The Phnom Penh Post Search

Search form




Logo of Phnom Penh Post newspaper Phnom Penh Post - ពិព័រណ៍​អាហារ​កូន​ស្លាបព្រា​នៅ​ផ្សារ​ទំនើប ​ទើប​នឹង​បើក​ថ្មីថ្មោង




ពិព័រណ៍​អាហារ​កូន​ស្លាបព្រា​នៅ​ផ្សារ​ទំនើប ​ទើប​នឹង​បើក​ថ្មីថ្មោង

Content image - Phnom Penh Post
ទិដ្ឋភាព​ពីការ​តាំងពិព័រណ៍​ស្លាបព្រា កាលពី​ខែ​មីនា​កន្លងមក។ រូប សហការី

ពិព័រណ៍​អាហារ​កូន​ស្លាបព្រា​នៅ​ផ្សារ​ទំនើប ​ទើប​នឹង​បើក​ថ្មីថ្មោង

ភ្នំពេញ: បន្ទាប់ពី​ជោគជ័យ​ក្នុងការ​តាំងពិព័រណ៍​អាហារ «ស្លាបព្រា» ទ្រង់ទ្រាយ​ធំ និង​មាន​ក្រុមហ៊ុន​ជាច្រើន​ចូលរួម នៅ​ពហុ​កីឡដ្ឋាន​ជាតិ​អូឡាំពិក កាលពី​ខែ​មីនា​នោះ ក្រុម​ការងារ The Idea បាន​រំលេច​ការតាំង​ពិព័រណ៍​អាហារ​ខ្នាត​តូច​វិញ​ម្តង ដែល​មាន​ឈ្មោះ​ថា កូន​ស្លាបព្រា នៅ​ចុង​សប្ដាហ៍​ថ្ងៃទី ២៦-២៧ ខាងមុខ​នេះ។

នាយក​ប្រតិបត្តិ​ក្រុមហ៊ុន The Idea និង Initiative of the Event លោក Galeno Chau និយាយ​ថា៖ «គោលបំណង​ធំ​ពីក្រោយ​ការរៀបចំ​កម្មវិធី​នេះ គឺ​ចង់​ផ្តោត​សំខាន់​ទៅ​លើ​ការកាត់​បន្ថយ​ការប្រើប្រាស់​ប្លាស្ទិក​ដែល​ជា​ប្រភព​នៃការ​បំផ្លាញ​ទាំង​សុខភាព និង​បរិស្ថាន ហើយ​ដូច​ដែល​យើង​ដឹង​ហើយ​ថា ប្លាស្ទិក​គឺ​ត្រូវការ​ពេលវេលា​យូរ​ដើម្បី​រលួយ ដែល​អាច​បង្ក​ជាការ​កកស្ទះ​លូ ឬ​ហូរចូល​ទៅ​ក្នុង​ប្រភព​ទឹក​ដែល​យើង​ប្រើប្រាស់​ជា​ចាំបាច់​រាល់ថ្ងៃ»។

បន្ថែម​ពីលើ​បញ្ហា​បរិស្ថាន ថង់​ប្លាស្ទិក​ដែល​ផលិត​ចេញពី​សារធាតុ​គីមី អាច​សាយភាយ​ចូលក្នុង​ម្ហូបអាហារ​ដែល​យើង​បាន​ខ្ចប់​ជាមួយ និង​អាច​បង្កជា​ជំងឺ​គំរាម​កំហែង​ជាច្រើន​ដល់​ជីវិត​ផងដែរ។

ដូច្នេះហើយ លោក Galeno Chau បញ្ជាក់​ថា៖ «មូលហេតុ​ទាំងនេះ​ហើយ​បានជា​អ្នកលក់​នៅ​ពិព័រណ៍​អាហារ​ស្លាបព្រា​ត្រូវតែ​គោរព​តាម​គោលការណ៍​ដែល​អ្នករៀបចំ​បាន​កំណត់​ឲ្យ​គឺ​ត្រូវមាន​ការកាត់​បន្ថយ​ការ​វេចខ្ចប់​ប្លាស្ទិក​តិច​បំផុត​តាម​ដែល​អាច​ធ្វើ​ទៅ​បាន»។

ការតាំងពិព័រណ៍​អាហារ​កូន​ស្លាបព្រា​នេះ​នឹង​ប្រព្រឹត្ត​ឡើង​នៅ​ផ្សារ​ទំនើប Exchange Square នៅ​ថ្ងៃទី ២៦ និង ២៧ ខែ​សីហា ខាងមុខ​នេះ​ចាប់ពី​ម៉ោង ១១ ព្រឹក​រហូតដល់ ៨ យប់ ដោយ​មានការ​ចូលរួម​ប្រមាណ​ជា​ជិត ៣០ ស្តង់​លក់​អាហារ​ចម្រុះ កម្មវិធី​សប្បាយៗ​ជាច្រើន។

ពិព័រណ៍​នេះ​ទៀតសោត​ក៏មាន​កម្មវិធី​សប្បាយៗ​ជាច្រើន​សម្រាប់​អ្នកចូលរួម​ដូចជា ល្បែង​ពពុះ​សាប៊ូ​យក្ស គប់បាល់​ប៉េងប៉ុង ខាំដួង​ព្រះចន្ទ ការបង្ហាញ​និង​បង្រៀន​ពីការ​ធ្វើ​ម្ហូប ការដាក់​តាំង​ម្ហូបអាហារ​ជាច្រើន​ប្រភេទ ដែល​មកពី​បណ្តា​ភោជនីយដ្ឋាន​នានា គ្រប់ទិសទី​ជុំវិញ​ប្រទេស​កម្ពុជា។ អ្វីដែល​ពិសេស​ទៀត​នោះ​គឺមាន​ការភ្លក្ស និង​ទទួលទាន​អាហារ​ជាមួយ​នឹង​ស្រា​ក្រឡុក​យ៉ាង​ឆ្ងាញ់​ពិសា ថែម​ទាំង​មានការ​ប្រកួត​ប្រជែង​ញ៉ាំ​អាហារ​ដែល​អ្នកចូលរួម​គ្រប់រូប​មាន​ឱកាស​ចូល​លេង​ដើម្បី​ឈ្នះ​រង្វាន់​ជាច្រើន​ផងដែរ។

ការចូលរួម​ដោយ​សេរី ហើយ​តម្លៃ​អាហារ​មាន​ចាប់ពី ១ ដុល្លារ​ដល់ ៤ ដុល្លារ​ផងដែរ ជាមួយ​នឹង​មុខម្ហូប​ខ្មែរ និង​បរទេស​ជាច្រើន​ប្រភេទ​រង់ចាំ​ស្វាគមន៍​អ្នក​ទាំងអស់គ្នា៕

Content image - Phnom Penh Post
ក្រៅ​ពីពិព័រណ៍​ម្ហូប ក៏មាន​កម្មវិធី​កម្សាន្ដ​ជាច្រើន​ដែរ​។ រូប សហការី

អត្ថបទគួរចាប់អារម្មណ៍