ភ្នំពេញ: ពិព័រណ៍ STYLE Bangkok ដែលជាឱកាសជំនួបយ៉ាងពិសេសរវាងអ្នកលក់ អ្នកទិញ អ្នកឌីហ្សាញ អ្នករចនាម៉ូដផ្ទៃក្នុង អ្នកជំនួញផ្នែកអចលនទ្រព្យ ជាពិសេសអ្នកនិយមផលិតផលហ្វាសសិនគ្រប់ប្រភេទស្ដីពីម៉ូដម៉ាកច្នៃប្រឌិតថ្មីៗចុងក្រោយបំផុតត្រូវបានរៀបចំឡើងក្នុងក្រុងបាងកកនៅមជ្ឈមណ្ឌលពិព័រណ៍ និងពាណិជ្ជកម្មអន្ដរជាតិ (Bitec) នៅពាក់កណ្ដាលខែមេសា។
ក្រោមប្រធានបទឆ្នាំនេះ «Crenovative Origin» ជំនួបរវាងភាពច្នៃប្រឌិត នវានុវត្ដភាព និងភាពវិសេស STYLE Bangkok ដែលច្របាច់ពិព័រណ៍ពាណិជ្ជកម្មផលិតផលចំនួន ៣ បញ្ចូលគ្នានឹងបង្ហាញពីផលិតផលសម្រាប់ប្រើប្រាស់ប្រចាំថ្ងៃគ្រប់ប្រភេទចាប់ពីហ្វាសសិន និងសម្លៀកបំពាក់ កាដូ គ្រឿងសង្ហារិម និងសម្ភារតុបតែងជាដើម។
អ្នកស្រី វ៉ាន់ណាផន កេទូដាត អគ្គនាយករងនៃនាយកដ្ឋានផ្សព្វផ្សាយពាណិជ្ជកម្មអន្ដរជាតិ (DITP) របស់ក្រសួងពាណិជ្ជកម្មថៃដែលបានរៀបចំព្រឹត្ដិការណ៍ពិព័រណ៍នេះបានថ្លែងថា៖ «STYLE Bangkok បានបញ្ចូលកម្មវិធីទាំង ៣ រួមគ្នាតែមួយដូចជា ពិព័រណ៍ហ្វាសសិនអន្ដរជាតិបាងកក និងពិព័រណ៍ស្បែកអន្ដរជាតិបាងកក ឬ BIFF&BIL ពិព័រណ៍កាដូអន្ដរជាតិបាងកក និងពិព័រណ៍សម្ភារផ្ទះសំបែងអន្ដរជាតិបាងកក ឬក៏ BIG+BIH និង ពិព័រណ៍គ្រឿងសង្ហារិមអន្ដរជាតិថៃ ឬ TIFF។ កម្មវិធីទាំងនេះត្រូវបានបង្កើតឡើង និងមានការទទួលស្គាល់ទាំងថ្នាក់ជាតិ និងអន្ដរជាតិ»។
អ្នកស្រីបន្ដថា៖ «វាជាការផ្ដល់ភាពងាយស្រួលដល់ទាំងអ្នកលក់ និងអ្នកទិញនូវគ្រប់ផលិតផលទាំងអស់នៅក្រោមដំបូលតែមួយ មិនថាពួកគេជាអ្នកលក់រាយ ភ្នាក់ងារទិញលក់ អ្នកឌីហ្សាញ អ្នករចនាម៉ូដផ្ទៃក្នុង អ្នកជំនួញផ្នែកអចលនទ្រព្យ ឬក៏អ្នកតំណាងផ្សារទំនើបនានាទាំងនៅក្នុងប្រទេស និងពិភពលោក។ ពិព័រណ៍នេះក៏បានផ្ដល់ឱកាសឲ្យអ្នកតាំងផលិតផលជួបអ្នកទិញ និងអ្នកជំនួញផ្សេងៗទៀត»។
ដោយត្រូវបានចាត់ទុកជាពិព័រណ៍ពាណិជ្ជកម្មផលិតផលហ្វាសសិនប្រចាំតំបន់ធំបំផុតមួយក្នុងទ្វីបអាស៊ីដែលត្រូវបានរៀបចំឡើង ៥ ថ្ងៃ STYLE Bangkok ទំនងជានឹងស្វាគមន៍ភ្ញៀវប្រមាណ ៥ ម៉ឺននាក់មកពីជុំវិញពិភពលោក។
អ្នកស្រី វ៉ាន់ណាផន បានឲ្យដឹងថា៖ «ក្នុងឱកាសនោះនឹងមានអ្នកតាំងបង្ហាញផលិតផល ៨៧៦ ក្រុមហ៊ុន និងស្ដង់ ១៦៨៧ ដោយមានអ្នកចូលរួមប្រមាណ ៥ ម៉ឺននាក់មកពី ៧០ ប្រទេស រួមទាំង តៃវ៉ាន់ កូរ៉េ ជប៉ុន និងបណ្ដាប្រទេសជាប់ព្រំដែនដូចជា កម្ពុជា ឡាវ មីយ៉ាន់ម៉ា និងវៀតណាម»។
អ្នកស្រី វ៉ាន់ណាផន បានប្រាប់ភ្នំពេញប៉ុស្ដិ៍តាមអ៊ីមែលថា៖ «កម្ពុជាដែលនឹងបង្ហាញផលិតផលសិប្បកម្ម វត្ថុកាដូ វាយនភណ្ឌ និងសម្លៀកបំពាក់នឹងធ្វើការដាក់តាំងពិព័រណ៍ក្នុងកម្មវិធី CLMV Pavilion ជាមួយនឹងឡាវ មីយ៉ាន់ម៉ា និងវៀតណាម ដោយមានក្រុមហ៊ុនចំនួន ១០»។
ពិព័រណ៍ STYLE Bangkok នឹងត្រូវបានរៀបចំឡើងចាប់ពីថ្ងៃទី ១៧ ដល់ទី ២១ ខែមេសា ឆ្នាំ ២០១៩ នៅមជ្ឈមណ្ឌលពិព័រណ៍ និងពាណិជ្ជកម្មអន្ដរជាតិ (Bitec)។
កម្មវិធីដោះដូរពាណិជ្ជកម្មត្រូវបានធ្វើឡើងនៅថ្ងៃទី ១៧ ដល់ទី ១៩ ចាប់ពីម៉ោង ១០ ព្រឹកដល់ម៉ោង ៦ ល្ងាច ខណៈកម្មវិធីសម្រាប់មហាជននឹងធ្វើឡើងនៅថ្ងៃចុងសប្ដាហ៍ទី ២០ និងទី ២១ ខែមេសា ពីម៉ោង ១០ ព្រឹកដល់ម៉ោង ៩ យប់។
ព័ត៌មានលម្អិតសូមចូលទៅកាន់វេបសាយ www.stylebangkorfair.com៕