្នាដៃនិពន្ធថ្មី ត្រូវតែនិយាយអំពីជីវិតរស់នៅប្រចាំថ្ងៃរបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ប៉ុល ពត ប៉ុន្តែមិនសង្កត់ធ្ងន់ទៅលើតែប្រធានបទឧក្រិដ្ឋកម្មយង់ឃ្នងកាប់សម្លាប់ទេ។ ចំណុចទី២ ចំនួនសំណេរមានចន្លោះពី ៥ ដល់ ១៥ ទំព័រ សម្រាប់អត្ថបទវាយដោយកុំព្យូទ័រ ឬសំណេរដៃមានចំនួនពី ១០ ដល់ ២០ ទំព័រ។ ចំណុចទី៣ សំណេរ គឺសរសេរលើក្រដាស A4 មានពុម្ពអក្សរខ្មែរ អូ.អេស សៀមរាប (Khmer OS Siemreap) មានទំហំ ១២ មិនដាក់ក្បាល ឬជើងទំព័រនោះឡើយ»។
លោកបណ្ឌិត ក៏បានឲ្យដឹងពីលក្ខណសម្បត្តិសម្រាប់បេក្ខជនចូលរួមប្រកួតដែរថា៖ «បេក្ខជនដែលអាចចូលរួមប្រកួតបាន គឺទី១ ជាអ្នកនិពន្ធ និងសាធារណជន ជនជាតិខ្មែរ ឬបរទេស (មានសមត្ថភាពអក្សរសិល្ប៍)។ ទី២ ជាអ្នករស់រានមានជីវិតពីសម័យ ប៉ុល ពត និងធ្លាប់មានរឿងរ៉ាវនៅក្នុងសម័យនោះ។ ទី៣ ជាអ្នកធ្លាប់ឮរឿងរ៉ាវពិត ដែលរៀបរាប់ឡើងវិញ ដោយអ្នករស់រានមានជីវិតពីសម័យ ប៉ុល ពត។ ស្នាដៃរឿងខ្លីចំនួន ១០ រឿង នឹងត្រូវជ្រើសរើសផ្ដល់ជាពានរង្វាន់ រួមមាន ពានកិត្តិយស វិញ្ញាបនបត្រ និងថវិកាហើយស្នាដៃ ដែលបានជ្រើសរើសនឹងត្រូវបោះពុម្ព និងពិចារណាផលិតជាភាពយន្តខ្លី ឬបទចម្រៀង»។
សមាជិក សមាជិកានៃស.អ.ខ និងសាធារណជន ដែលមានបំណងចូលរួមប្រកួត សូមផ្ញើស្នាដៃមកសមាគមអ្នកនិពន្ធខ្មែរ ចាប់ពីថ្ងៃទី ១ ខែ តុលា ដល់ថ្ងៃទី ៣០ ខែ វិច្ឆិកា ឆ្នាំ ២០១៩ ត្រឹមម៉ោង ១៧.០០ នាទីជាកំណត់។ ចំពោះការទទួលនៅទីស្នាក់ការសមាគមអ្នកនិពន្ធខ្មែរ នៅក្នុងបរិវេណវត្តបទុមវតី ភ្នំពេញ ឬផ្ញើតាមសារអេឡិចត្រូនិក Khmerwriterkwa @gmail.com ឬក៏តាមទូរស័ព្ទ ០៨៩ ៨៥៦ ៧៦៤ /០១២ ៧៩២ ៩៥៩៕