.jpg)
ស្នាដៃថ្មីស្តីពីបញ្ហាបរិស្ថានព្រៃឈើរងបាតុភូតឡើងកម្តៅនៃភពផែនដី។ រូបថត សហការី
ភ្នំពេញ៖ បណ្តុំស្នាដៃគំនូរសហសម័យ ១៥ ផ្ទាំង ដែលមានអត្ថន័យឆ្លុះបញ្ចាំងពីបញ្ហាបរិស្ថានក្នុងប្រទេសកម្ពុជា វិចិត្រករវ័យ ៣១ ឆ្នាំ លោក ម៉ិល ចាន់ក្រឹម នឹងបើកសម្ពោធតាំងពិព័រណ៍នៅថ្ងៃទី ១៩ ខែ កុម្ភៈ ឆ្នាំ ២០២១ នៅឯវិចិត្រសាល Pi-Pet-Pi Gallery ក្នុងរាជធានីភ្នំពេញ។ ខណៈពិព័រណ៍ស្នាដៃគំនូរទោលរបស់វិចិត្រករ ម៉ិល ចាន់ក្រឹម លើកនេះ ជារបត់គំនិតថ្មីរបស់លោកផងដែរ ដោយមានចំណងជើងថា «ឈុតឆាក និងទេសភាព Scenes & Sceneries»។
លោក ម៉ិល ចាន់ក្រឹម វ័យ ៣១ ឆ្នាំ ជាវិចិត្រករសហសម័យ ១ រូប មានប្រវត្តិពីកុមារាធ្លាប់ចាកចេញទៅធ្វើការជាពលករនៅប្រទេសថៃ ដោយខ្លួនមានស្រុកកំណើតនៅឃុំភ្នំដី ស្រុកភ្នំស្រុក ខេត្តបន្ទាយមានជ័យ និងមានអតីតកាលក្នុងសង្គមគ្រួសារ ដែលពោរពេញដោយភាពសោកសៅ និងដិតដាមក្នុងអារម្មណ៍។
លោក ចាន់ក្រឹម មិនត្រឹមតែធ្លាប់ជាក្មេងត្រូវឪពុកម្តាយទុកចោល មិនរវល់ថែកាលពីក្មេង ខ្សែជីវិតរស់នៅ ប្រៀបដូចជាសេវាលជាតិ (ចក) រសាត់កណ្តាលផ្ទៃជលសាតែប៉ុណ្ណោះ ថែមទាំងក្លាយជាកូនកំព្រានៅវ័យ ១៣ ឆ្នាំ និងធ្វើចំណាកស្រុកទៅធ្វើការនៅថៃក្នុងវ័យនេះទៀត។
លុះដល់វ័យ ១៤ ឆ្នាំ ទទួលបានការបណ្តុះបណ្តាលជំនាញគំនូរពីមជ្ឈមណ្ឌលកុមារកំព្រាកុមាររីករាយ ឬ KMR និងចូលរៀននៅសាលាហ្វារពន្លឺសិល្បៈនៅឆ្នាំ ២០០៦ និងបញ្ចប់ជំនាញសិល្បៈសូនរូបឆ្នាំ ២០១៣ ហើយក៏ចាប់អាជីពពីពេលនោះមក។
សា្នដៃថ្មីវិចិត្រករ ម៉ិល ចាន់ក្រឹម ក្រោមប្រធានបទ«ឈុតឆាក និងទេសភាព»។ សហការី
កាលពីដើមឆ្នាំ ២០២០ លោកបានរៀបចំតាំងពិព័រណ៍នៅឯវិចិត្រសាលជនបទ (Romcheik 5 Studio) នៅខេត្តបាត់ដំបង ដោយបណ្តុំស្នាដៃគំនូរបែបសហសម័យ ដែលអត្ថន័យឆ្លុះបញ្ចាំងពីបញ្ហាសង្គមជាច្រើនដូចជាស្នាដៃមានចំណងជើងថា «Caring 3 eras» ស្នាដៃឈ្មោះថា «The Market» ស្នាដៃឈ្មោះ «Heart & Brain» ស្នាដៃឈ្មោះ «Drought» ស្នាដៃឈ្មោះ «Couple & Family» ជាដើម ដែលសុទ្ធតែជាស្នាដៃរបស់វិចិត្រករ ម៉ិល ចាន់ក្រឹម បង្កើតជាគោលដៅបរិយាយពីបញ្ហាសង្គម។
តែសម្រាប់ដើមឆ្នាំ ២០២១ នេះវិញ វិចិត្រករលោក ម៉ិល ចាន់ក្រឹម ហាក់មានរបត់គំនិតថ្មីក្នុងការបង្កើតស្នាដៃគំនូរបែបឆ្លុះបញ្ចាំងពីបញ្ហាបរិស្ថានដែលមានដូចជាការបំផ្លាញព្រៃឈើ បញ្ហាអាកាសធាតុប្រែប្រួល និងការកើនឡើងកម្ដៅនៃភពផែនដីជាដើម ខណៈវិចិត្រករចង់ប្រើស្នាដៃថ្មីនេះធ្វើជាសារមួយក្រើនរំឭកដល់សាធារណជនខ្មែរឱ្យងាកមកស្រឡាញ់បរិស្ថានវិញ ដោយបញ្ឈប់ការបំផ្លាញព្រៃឈើ និងចូលរួមទាំងអស់គ្នាដាំដើមឈើ ដើម្បីធ្វើឱ្យបរិស្ថានល្អស្អាត។
វិចិត្រករលោក ម៉ិល ចាន់ក្រឹម ក្នុងការតាំងពិព័រណ៍ស្នាដៃកន្លងមក។ រូបថត សហការី
វិចិត្រករ ម៉ិល ចាន់ក្រឹម បញ្ជាក់ពីស្នាដៃជារបត់គំនិតថ្មីនេះថា៖ «ពេលខ្ញុំគូររូបពីទេសភាពធម្មជាតិ ដែលមានព្រៃឈើលាយឡំគ្នានឹងការរស់នៅរបស់មនុស្ស ខ្ញុំចង់ភ្ជាប់ពីបញ្ហារវាងមនុស្ស និងធម្មជាតិ ជាពិសេសបញ្ហាបរិស្ថានតែម្តង។ ជាចម្បងនោះ គឺការកាប់បំផ្លាញព្រៃឈើ វាបណ្តាលឱ្យមានគ្រោះមហន្តរាយច្រើនសម្រាប់ជីវិតមនុស្ស និងសត្វ ហើយក៏ជាចំណែកមួយបង្កើតឱ្យមានការកើនឡើងកម្តៅនៃផែនដីផងដែរ ប្រសិនបើនៅតែបន្តកាប់បំផ្លាញព្រៃឈើ។ ដូច្នេះតាមរយៈគំនូររបស់ខ្ញុំនេះ ក៏ចង់ផ្ញើសារសម្រាប់បងប្អូនខ្មែរទាំងអស់ មេត្តាបញ្ឈប់ការបំផ្លាញព្រៃឈើ ហើយនាំគ្នាដាំដើមឈើវិញ ដើម្បីទទួលបាននូវភាពល្អប្រសើរសម្រាប់ជីវិត»។
ពិព័រណ៍ស្នាដៃគំនូរស្តីពី «ឈុតឆាក និងទេសភាព» ទាំង ១៥ ផ្ទាំង របស់វិចិត្រករ ម៉ិល ចាន់ក្រឹម ចាប់ផ្តើមសម្ពោធនៅថ្ងៃសុក្រ ទី ១៩ ខែ កុម្ភៈ ឆ្នាំ ២០២១ និងដាក់តាំងបន្តរហូតដល់ថ្ងៃទី ២៨ ខែ មីនា ឆ្នាំ ២០២១។
ចំពោះស្នាដៃគំនូរទាំង ១៥ ផ្ទាំង នោះមានទំហំទាំងតូច និងទាំងធំ ខណៈទំហំតូចៗ ១ ផ្ទាំង មានតម្លៃចន្លោះ ៤០០ ដុល្លារ ទៅ ៥០០ ដុល្លារ និងទំហំធំៗ ១ ផ្ទាំងមានតម្លៃចន្លោះពី ១ ០០០ ដុល្លារ រហូតដល់ ១ ២០០ ដុល្លារ៕
