ភ្នំពេញៈ រូបថតប៉ុន្មានសន្លឹករបស់ជាងថតរូបឆ្នើមជើងចាស់លោក ម៉ក់ រ៉េមីស្សា ដែលដាក់ចំណងជើង «ពីការប្រមាញ់ទៅជាការថតរូប» នឹងត្រូវដាក់តាំងបង្ហាញនៅក្នុងវិចិត្រសាលស្លឹករឹតនៃបរិវេណរបស់វិទ្យាស្ថានជាតិអប់រំ ថ្ងៃបើកសម្ពោធមហោស្រពរូបថតភ្នំពេញលើកទី ៩ នាថ្ងៃទី ៥ ខែតុលា ឆ្នាំ ២០១៨ ខាងមុខនេះ។
បណ្តុំរូបទាំងនោះ ត្រូវអ្នកថតឆ្នើមរបស់ទីភ្នាក់ងារព័ត៌មាន EPA រយៈពេល ១២ ឆ្នាំ និងអតីតនៅសារព័ត៌មានបារាំង Cambodge Soir ចំនួន ១០ ឆ្នាំ លោក ម៉ក់ រ៉េមីស្សា បញ្ជាក់ពីចំណាប់អារម្មណ៍ផ្ទាល់តាំងពីក្មេងថា៖ «កាលពីនៅក្មេងខ្ញុំចូលចិត្តបាញ់សត្វខ្លាំងណាស់ដោយប្រើចម្ពាមកៅស៊ូជាមួយគ្រាប់លញ់ធ្វើពីដីឥដ្ឋ ដោយមិនចាប់អារម្មណ៍ពីការបំផ្លិចបំផ្លាញជីវិតសត្វព្រៃទាំងឡាយនោះទេហើយគ្រាន់តែមានមោទនភាពនឹងការបាញ់សត្វដៃត្រង់របស់ខ្ញុំតែប៉ុណ្ណោះ។
ក្រោយពីខ្ញុំបានស្វែងយល់ពីសារៈសំខាន់នែសត្វព្រៃគ្រប់ប្រភេទឃើញថា ពួកវាក៏មានមនោសញ្ចេតនាស្រឡាញ់ក្រុមគ្រួសារកូនចៅនិងសហគមន៍របស់ពួកវា គឺដូចជាមនុស្សយើងដែរ ដូច្នេះយើងគួរតែនាំគ្នាថែរក្សាអភិរក្សសត្វព្រៃទាំងនោះកុំឲ្យបាត់បង់»។
លោកក៏បានបកស្រាយពីការដាក់ប្រធានបទនៃពិព័រណ៍រូបថតដែរថា៖ «ហេតុដូចនេះហើយ ស្នាដៃរូបថតសិល្បៈពីការប្រមាញ់ទៅជាការថតរូប (From Hunting to Shooting) បង្កើតឡើងដើម្បីចូលរួមចំណែកធ្វើឲ្យមានការផ្លាស់ប្តូរទម្លាប់មួយនៅក្នុងប្រទេសយើងក្នុងការឈប់សម្លាប់សត្វព្រៃធ្វើជាម្ហូបអាហារឬក៏ជួញដូរនិងនាំគ្នាបញ្ឈប់បរិភោគសត្វព្រៃគ្រប់ប្រភេទផ្ដើមចេញពីយើងម្នាក់។ យើងត្រូវថែរក្សាការពារធនធានធម្មជាតិដែលមាននៅសេសសល់ក្នុងប្រទេសទាំងប៉ុន្មានសម្រាប់ទុកឲ្យអ្នកជំនាន់ក្រោយរបស់យើងទាំងអស់គ្នាពីព្រោះវាមិនទាន់យឺតពេលនៅឡើយនោះទេ»។
អ្នកថតរូបជើងចាស់រូបនេះ (លោក ម៉ក់ រ៉េមីស្សា) កើតនៅថ្ងៃទី ៥ ខែកញ្ញា ឆ្នាំ ១៩៧០ បន្ទាប់ពីទទួលបានការសិក្សានៅសាកលវិទ្យាល័យភូមិន្ទវិចិត្រសិល្បៈនៅក្នុងរាជធានីភ្នំពេញ ក៏ចាប់អាជីពជាអ្នកថតផង និងសិល្បកររូបភាពផង។ កាលរៀនលោកសិក្សាពីជំនាញវិចិត្រកម្ម និងការថតរូបលោកបានក្លាយជាអ្នកថតរូបឯករាជ្យម្នាក់។
លោក ម៉ក់ រ៉េមីស្សា បានធ្វើការជាអ្នកថតរូបឲ្យកាសែតបារាំង Cambodge Soir នៅឆ្នាំ ១៩៩៧ ហើយបន្ទាប់មក គឺនៅឆ្នាំ ២០០៦ លោកបានមកធ្វើការជាអ្នកថតរូបឲ្យ សារព័ត៌មានផ្សេងគឺជាទីភ្នាក់ងារ (EPA) រហូតមកដល់សព្វថ្ងែ។ ក្រៅពីការងាររបស់លោកក្នុងនាមជាអ្នកកាសែត និងជាសិល្បករផងនោះបានបង្កើតស្នាដៃផ្ទាល់ខ្លួនជាបន្តបន្ទាប់មួយចំនួនជាប្រភេទខ្សែរឿងនិទានទស្សនវិស័យតូចៗនៅក្នុងរូបភាពដែលប្រកបទៅដោយគុណភាពជាមួយនឹងការលាយពណ៌ផ្សេងៗគឺមានលក្ខណៈដ៏ល្អប្រណីតពីស្នាដៃរបស់លោកតែម្តង៕