.jpg)
ការសម្តែងទម្រង់សិល្បៈបុរាណរួមគ្នារវាងខ្មែរ និងជប៉ុន កាលពីប្រារព្ធពិធីបុណ្យផ្កាយឆ្នាំ ២០១៨ នៅ CJCC។ រូបថត CJCC Page
ភ្នំពេញៈ ស្ថានទូតជប៉ុនប្រចាំប្រទេសកម្ពុជារួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងមជ្ឈមណ្ឌលអាស៊ីនៃមូលនិធិជប៉ុន (JFAC) នឹងរៀបចំនូវព្រឹត្តិការណ៍ពិធីបុណ្យផ្កាយឆ្នាំ ២០១៩ ចាប់ពីថ្ងៃទី ១៣ ដល់ថ្ងៃទី ១៤ ខែ កក្កដា ឆ្នាំ ២០១៩ នៅឯសាលមហោស្រពអង្គរគីហ្សូណានៃ CJCC នៅចុងសប្តាហ៍នេះ។
ជាក់ស្តែងពិធីបុណ្យផ្កាយត្រូវបានរៀបចំឡើងជារៀងរាល់ឆ្នាំចាប់តាំងពីឆ្នាំ ២០០៤ មកក្នុងគោលបំណងបន្តជំរុញនូវការផ្លាស់ប្តូរវប្បធម៌រវាងប្រទេសជប៉ុន និងកម្ពុជាបន្ថែម។ ពិធីបុណ្យផ្កាយគឺជាកម្មវិធីបុណ្យប្រពៃណីជប៉ុន ដែលតែងតែប្រារព្ធនៅថ្ងៃទី ៧ ខែ កក្កដា ជារៀងរាល់ឆ្នាំនៅប្រទេសជប៉ុនរំឭកដល់រឿងរបស់គូស្នេហ៍នៅឋានសួគ៌ ១ គូ គឺនារីតម្បាញ និងបុរសគង្វាលគោ។ បើតាមតំណាលរឿងគូស្នេហ៍ ១ គូនេះ ត្រូវបំបែកដោយទន្លេអាមាណុហ្កាវ៉ា ហើយអាចជួបគ្នាបានតែម្តងគត់ក្នុង ១ ឆ្នាំ គឺនៅថ្ងៃទី ៧ ខែ កក្កដា។ ដូច្នេះនៅក្នុងថ្ងៃនោះប្រជាជនជប៉ុននាំគ្នាសរសេរបំណងប្រាថ្នារបស់ខ្លួនហើយចងព្យួរទៅនឹងមែកឫស្សី ដើម្បីបួងសួងឲ្យបានសម្រេចតាមអ្វីដែលខ្លួនប៉ងប្រាថ្នា។
តួកុនរឿង «A tale of Samurai Cooking» នឹងបញ្ចាំងឆ្នាំ ២០១៩។ រូប CJCC Page
ឆ្នាំនេះនឹងមានកម្មវិធីច្រើនដូចជាសិក្ខាសាលា និងបទបង្ហាញទាក់ទងនឹងអានីមេខូសផ្លេ ការប្រកួតភាពយន្តខ្លី ការបញ្ចាំងខ្សែភាពយន្តជប៉ុន ថ្នាក់រៀនចម្អិនម្ហូបជប៉ុន សិល្បៈបត់ក្រដាស «អូរីហ្គាមី» រៀនសិល្បៈកាត់ក្រដាស «គីរីហ្គាមី» ការសរសេរអក្សរផ្ចង់ «ស្យូដូ» សាកល្បងស្លៀកពាក់ប្រពៃណី «ក្បិនខ្មែរ» និង «យូកាតាជប៉ុន» ការសាកល្បងស្លៀកសម្លៀកបំពាក់ និងលេងកីឡា «កេនដូ» និង «អ៊ីអៃដូ» ថ្នាក់រៀនបាញ់ធ្នូមរតកខ្មែរព្រមទាំងការតាំងពិព័រណ៍ផ្សេងៗនៅក្នុងពិធីបុណ្យនេះ។
បើតាមសេចក្តីប្រកាសព័ត៌មានស្ថានទូតជប៉ុនឲ្យដឹងថា៖ «ពិធីបុណ្យផ្កាយឆ្នាំនេះក៏នឹងផ្តោតជាពិសេសលើការសន្សំសំចៃបរិស្ថាន។ ចាប់ពីឆ្នាំនេះតទៅស្ថាប័នដៃគូរៀបចំពិធីបុណ្យនេះនឹងផ្តោតការយកចិត្តទុកដាក់ទៅលើការរៀបចំ និងការកាត់បន្ថយសំរាមឲ្យបានត្រឹមត្រូវ ជាពិសេសគឺសំណល់ប្លាស្ទិក។ អំឡុងព្រឹត្តិការណ៍ពិធីបុណ្យផ្កាយ យើងនឹងលើកទឹកចិត្តអ្នកចូលរួមទាំងអស់ត្រូវចោលសំរាមឲ្យបានត្រឹមត្រូវក្នុងធុងសំរាមដែលបានបែងចែករួចជាស្រេចចៀសវាងការចោលសំរាមលើដី និងការកាត់បន្ថយសំរាមដោយប្រើប្រាស់ជាថ្មី។ ឧទាហរណ៍ជាក់ស្តែងដូចជាការប្រើប្រាស់ដបទឹក និងថង់បរិស្ថានដែលអាចប្រើប្រាស់បានម្តងហើយម្តងទៀត។ ការលើកទឹកចិត្តនេះនឹងត្រូវបានធ្វើឡើងតាមរយៈការណែនាំរបស់និស្សិតស្ម័គ្រចិត្តសិក្ខាសាលាផ្សេងៗ ការសហការពីម្ចាស់ស្តង់លក់ផលិតផលដូចជា ការលក់បញ្ចុះតម្លៃប្រសិនបើប្រើប្រាស់ដបទឹកដែលអាចប្រើប្រាស់ឡើងវិញយកមកដោយខ្លួនឯង ឬការមិនផ្តល់ឲ្យនូវថង់ ឬទុយោប្លាស្ទិក»។
នាឱកាសប្រារព្ធពិធីបុណ្យផ្កាយឆ្នាំនេះក៏មានកម្មវិធីសំខាន់ៗមួយចំនួនទៀតដែរដូចជា ការប្រឡងចម្រៀងណូដូជីម៉ាន់ឆ្នាំ ២០១៩ ការប្រគំតន្រី្តមេឡូឌីខ្មែរ ការសម្តែងដោយក្រុមចម្រៀង និងរបាំដ៏ល្បីរបស់ជប៉ុនឈ្មោះ TEPURA KIDZ និងមានការចាក់ខ្សែភាពយន្តជប៉ុនដ៏ល្បីរឿង «A tale of Samurai Cooking-A True Love Story» ផងដែរ៕
ឈុតសម្តែងក្នុងរឿង «A tale of Samurai Cooking» នឹងបញ្ចាំងឆ្នាំ ២០១៩។ រូបថត CJCC Page
