ភ្នំពេញៈ ខណៈដែលក្រុមតារាប្រុសស្រីភាគច្រើនមានគម្រោងនាំសមាជិកគ្រួសារ ឪពុកម្តាយជាអ្នកមានគុណ ទៅកម្សាន្តនៅទីនានាក្នុងប្រទេស ឬចេញទៅក្រៅប្រទេស ឬក៏ទៅលេងស្រុកកំណើតដើម្បីបានជួបជុំញាតិ នាឱកាសថ្ងៃបុណ្យចូលឆ្នាំប្រពៃណីខ្មែរខាងមុខនោះ បែរជាពិធីការិនីទូរទស្សន៍បាយ័ន និងតារាសម្តែងស្រីស្រស់សោភា កញ្ញា កែវ ផល្លីកា បានជួបទុក្ខធំដោយអ្នកម្តាយបង្កើតជាទីស្រឡាញ់បានទទួលមរណភាព កាលពីថ្ងៃអាទិត្យ នាចុងសប្តាហ៍កន្លងមកក្នុងវ័យ ៦៦ ឆ្នាំ។
ក្រោយពីបានបូជាសពម្តាយ ដែលធ្វើនៅឯវត្តសំពៅមាស ហើយក៏បាននាំយកធាតុមកទុកនៅផ្ទះ និងគ្រោងរៀបចំពិធីបុណ្យខួប ៧ ថ្ងៃ នឹងចូលនាល្ងាចថ្ងៃទី ១៣ ខែមេសា និងបង្ហើយបុណ្យថ្ងៃទី ១៤ ខែមេសា ឆ្នាំ ២០១៨ គឺចំថ្ងៃបុណ្យចូលឆ្នាំប្រពៃណីជាតិខ្មែរផងដែរ។
អតីតពិធីការិនីទូរទស្សន៍ប៉ុស្តិ៍លេខ ៣ ដែលទើបតែចាប់បានឱកាសក្នុងតំណែងជាពិធីការិនីប៉ុស្តិ៍បាយ័នមានវ័យ ២៨ ឆ្នាំ កញ្ញាកែវ ផល្លីកា អមជាមួយពិធីករទូរទស្សន៍លោក អៀង វិឆ័យ និងពិធីការិនីកញ្ញា សុភ័ក្រ កុសុម៉ា នៃកម្មវិធីកម្សាន្តចំនួន ២ នៅប៉ុស្តិ៍ទូរទស្សន៍បាយ័នគឺកម្មវិធីសំនៀងឯក រដូវកាលទី ១ និងកម្មវិធី The Melody រដូវកាលទី ១ នោះ ក៏បានបង្ហើបប្រាប់ ភ្នំពេញ ប៉ុស្តិ៍ ពីដើមចមនៃជំងឺម្តាយ រហូតទទួលមរណភាពកាលពីថ្ងៃអាទិត្យទី ៨ ខែមេសា កន្លងមក និងការធ្វើពិធីបុណ្យខួប ៧ថ្ងៃ នៃសពម្តាយផងដែរថា៖ «តាមពិតទៅ ម៉ាក់គាត់មានជំងឺក្រិនថ្លើម ដោយគាត់ឈឺប្រមាណ ៤-៥ ឆ្នាំមកហើយយើងខ្ញុំជាកូនៗ ក៏បានជូនគាត់ដើម្បីទៅព្យាបាលនៅឯប្រទេសវៀតណាមផងដែរ តែអាការជំងឺគាត់ឈឺធ្ងន់ទើបតែប៉ុន្មានខែចុងក្រោយនេះ តែប៉ុណ្ណោះ ដែលគាត់ បានទទួលអនិច្ចកម្មកាលពីថ្ងៃអាទិត្យមុននេះតែម្តង»។
បុប្ផាស្រស់មួយទង ដែលមានស្រុកកំណើតមកពីស្រុកក្រូចឆ្មារ ខេត្តត្បូងឃ្មុំ នៃគ្រួសារមានបងប្អូនបង្កើត ៦ នាក់ (ស្រី ៥ នាក់) ខណៈកញ្ញា កែវ ផល្លីកា គឺជាកូនស្រីពៅក្នុងគ្រួសារ និងបានចាប់អាជីពជាអ្នកសិល្បៈតែម្នាក់ឯងគត់ ដោយបានប្រឡូកចូលសិល្បៈតាំងពីឆ្នាំ ២០០៧ នោះបន្តថា៖ «កាលពីថ្ងៃម៉ាកខូច រវល់វក់វីខ្លាំងក៏មានជូនដំណឹងដល់មិត្តអ្នកសិល្បៈអ្វីទេ ហើយនៅថ្ងៃបុណ្យខួប ៧ ថ្ងៃ ដែលនឹងចូលនៅល្ងាចថ្ងៃទី ១៣ និងបង្ហើយថ្ងៃទី ១៤ ខែ មេសា នៅផ្ទះនាងខ្ញុំ ស្ថិតនៅក្នុងបុរីពិភពថ្មីផ្លូវវេងស្រេង ខណ្ឌមានជ័យ គឺចំថ្ងៃចូលឆ្នាំខ្មែរតែម្តង តែប្រហែលជាមិនសូវបានអញ្ជើញភ្ញៀវច្រើនដែរទេព្រោះខ្ញុំគិតថា ជិតចូលឆ្នាំថ្មីអ៊ីចឹងប្រហែលជាពួកគាត់រវល់ខ្លាំង»។
ឯបទពិសោធការងារសិល្បៈវិញ កញ្ញា កែវ ផល្លីកា បានប្រឡូកបែបចម្រុះ ដោយមានទាំងការសម្តែងខារ៉ាអូខេ ដើរបង្ហាញម៉ូដ និងពិធីការិនីទូរទស្សន៍ ដោយបានចាប់ផ្តើមតាំងពីឆ្នាំ ២០០៧ មក ខណៈ អាជីពសិល្បៈពិធីការិនី ដែលនាងស្រឡាញ់ជាងគេនោះ ទើបតែរកបានទ្រនំឈរជើងនៅនឹងនាពេលប៉ុន្មានឆ្នាំនេះតែប៉ុណ្ណោះ៕