.jpg)
ស្នាដៃរូបថតចំណងជើងថា Musas Muxe ពីប្រទេសម៉ិកស៊ិក។ រូបថត Nelson Morales
សៀមរាប៖ ព្រឹត្តិការណ៍រូបថតអន្តរជាតិដែលមានអាយុកាលដ៏វែងបំផុតមួយ «កម្មវិធីសិក្ខាសាលា និងពិព័រណ៍រូបថតអង្គរ» នឹងប្រារព្ធធ្វើឡើងលើកទី១៦ នៅទឹកដីសៀមរាបអង្គរ ចាប់ពីថ្ងៃទី ២១ ដល់ថ្ងៃទី ២៩ ខែវិច្ឆិកា ដោយផ្ដោតសំខាន់លើការបណ្ដុះបណ្ដាលធនធានអ្នកថតរូប និងវីដេអូក្នុងស្រុក ហើយបន្តផ្សព្វផ្សាយស្នាដៃ និងសំឡេងរបស់អ្នកថតរូបអន្តរជាតិនៅទ្វីបអាស៊ី។
ដោយសារតែវិបត្តិកូវីដ ឆ្នាំនេះអ្នករៀបចំកម្មវិធីមានការខកចិត្តជាខ្លាំងក្នុងការប្រកាសនូវសេចក្ដីសម្រេចលុបចោលសិក្ខាសាលារូបថតអង្គរ ដោយសារតែកត្តាសុវត្ថិភាពសុខភាព និងឧបសគ្គក្នុងការនាំយកអ្នកថតរូប ៣៥៩ នាក់ ពីបណ្ដាប្រទេសនានាទូទាំងទ្វីបអាស៊ី មកកាន់កម្ពុជា។
ស្នាដៃពីឥណ្ឌា Fragile Fragments។ រូបថត Vinita Barretto
ស្នាដៃឈ្មោះ Times Like This ពីឥណ្ឌូនេស៊ី។ រូបថត Atikah Zata
នាយកកម្មវិធីសិក្ខាសាលា និង ពិព័រណ៍រូបថតអង្គរ អ្នកនាង ជេស៊ីកា លីម បានឱ្យដឹងថា៖ «មិនខុសពីព្រឹត្តិការណ៍សិល្បៈ និងវប្បធម៌ទូទាំងពិភពលោកនោះទេ គឺយើងបានសម្របតាមការរឹតបន្តឹងការធ្វើដំណើរ និងគិតគូរពីបញ្ហាសុខភាព សុវត្ថិភាពអ្នកចូលរួម និងសហគមន៍ដែលយើងរស់នៅជាចម្បងបំផុត»។
អ្នកនាងបានបន្តទៀតថា៖ «វាពិតជាកត្តាប្រឈមដ៏ធំមួយសម្រាប់ឆ្នាំនេះ ប៉ុន្តែវាក៏បាននាំផ្លូវឱ្យយើងទៅកាន់ឱកាសថ្មីក្នុងការផ្ដួចផ្ដើមអ្វីដែលថ្មីខុសពីឆ្នាំមុនៗ ហើយយើងសង្ឃឹមថា ការផ្ដួចផ្ដើមថ្មីនេះនឹងបន្តអចិន្រៃ្ទយ៍នៅឆ្នាំក្រោយៗទៀត»។
យ៉ាងណាមិញ វគ្គសិក្ខាសាលារូបថតនិទានកថា និងវីដេអូឯកសារសម្រាប់អ្នកជំនាញនឹងត្រូវធ្វើឡើងជាលើកដំបូងសម្រាប់តែជនជាតិខ្មែរជាមួយកាលបរិច្ឆេទចាប់ពីថ្ងៃទី ២១ ដល់ថ្ងៃទី ២៧ ខែវិច្ឆិកា។
គ្រប់កម្មវិធីទាំងអស់របស់សិក្ខាសាលានឹងត្រូវអនុវត្តតាមការណែនាំរបស់ក្រសួងសុខាភិបាល។
សិក្ខាកាមក្នុងស្រុកចំនួន ១៥ នាក់ ត្រូវបានជ្រើសរើសផ្ដល់ការបង្វឹកជាមួយគ្រូ ៦ នាក់ នៅខេត្តសៀមរាប ដើម្បីអភិវឌ្ឍជំនាញនិទានរឿងតាមរយៈការថតរូប និងវីដេអូ។
គ្រូបង្រៀនទាំង ៦ រូបជាជនជាតិខ្មែរ ដែលសុទ្ធសឹងតែមានបទពិសោធជោកជាំលើវិស័យខ្សែភាពយន្ត និងរូបថត។ រូបថត សហការី
គ្រូបង្រៀនទាំង ៦ រូប រួមមាន៖ លោក ណារិន សៅបូរិន គម្រោងខ្សែភាពយន្តខ្នាតខ្លី និងវែង ឱ្យអង្គការក្នុង និងក្រៅស្រុក អ្នកនាង គឹម សោភា មានបទពិសោធក្នុងខ្សែភាពយន្តអន្តរជាតិ និងហូលីវូដ រួមទាំងវណ្ណកម្មរបស់ អេនជេលីណា ជោលី ថតនៅកម្ពុជា អ្នកនាង នាក់ សុផល អ្នកជំនាញថតរូបធ្លាប់ចូលរួមមហោស្រពរូបថតអន្តរជាតិនៅអាស៊ី និងអឺរ៉ុប លោក ច័ន្ទ វិត្ថារិន្ទ សាស្រ្ដាចារ្យផ្នែកថតរូប និងគំនូរ លោក រួន រី ជាអ្នកថតរូបឯកសារខ្មែរលើបញ្ហាសង្គម និងបរិស្ថាន និងលោក មាន លុជ្យ អតីតសិក្ខាកាមពិព័រណ៍រូបថតអង្គរឆ្នាំ ២០១៨ ដែលបាននិងកំពុងចងក្រងស្នាដៃក្នុងការបោះពុម្ពសៀវភៅ។
សម្រាប់ពិព័រណ៍រូបថតអង្គរដែលនឹងបើកទ្វារសាធារណជនចាប់ពីថ្ងៃទី ២៦ ដល់ថ្ងៃទី ២៩ ខែវិច្ឆិកា ដោយតាំងបង្ហាញនូវស្នាដៃរូបថតមកពីទូទាំងពិភពលោករបស់អ្នកថតរូបសិល្បៈចំនួន ៦៥ នាក់៕
