The Phnom Penh Post Search

Search form




Logo of Phnom Penh Post newspaper Phnom Penh Post - ពិធី​បុណ្យ​ភូមិ​ឆ្នាំ​នេះ​ដូរ​ទៅ​ធ្វើ នៅ​បរិវេណ វត្ត​ជ្រោយ​អំពិល​




ពិធី​បុណ្យ​ភូមិ​ឆ្នាំ​នេះ​ដូរ​ទៅ​ធ្វើ នៅ​បរិវេណ វត្ត​ជ្រោយ​អំពិល​

Content image - Phnom Penh Post
ក្រុម​អ្នកចូល​រួម​ពិធី​បុណ្យ​ភូមិ​ឆ្នាំ​នេះ​ទៅ​ផ្អើល​មើល​ឈុត​សម្លៀក​បំពាក់​បុរាណ។ រូប សហការី

ពិធី​បុណ្យ​ភូមិ​ឆ្នាំ​នេះ​ដូរ​ទៅ​ធ្វើ នៅ​បរិវេណ វត្ត​ជ្រោយ​អំពិល​

ភ្នំពេញៈ ពិធី​បុណ្យ​ភូមិ​ ដែល​រៀបចំ​ឡើង​ក្នុងគោល​បំណង​គាស់​កកាយ​ ឬ​ជាការ​ពញ្ញាក់​អារម្មណ៍​ទៅដល់​ប្រជាពល​រដ្ឋខ្មែរ​នូវ​អ្វីជា​វប្បធម៌​ ប្រពៃណី​ខ្មែរ ដែល​មានតាំង​ពីបុរាណ​ ហើយ​ ជាពិសេស​គឺ​យុវវ័យ​ខ្មែរតែម្តង​ នឹងប្រារព្ធ​ធ្វើជា​លើកទី ៣ មានរយៈពេល​បីថ្ងៃ ដោយ​ចាប់​ផ្តើម​ពី​ថ្ងៃទី ៨ ខែ​មេសា​នេះ​ដល់​ថ្ងៃទី ១០ ខែមេសា​ឆ្នាំ ២០១៦​ នៅឯ​បរិវេណ​ក្នុង​វត្តជ្រោយ​អំពិល​ ស្ថិតនៅ​សង្កាត់​ព្រែក​ឯង​ ខណ្ឌ​ច្បារអំពៅ​ រាជធានី​ភ្នំពេញ។

កញ្ញា រិទ្ធី លម្អរពេជ្រ អ្នក​រៀបចំ​វ័យក្មេង​បាន​រៀបរាប់​នូវកម្មវិធី​បុណ្យទាំង​បីថ្ងៃត្រួសៗ​ប្រាប់​ភ្នំពេញ​ប៉ុស្តិ៍ថា​សម្រាប់​ថ្ងៃទី ១ យើងមាន​រៀបចំ​ពិធីសំពះ​គ្រូ​ និង​សម្តែង​របាំ​ប្រជាប្រិយ​ផ្លយសួយ​នៅពេល​ព្រឹក ខណៈពេល​រសៀល​ដល់យប់​មានការ​សម្តែង​ល្ខោននិយាយ សម្តែង​របាំបុរាណ​គឺ​របាំ​ទេពមនោរម្យ​ បង្ហាញពី​របៀបចម្អិន​ម្ហូប​ខ្មែរ​ជាមួយ​ខ្នុរ​ របាំ​ប្រជាប្រិយ​នេសាទ​ របាំទៀន របាំសហ​សម័យ​ របាំ​បួងសួង និងល្ខោន​និយាយ។

Content image - Phnom Penh Post
ប្រជាពល​រដ្ឋ និង​យុវជន​ខ្មែរយ៉ាង​ច្រើន​ចូលរួម​ពិធី​បុណ្យ​ភូមិ។ រូប សហការី

ចំណែកឯ​ថ្ងៃទី ២ មាន​ពិធី​រាប់បាត្រ​ព្រះសង្ឃ ១០០ អង្គ​ ពិធីបទ​បង្ហាញ​ពីពិន​ខ្មែរ​នាពេល​ព្រឹក​ លុះដល់​ម៉ោង ១ រសៀល​មានការ​ប្រគំតន្រ្តី​ស្រុកស្រែ​ដោយ​ក្រុម​តន្រ្តី​ជនពិការ​ និង​ក្រុម Small World ការ​បង្ហាញ​ម៉ូដរបស់​បវរ​កញ្ញា​ធ្លាក់ទឹក​ ដោយកញ្ញា​សាប៊ូ​លុច្ស​ ការ​បង្ហាញ​នូវវិធី​ចម្អិននំ​អន្សមខ្មែរ សម្តែង​ពិនខ្មែរ ល្ខោនខោល និង​ស្រមោល​ស្បែកធំ​ ដែល​ជា​ទម្រង់ថ្មី​ ខណៈនៅ​ថ្ងៃទី ៣ វិញ​មានពិធី​ស្រង់ព្រះរស់ សម្តែង​របាំ​ត្រុដិ បទ​បង្ហាញ​ និងការ​សម្តែងចាប៉ី​ដងវែង តន្ត្រី​ស្រុកស្រែ​ដោយ​ក្រុម​រថយន្ត​តន្រ្តី​ទិព្វ បង្ហាញនូវ​វិធី​ចម្អិន​សម្លការី​ខ្មែរ និង​កម្មវិធី​សំឡេង​អង្គរ។

អ្នករៀបចំ​វ័យ ២៤ ឆ្នាំ កញ្ញា លម្អរ​ពេជ្រ បន្ត​ឲ្យដឹង​ពីគោល​បំណងនៃ​កម្ម​វិធី​បុណ្យ​ភូមិនេះ​ថា៖ «​គោលដៅ​សំខាន់​របស់​យើង​គឺចង់​ក្រើន​រំឭក​យុវវ័យ​ខ្មែ​សម័យ​ក្រោយ​នេះឲ្យ​ស្វែងយល់ និង​ស្គាល់​កាន់តែ​ច្បាស់​នូវអ្វីជា​ទម្រង់សិល្បៈ​វប្បធម៌​ប្រពៃណី​ខ្មែរមាន​តាំង​បុរាណមក​ និង​ចង់​បង្ហាញថា​មុនពេល​ថ្ងៃ​ប្រារព្ធ​ពិធី​បុណ្យចូល​ឆ្នាំថ្មី​ប្រពៃណី​ជាតិខ្មែរ​យើង​ ប្រជា​ពលរដ្ឋ​ខ្មែរ​និយម​សម្តែងរបាំ​ និងលេង​ល្បែង​​ប្រជាប្រិយ​អ្វីខ្លះ?ហើយ​ប្រសិន​បើពួក​គាត់​បាន​ចូលរួម និង​ទស្សនា​ផ្ទាល់នោះ ប្រាកដ​ជាបាន​មើល​ឃើញ ស្តាប់ឮ​ និងស្វែង​យល់​ជាមិន​ខានឡើយ»។

គួរ​បញ្ជាក់ថា ពិធី​បុណ្យ​ភូមិ​នេះ កាល​ប្រារព្ធ​លើកទី ១ និង​ទី ២ ធ្វើនៅឯ​ខាងក្នុង​នៃ​បរិវេណ​វត្ត​ព្រែកថ្លឹង​ ដែល​មានទី​តាំង​ស្ថិតនៅ​ក្នុង​ក្រុងតាខ្មៅ ខេត្តកណ្តាល​ ខណៈកម្ម​វិធី​ប្រារព្ធធ្វើ​លើកទី ៣ ឆ្នាំ ២០១៦ នេះវិញ​គឺនៅ​ឯ​វត្ត​ជ្រោយអំពិល ដែល​ស្ថិត​នៅ​សង្កាត់ព្រែកឯង​ ខណ្ឌច្បារអំពៅ​រាជធានី​ភ្នំពេញ ត្រូវ​បាន​ កញ្ញា រិទ្ធី​ លម្អរពេជ្រ បញ្ជាក់​ពីមូលហេតុ​នៃ​ការប្តូរ​ទីតាំង​ថា៖ «​តាមពិត​ទៅ​យើងបាន​កំណត់ថា​នឹង​យក​ទីតាំង​វត្ត​ព្រែកថ្លឹង ដើម្បី​ធ្វើ​ពិធីបុណ្យ​ភូមិនេះ​ឲ្យបាន​រយៈពេល​បីឆ្នាំ​ ទើប​ប្តូរ​ទីតាំង​ទៅ​កន្លែង​ផ្សេង​ តែដោយសារ​វត្តនេះ​ត្រូវជាប់​រវល់​សាងសង់​មិនទាន់​រួចរាល់​នោះ ​ទើបបាន​ជាយើង​ប្តូរមក​កាន់វត្ត​ជ្រោយ​អំពិល​»៕​

អត្ថបទគួរចាប់អារម្មណ៍