.jpg)
រូបថតម្រាមដៃច្បិចបែប Miguel Jeronimo បែបសិល្បៈ និងរូបគំនូរឌីជីថលនាងវឌ្ឍនាទេវី។ រូបថត សហការី
ភ្នំពេញ៖ យកដៃច្បិចម្រាមដៃមេ និងម្រាមចង្អុល ដែលហាក់បីដូចជាកាយវិការម្រាមដៃផ្កាជ្រុះក្នុងន័យនៃរបាំអប្សរា ស្ដ្រីកម្មកររោងចក្រធ្វើនូវកាយវិការកាន់ម្ជុរដេរ ឬកាន់ក្រណាត់កាត់ស្ទើរតែរៀងរាល់ថ្ងៃ ក្នុងការផលិតសម្លៀកបំពាក់លក់ទៅក្រៅប្រទេសជាថ្នូរនឹងប្រាក់ចំណូលចិញ្ចឹមសារ។
ពួកគេត្រូវបានចាត់ទុកជា «អប្សរាថ្មី» នៅក្នុងពិព័រណ៍សិល្បៈ ដែលនឹងត្រូវបានប្រារឰឡើង ក្រោមគំនិតផ្ដួចផ្ដើមរវាងជាងថតរូបអាជីព និងក្រុមអ្នកឌីហ្សាញ ស្ដីពីឥទ្ធិបរិស្ថាន និងសង្គមនៃឧស្សាហកម្មវាយនភណ្ឌ។
ព្រឹត្ដិការណ៍ ២ ប្រារឰក្នុងពេលតែមួយ «អប្សរាថ្មី» ‘The New Apsaras’ ចាប់ផ្ដើមពីម៉ោង ៥ ល្ងាច រយៈពេល ១ ខែ នៅ Plantation រហូតដល់ថ្ងៃទី ២២ ខែមីនា និងពិព័រណ៍ហ្វេសសិន «លើសពីមនុស្ស» ‘More Than Humans’ ប្រារឰឡើងនៅថ្ងៃបើកសម្ពោធដូចគ្នា នៅម៉ោង ៧ យប់។
«អប្សរាថ្មី» ផ្ដោតលើការជជែកវែកញែកនូវទស្សនៈរិះគន់ និងច្នៃប្រឌិតស្ដីពីហ្វេសសិនដោយប្រើវិធីសាស្ដ្រប្លែកៗដើម្បីសិក្សាពីកិច្ចការឧស្សាហកម្ម។ ពិព័រណ៍ «លើសពីមនុស្ស» ផ្ដោតលើបញ្ហាបរិស្ថាន ប្រព័ន្ធអេកូឡូស៊ី និងការប្រើប្រាស់ច្រើនហួសប្រមាណដោយសារតែឧស្សាហកម្មហ្វេសសិនអភិវឌ្ឍឆាប់រហ័ស។
លោក មីហ្គែល ជេរូនីម៉ូ ជាងថតរូបអាជីពសញ្ជាតិព័រទុយហ្គាល់ ដែលមានមូលដ្ឋាននៅភ្នំពេញបានប្រាប់ភ្នំពេញប៉ុស្ដិ៍ថា៖ «យើងមានបំណងផ្សព្វផ្សាយចំណេះដឹង លើកទឹកចិត្ដ និងអប់រំអំពីការងារទទួលកម្រៃឈ្នួលថោក ក៏ដូចជា ការចូលរួមចំណែកលើកកម្ពស់ស្ថានភាព។ គោលបំណងរបស់យើង គឺការលើកស្ទួយឲ្យមានការកែច្នៃ ការប្រើប្រាស់ជាថ្មី និងប្រែក្លាយសម្ភារចាស់ៗទៅជាស្នាដៃសិល្បៈថ្មី»។
លោក ជេរូនីម៉ូ ដែលសហការជាមួយអ្នកឌីហ្សាញ និងនិស្សិតកម្ពុជាផ្នែកឌីហ្សាញបាននិយាយថា ការនាំចេញធំបំផុតរបស់កម្ពុជា គឺឧស្សាហកម្មវាយនភណ្ឌ ដែលភាគច្រើនលក់ទៅកាន់អឺរ៉ុប និងអាមេរិក ខណៈនៅទីនេះ ប្រតិបត្ដិការទាំងមូលត្រូវបានធ្វើឡើងដោយកម្លាំងពលកម្មប្រមាណ ៧០ ម៉ឺននាក់ ដោយ ៩០ ភាគរយជាស្ដ្រី។
ស្ត្រីកម្មការិនីរោងចក្រ ក្នុងកាយវិការកាន់ម្ជុល ក្រណាត់កាត់ ស្រដៀងទៅនឹងម្រាមដៃផ្កាជ្រុះក្នុងន័យនៃរបាំអប្សរា។ រូបថត Miguel Jeronimo
ជាងថតរូបព័រទុយហ្គាល់រូបនេះ បាននិយាយថា៖ «យ៉ាងណាមិញ កម្មករទាំងនេះគ្មានថ្ងៃមានលទ្ធភាពទិញសម្លៀកបំពាក់ដែលខ្លួនបានផលិតផ្ទាល់ដៃនោះទេ ពីព្រោះពួកគេរកចំណូលមធ្យមបានតែ ១៨៣ ដុល្លារក្នុង ១ ខែ។ ប្រាក់ដែលប្រើម្រាមដៃ និងចុងម្ជុល គឺសម្រាប់ចិញ្ចឹមឆ្នាំងបាយគ្រួសារ»។
លោកបន្ដថា៖ «ម្យ៉ាងវិញទៀត តួអង្គអប្សរា គឺជានិម្មិតរូបតំណាងជាងខ្មែរ ជាមួយងារជាទេពធិតាតំណាងភាពចម្រុងចម្រើន និងភាពអស្ចារ្យនៃរបាំប្រពៃណី»។
លោក ជេរូនីម៉ូ បានិយាយថា កាយវិការនិម្មិតរូបមួយគឺបង្ហាញពីការជួបមេដៃជាមួយម្រាមចង្អុល និងធ្វើចលនាយ៉ាងទន់ភ្លន់។ កាយវិការនេះស្រដៀងនឹងម្រាមដៃចាប់កាន់ម្ជុលជាចលនាដែលមានឥទ្ធិពលលើមនុស្សរាប់លាននាក់។ ពិព័រណ៍នេះបានផ្ដល់តម្លៃដល់កម្មកររោងចក្រចាត់ទុកជាអប្សរាថ្មី។
លោក មីហ្គែល ជេរូនីម៉ូ បានបង្ហាញរូបថតផ្ដោតលើកាយវិការដៃរបស់កម្មការិនីរំលេចទម្រង់ស្រដៀងនឹងក្បាច់របាំអប្សរាប្រពៃណី។ ពិព័រណ៍នេះនឹងបង្ហាញពីស្នាដៃសិល្បៈរបស់អ្នកសិល្បៈចម្រុះ ទាំងជាតិ និងអន្ដរជាតិ ជាមួយគំនិតច្នៃប្រឌិតសម្បូរបែប។
លោក នីកូឡាស ហ្រ្គេ នឹងបង្ហាញស្ទីលគំនូរសៀវភៅជាមួយអត្ថន័យចំអកដល់វប្បធម៌សម័យទំនើប ដែលទំនោរហ្វេសសិនបច្ចុប្បន្នជះឥទ្ធិពលលើចំណូលចិត្ដមនុស្ស និងតម្រូវការនៃការទទួលយកក្នុងសង្គម។ សម្លៀកបំពាក់ដ៏សមសួនយីហោ Tonle Design នឹងដាក់តាំងរំយោលលើជញ្ជាំងដោយប្រើក្រណាត់រហែកសេសសល់ពីរោងចក្រ ដែលចង់បង្ហាញគោលនយោបាយគ្មានសំរាមពីរោងចក្រ។
លោកបានបន្ដថា៖ «អ្នកឌីហ្សាញខ្មែរ ស៊ាងហៃ ឆាង បានច្នៃសម្លៀកបំពាក់ ២ ឈុតពីសម្ភារចាស់ៗ ខណៈដៃគូម្នាក់ទៀត KWN23 ពីក្រុម Homeless Artists Collective នឹងបង្ហាញគំនូរហ្គ្រាហ្វីទីលើក្រមា ឆ្លុះបញ្ចាំងពីភាពស្រស់ស្អាតនៃការប្រឌិតចេញពីសម្ភារក្នុងស្រុក ជាជាងការទិញផលិតផលពីបរទេស»។
លោក នីកូឡាស ហ្គ្រា នឹងបង្ហាញសៀវភៅគំនូរសន្ទនាចំអកវប្បធម៌ហ្វេសសិនសម័យថ្មី។ រូបថត សហការី
លោកនិយាយថា ចំពោះស្នាដៃទាំងអស់មានការចូលរួមពីអ្នកសិល្បៈ និងអង្គការជាង ១០ នឹងបង្ហាញនៅពិព័រណ៍រួម ដែលរៀបចំនៅ Plantation។
ដូចគ្នាដែរពិព័រណ៍ «លើសពីមនុស្ស» គឺជាការបង្ហាញម៉ូដសម្លៀកបំពាក់ដែលបង្ហាញពីក្ដីកង្វល់ចំពោះបរិស្ថាន និងការប្រើប្រាស់សម្លៀកបំពាក់ច្រើនលើសលប់ចំពោះទំនោរតាមឲ្យទាន់ហ្វេសសិនថ្មីៗ។
លោក ជេរូនីម៉ូ បាននិយាយថា មនុស្សត្រូវការហ្វេសសិនថ្មីៗ ដោយទទួលយកនូវសម្ពាធគ្រប់ទិស ដើម្បីតាមឲ្យទាន់នូវទំនោរបច្ចុប្បន្ន ដែលនាំឲ្យក្រុមហ៊ុននានាខិតខំផលិតសម្លៀកបំពាក់ថ្មីៗ លើសពីតម្រូវការមនុស្ស។
លោកបន្ដថា៖ «ការបង្ហាញម៉ូដដ៏ទាក់ទាញ និងន័យអប់រំបង្ហាញពីការប្រើប្រាស់សម្លៀកបំពាក់ឡើងវិញតាមរយៈការកែច្នៃម៉ូដ។ សម្លៀកបំពាក់ប្លែកៗបានផលិតឡើងពីសម្ភារគេបោះចោល និងគ្រឿងតុបតែងបែបសម័យមុន»។
ពិព័រណ៍នេះ លោក ជេរូនីម៉ូ បានបង្ហាញស្នាដៃរូបថត និងជាអ្នករៀបចំពិព័រណ៍ម្នាក់ ខណៈ Elliss Jaie ជាអ្នកជំនាញឌីហ្សាញសម្លៀកបំពាក់ កែច្នៃបែបថ្មី និងបានបង្រៀននៅសាលា Raffles International College។
ពិព័រណ៍ទាំង ២ នឹងចាប់ផ្ដើមបើកដំណើរការចាប់ពីថ្ងៃទី ២២ ខែកុម្ភៈ នៅម៉ោង ៥ ល្ងាច ខណៈពិព័រណ៍ «អប្សរាថ្មី» ប្រារឰឡើងនៅសណ្ឋាគារ Plantation៕
