ក្រុងឡូសអេនជឺលេស៖ កាលពីថ្ងៃអង្គារក្រុងឡូសអេនជឺលេស បានដាក់បម្រាមនូវទង្វើកេងប្រវ័ញ្ចលើសត្វកម្រ ដើម្បីបម្រើការកម្សាន្ដ ដោយបញ្ចប់ពិធីជប់លៀងហ៊ីហារបស់ហូលីវូដ ជាទីដែលសត្វកវែង ខ្លា និងថែមទាំងដំរីត្រូវបានប្រើសម្រាប់ផ្ដល់ការសប្បាយដល់ភ្ញៀវ។
មន្ដ្រីមកពីក្រុងប្រឹក្សាក្រុង លោក ដាវីដ រូ ដែលបានដឹកនាំកំណែទម្រង់ ដែលក្រុមការងារបានឯកភាពទាំងអស់គ្នាបាននិយាយថា៖ «បញ្ហាសត្វព្រៃកម្រត្រូវបានរំពានបានកើតឡើងនៅនឹងភ្នែកខ្ញុំកាលពី ៤ ឆ្នាំមុន ពេលកូនសត្វកវែង និងដំរីត្រូវបានបង្ខំឲ្យដើរឡើងភ្នំហូលីវូដសម្រាប់ឱកាសជប់លៀងផ្ទះមួយ»។
លោកបានបន្ដថា៖ «មិនអាចទទួលយកបានទេ ហើយយើងត្រូវតែបញ្ចប់ហើយក្រុងឡូសអេនជឺលេសត្រូវមានវិធានការឲ្យប្រាកដថា ការមាក់ងាយសត្វបែបនេះមិនស័ក្ដិសមនឹងតម្លៃរបស់យើងឡើយ»។
បទប្បញ្ញត្ដិដែលត្រូវការការគាំទ្រពីអភិបាលក្រុងឡូសអេនជឺលេស បានហាមឃាត់ការប្រើប្រាស់សត្វព្រៃ ឬសត្វកម្រនៅក្នុងពិធីជប់លៀងតាមផ្ទះ និងកម្មវិធីកម្សាន្ដផ្សេងៗទៀត។
បទប្បញ្ញត្តិក៏បញ្ជាក់ពីការហាមឃាត់នូវសកម្មភាពជិះសត្វកម្រ ឬសត្វព្រៃសម្រាប់ការសប្បាយផងដែរ។
ច្បាប់នេះត្រូវបានគាំទ្រដោយអង្គការគាំពារសិទ្ធិសត្វ PETA និង PAWS ដោយស្ថាប័នទាំងនេះលើកឡើងថា ការយកសត្វភេនឃ្វីន ខ្លា និងសត្វព្រៃធ្វើជាគ្រឿងកំដរពិធីជប់លៀង គឺជាការរំលោភសិទ្ធិសត្វ។
ប៉ុន្តែសួនសត្វក្រុងឡូសអេនជឺលេស ដែលនៅតែអាចបង្ហាញសត្វព្រៃ ដើម្បីផ្ដល់ការអប់រំ ខណៈការប្រើប្រាស់សត្វព្រៃក្នុងរោងសៀកត្រូវបានហាមប្រាម៕ AFP/HR