.jpg)
កញ្ញា អាដាណា (រូបអាវសាច់ក្រណាត់ពណ៌ផ្ទៃមេឃ) និងកញ្ញា ទី តាអាត (រ៉ូបពណ៌ខ្មៅ)។ ហ៊ាន រង្សី
ភ្នំពេញ៖ កញ្ញា អាដាណា សុវណ្ណរស្មី ម៉ម ឡឺហ្គ្រោស វិចិត្រការិនីស្វ័យសិក្សាបានប្រែក្លាយពីការឈឺចាប់នៃជំងឺមហារីកបង្កើតជាស្នាដៃសិល្បៈគំនូរបង្កប់ន័យរៀបរាប់អំពីការពុះពារនឹងឆាកជីវិត និងបញ្ហាសង្គមកំពុងប្រឈម។
ពិព័រណ៍ «Complementarity» ដែលរំលេចនូវគំនូរបង្កប់ន័យ ៤ ផ្ទាំង និងរូបថត ៧ សន្លឹក របស់វិចិត្រការិនី អាដាណា សុវណ្ណរស្មី ម៉ម ឡឺហ្គ្រោស និងកញ្ញា ទី តាអាត ជាជាងថតរូបចំណានម្នាក់ ត្រូវបានតាំងបង្ហាញនៅមជ្ឈមណ្ឌលពាណិជ្ជកម្មវឌ្ឍនៈកាពីតូល រ៉ូសវូដ នៅថ្ងៃទី ៩ ខែកញ្ញា បន្ដដល់ថ្ងៃទី ១០ ខែ មករា ឆ្នាំ ២០២១។
ជាមួយក្ដីស្រមៃចង់ក្លាយជាសកម្មជនការពារស្ដ្រី និងកុមារ យុវតីកូនកាត់ខ្មែរ-បារាំង វ័យ ២៤ ឆ្នាំរូបនេះ មិនធ្លាប់គិតប៉ងកាន់ជក់គូរគំនូរអ្វីឡើយ។ លុះដល់ឆ្នាំ ២០១៦ ជាវេលាគ្រប់យ៉ាងដែលបានផ្លាស់ប្ដូរជីវិតដ៏ស្រស់បំព្រងទៅជាអាប់អួ នៅពេលដឹងថា ខ្លួនកើតជំងឺមហារីក។
កញ្ញា អាដាណា បានប្រាប់ភ្នំពេញ ប៉ុស្ដិ៍ ថា៖ «ក្នុងវ័យ ២១ ឆ្នាំ ដែលខ្ញុំទើបតែចាប់ផ្ដើមជីវិត ខ្ញុំបែរជាត្រូវប្រឈមមុខនឹងការស្លាប់ខ្លួនឯង។ រយៈពេល ២ ខែ ខ្ញុំត្រូវសម្រាកព្យាបាលនៅមន្ទីរពេទ្យ ហើយ ៦ ខែ មិនត្រូវបានអនុញ្ញាតឱ្យចេញក្រៅ។ សរុបមករយៈពេលជិត ១ ឆ្នាំ ដែលខ្ញុំសឹងតែនៅម្នាក់ឯងគ្រប់ពេល»។
កញ្ញាបន្ដថា៖ «វាបានបង្រៀនខ្ញុំជាច្រើន។ ខ្ញុំចាប់ផ្ដើមពិចារណាផ្លូវដែលខ្ញុំត្រូវដើរ។ វាជាដំណើរខាងព្រលឹងវិញ្ញាណ ការតាំងសមាធិ ដែលបង្រៀនខ្ញុំឱ្យរឹងមាំ និងអត់ធ្មត់ យល់ពីតួនាទីដែលខ្ញុំអាចផ្ដល់ដល់សង្គម។ ចាប់ពីពេលនោះ ខ្ញុំក៏ចាប់ផ្ដើមគូរ»។
កញ្ញា អាដាណា បង្ហាញគំនូរដល់រដ្ឋមន្ដ្រីក្រសួងវប្បធម៌ និងវិចិត្រសិល្បៈ។ ហ៊ាន រង្សី
បន្ទាប់ពីបានទទួលការព្យាបាល អាដាណា បានធ្វើដំណើរទៅទីក្រុងញូវយ៉ក និងរៀបចំការតាំងពិព័រណ៍គំនូរជាលើកដំបូងក្នុងឆ្នាំ ២០១៨ រួចទៅទីក្រុងផ្សេងទៀត ដូចជា ស៊ីដនី ប៉ារីស ប្រ៊ុចសែល បាងកក និងវិលមកភ្នំពេញ និងសៀមរាប។
ជាង ២ ឆ្នាំកន្លងមកនេះ ស្នាដៃគំនូរក្នុងពិព័រណ៍ សុទ្ធតែជាការចែករំលែកពីខ្សែជីវិតរបស់ខ្លួនផ្ទាល់ និងមេរៀនជីវិតដែលទទួលបានពេលប្រយុទ្ធប្រឆាំងនឹងជំងឺមហារីក។ ប៉ុន្ដែរយៈកាលក្រោយនេះ ទាំងគំនូរ និងការចែករំលែកបានផ្លាស់ប្ដូរយ៉ាងខ្លាំង។
អាដាណា ដែលមានឪពុកម្ដាយជាស្ថាបនិកអង្គការប្រឆាំងការជួញដូរមនុស្សមួយ បានឱ្យដឹងថា៖ «កាលមុន ខ្ញុំតែងគូររូបមនុស្សស្រីគ្មានមុខ គ្មានសក់ ពណ៌ស្រអាប់ៗ ព្រោះវាបញ្ចេញពីភាពឈឺចាប់ខ្ញុំជួបប្រទះ។ តែបន្ទាប់ពីខ្ញុំបានរៀនចិត្តវិទ្យា ៩ ខែ វាបានរំដោះខ្ញុំឱ្យមានសេរីភាពពីអតីតកាលរបស់ខ្ញុំ។ ហេតុនេះគំនូរហាក់បញ្ជាក់ពីផ្នែករីករាយនៃជីវិតខ្ញុំ។ វាមានពណ៌ចម្រុះ ស្រ្តីមានសក់ មានមុខ ជាពិសេស ប្រធានបទនេះ ជាអ្វីដែលសង្គមកំពុងប្រឈម»។
យុវតីរូបនេះអះអាងថា ខ្លួនមិនធ្លាប់ឆ្លងកាត់ការសិក្សាជំនាញសិល្បៈផ្នែកគំនូរនេះឡើយ ហើយអ្វីដែលកញ្ញាជួបការលំបាក គឺផ្នែកទិចនិកនៃគំនូរ និងភាពច្នៃប្រឌិតដែលវិចិត្រករនីមួយៗគូរចេញពីរឿងរ៉ាវផ្ទាល់ខ្លួន។
កញ្ញានិយាយថា៖ «សម្រាប់សិល្បៈនៃការគូររបស់ខ្ញុំ គឺមិនសង្កត់ធ្ងន់លើភាពស្រស់ស្អាតទេ។ តាមពិត ខ្ញុំចង់ផ្ដោតលើគោលដៅនៃការចែករំលែក។ ហេតុនេះខ្ញុំចំណាយពេលលើផ្ទាំងគំនូរនីមួយៗយូរណាស់»។
យុវតីកូនកាត់រាងខ្ពស់ស្រឡះរូបនេះ បានប្រើវិធីសាស្ដ្រគំនូររូបផ្គុំពីធរណីមាត្រ ពីព្រោះកញ្ញាយល់ថា នៅលើភពផែនដីនេះសុទ្ធតែបណ្ដុំនៃទម្រង់ធរណីមាត្រ។
ក្នុងទឹកមុខស្រស់ញញឹមដ៏រួសរាយរាក់ទាក់ កញ្ញា អាដាណា បញ្ជាក់ថា៖ «តាមរយៈសិល្បៈរបស់ខ្ញុំ ទាំងសុន្ទរកថា ទាំងប្រធានបទ និងទស្សនៈ ខ្ញុំសង្ឃឹមថា ពួកគាត់ទទួលបាននូវសារដែលខ្ញុំចែករំលែក។ វាដូចជាការដាស់តឿនទៅអ្នកជំនាន់ក្រោយឱ្យដឹងពីអ្វីដែលកើតឡើងនៅជុំវិញពិភពលោក និងយល់ពីតួនាទីរបស់ខ្លួននៅក្នុងសហគមន៍ និងប្រទេសជាតិ»។
ភ្ញៀវចូលទស្សនាពិព័រណ៍ Complementarity នៅ Rosewood។ ហ៊ាន រង្សី
វិចិត្រការិនីដែលព្យាយាមសិក្សាអំពីគំនូរដោយខ្លួនឯងរូបនេះ ចាប់ផ្ដើមគូរដោយមើលទៅលើសារដែលខ្លះចង់ចែករំលែក តាមរយៈការស្រាវជ្រាវរកទស្សនៈវិទ្យា និងអានឯកសារជាច្រើនរហូតទាល់តែប្រាកដថា កញ្ញាមានចំណេះដឹងគ្រប់គ្រាន់ ទើបចាប់ផ្ដើមកាន់ជក់គូរ។ ជាក់ស្ដែង កញ្ញាត្រូវការពេលវេលាស្រាវជ្រាវជាច្រើនខែ និងចំណាយពេល ៤ ថ្ងៃសម្រាប់គំនូរ ១ ផ្ទាំង។
ឈរក្បែរគំនូរ ១ ផ្ទាំងធំរាងការ៉េ កញ្ញា អាដាណា បានប្រាប់ថា៖ «រូបដែលខ្ញុំពេញចិត្តជាងគេ គឺរូបមានពណ៌ខៀវច្រើន និងមនុស្សស្រីក្នុងនោះ។ រូបគំនូរនេះ ពេលដែលខ្ញុំគូរ ខ្ញុំយំខ្លាំងណាស់។ តែបើនិយាយត្រង់ គឺខ្ញុំយំសឹងតែគ្រប់ពេល ដោយខ្លះយំទាំងចិត្ដអំណរ ហើយខ្លះយំដោយភាពឈឺចាប់»។
កញ្ញាបន្ថែមថា៖ «រូបនេះ ខ្ញុំជូនដល់ម៉ាក់ខ្ញុំជាពិសេស ព្រោះវាធ្វើឱ្យខ្ញុំនឹកឃើញពេលដែលខ្ញុំជាយុវវ័យ។ ខ្ញុំធ្វើឱ្យគាត់មិនសប្បាយចិត្តជាច្រើន។ ហេតុនេះវាហាក់បញ្ជាក់ពីការអត់ទោសសម្រាប់ខ្ញុំខ្លួនឯង និងម៉ាក់។ វាក៏បានធ្វើឱ្យខ្ញុំចងចាំថា ពេលវេលាដើរលឿនណាស់។ ដូច្នេះខ្ញុំត្រូវតែឱបក្រសោបគ្រប់នាទីដែលខ្ញុំមានជាមួយមនុស្សដែលខ្ញុំស្រឡាញ់»។
ជាមួយតម្លៃចាប់ពី ២ ៥០០ ដល់ ៤ ៥០០ ដុល្លារ កញ្ញា អាដាណា បានឱ្យដឹងថា តម្លៃនេះមិនមែនកញ្ញាចេះតែដាក់នោះទេ តែវាជានីតិវិធីនៃពាណិជ្ជកម្មគំនូរ។
ដោយសារតែនៅក្រុងញូវយ៉ក និងការតាំងពិព័រណ៍តាមបណ្ដាទីក្រុងដទៃទៀត កញ្ញាបានលក់គំនូរមួយចំនួន ទើបតម្លៃត្រូវតែកើនឡើងជានិច្ច បើមិនចង់ឱ្យខូចតម្លៃ។
ពិព័រណ៍ «Complementarity» នៅវិចិត្រសាល Rosewood បើកទ្វាររៀងរាល់ថ្ងៃ ហើយភ្ញៀវអាចចូលទស្សនាដោយសេរី។
ចំពោះព័ត៌មានបន្ថែម សូមចូលទៅកាន់ទំព័រហ្វេសប៊ុករបស់កញ្ញា អាដាណា @adana.titi និង @RosewoodPhnomPenh៕
