.jpg)
ពិព័រណ៍ផ្សារបារាំងមានស្ដង់ផលិតផលចំនួន ៥៤ និងសកម្មភាពកម្សាន្ត រួមទាំងការប្រគំតន្ត្រី។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ ពិព័រណ៍ផ្សារបារាំងដំបូងដែលបានធ្វើឡើងនៅថ្ងៃទី ៣០ ខែមីនានៅស្ថានទូតបារាំងប្រចាំនៅកម្ពុជាបានបើកឲ្យមហាជនចូលទស្សនាសេរីចាប់ពីម៉ោង ៩ ព្រឹករហូតដល់ម៉ោង ៦ ល្ងាចដោយទទួលបានភ្ញៀវជាតិ និងអន្តរជាតិប្រមាណ ៧ ពាន់នាក់ជាចំនួនលើសពីការរំពឹងទុកត្រឹមតែ ៣ ពាន់នាក់។
អ្នករៀបចំកម្មវិធីតាំងពិព័រណ៍ផ្សារបារាំងកញ្ញា Maimoun Soukeina វ័យ ២៣ ឆ្នាំបានប្រាប់ឲ្យភ្នំពេញ ប៉ុស្តិ៍ ដឹងថា៖ «នេះជាកម្មវិធីមួយដែលធ្វើឡើងដើម្បីលើកកម្ពស់វប្បធម៌បារាំង និងអ្វីគ្រប់យ៉ាងដែលបារាំងផលិតនៅកម្ពុជា។ យើងបានសហការជាមួយស្ថានទូតបារាំង និងវិទ្យាស្ថានបារាំងនៅកម្ពុជា ដើម្បីរៀបចំកម្មវិធីនេះ។ ខ្ញុំអរគុណអ្នកគ្រប់គ្នាដែលបានចូលរួមនៅទីនេះទាំងប្រជាជនកម្ពុជា និងជនបរទេសទាំងអស់»។
ព្រឹត្តិការណ៍តាំងពិព័រណ៍ផ្សារបារាំងនេះមានស្តង់តាំងបង្ហាញផលិតផលបារាំងសរុបចំនួន ៥៤ មានស្តង់គំនូរសម្លៀកបំពាក់ វត្ថុអនុស្សាវរីយ៍ សៀវភៅ របស់ក្មេងលេង រថយន្តផលិតផលបច្ចេកវិទ្យា និងអាហារ ស្រា ម៉ាស៊ីនទំនើប។
ក្រៅពីស្ដង់ផលិតផលនៅមានសកម្មភាពកម្សាន្តដទៃទៀតដូចជាការលេងល្បែងកម្សាន្តវាយប៉េងប៉ុង បាញ់ស៊ីប និងមានការប្រគំតន្ត្រីសម្រាប់អ្នកចូលរួមរាំលេងកម្សាន្តផងដែរ។ ទន្ទឹមនឹងនេះអ្នកចូលរួមការតាំងពិព័រណ៍ក៏អាចទស្សនានូវទេសភាពប្លែកភ្នែកពោរពេញដោយស្មៅ និងរុក្ខជាតិធំៗពណ៌បៃតងគួរជាទីមនោរម្យក្នុងបរិវេនស្ថានទូតបារាំង និងថតរូបទុកជាអនុស្សាវរីយ៍។
ភ្ញៀវញ៉ាំអាហារ និងស្ដាប់តន្ត្រីក្នុងបរិវេណស្ថានទូត។ រូបថត យូសុះ អាប់ឌុលរ៉ាស់ហ៊ីម
ម្ចាស់ហាង Enginou លក់វត្ថុក្មេងលេងដែលនាំចូលមកពីបារាំងកញ្ញា គង់ លក្ខិណា បានឲ្យដឹងថា៖ « ខ្ញុំពិតជាសប្បាយចិត្តមែនទែនដែលគាត់បើកឲ្យប្រជាជនខ្មែរចូលរួមដោយសារតែ ហ្វ្រិន (France) ហ្នឹងគាត់អត់ដែលបើកឲ្យទូលំទូលាយឲ្យមនុស្សចូលមកទស្សនាអ៊ីចឹងទេ។ ថ្ងៃនេះឃើញថាមានមនុស្សមកចូលរួមច្រើនមែនទែន ឃើញថាមានអ្នកគាត់ចាប់អារម្មណ៍ច្រើនលក់ដាច់»។
ទន្ទឹមនឹងនេះកញ្ញា ហាន ស្រីមុំ អាយុ ២៦ ឆ្នាំដែលមកចូលរួមកម្មវិធីនេះជាមួយមិត្តភក្តិបានបញ្ជាក់ថា៖ «ខ្ញុំមកនេះគោលបំណងទី ១ មកមើលផលិតផលដែលគេដាក់តាំងមានដូចជាទឹកអប់ រូបគំនូរ សម្លៀកបំពាក់អីផ្សេងៗមានចំណីអាហារអីផ្សេងៗ ខ្ញុំបានចូលញាំអាហារបែបស្នេក (snack អាហារសម្រន់) តិចតួច និងដើរលម្ហែកម្សាន្តព្រោះគេរៀបចំបានស្អាតខ្ញុំសប្បាយរីករាយហើយក៏ទទួលបានបទពិសោធថ្មីៗច្រើន»។
ដោយឡែកយុវជន កៅ ស៊ិនឆុង អាយុ ២២ ឆ្នាំដែលធ្លាប់បានចូលស្ថានទូតបារាំងចំនួន ២ ដងរួចមកហើយបានប្រាប់ថា លោកមានអារម្មណ៍ប្លែកព្រោះកន្លងទៅស្ថានទូតបារាំងបើកឲ្យប្រជាជនចូលទស្សនាទិដ្ឋភាពបរិវេណស្ថានទូតប៉ុណ្ណោះមិនមានការតាំងពិព័រណ៍លក់ផលិតផលអ្វីឡើយ។ ម្យ៉ាងទៀតនៅពេលនេះមានអ្នកចូលរួមច្រើនជាងបណ្តាឆ្នាំមុន។
យុវជនអាយុ ២២ ឆ្នាំរូបនេះបានសំណូមពរទៀតថា៖ «ចំពោះខ្ញុំផ្ទាល់ចង់ឲ្យមានតាំងពិព័រណ៍បែបនេះទៀត ព្រោះការធ្វើបែបនេះជាការបង្កើតទំនាក់ទំនងបារាំង និងកម្ពុជាហើយធ្វើឲ្យប្រជាជនខ្មែរងាកមកចាប់អារម្មណ៍លើភាសាបារាំង និងប្រទេសបារាំងកាន់តែច្រើន»៕
វីដេអូ៖
