.jpg)
លោក ហ៊ាន រង្សី និងស្នាដៃរូបថតភ្នំ «រាបសល់តែឈ្មោះ»។ រូបថត សហការី
ភ្នំពេញ៖ ដោយមិនធ្លាប់ឃើញអ្វីទៅជាទេសភាពជួរភ្នំរលករលេញអំឡុងពេលនៅកុមារភាព យុវជន ហ៊ាន រង្សី ស្គាល់ទស្សនីយភាពដ៏ស្រស់ត្រកាលនោះ តាមរយៈការស្រមើស្រមៃពីការអានសៀវភៅប៉ុណ្ណោះ។
នៅពេលអ្នកថតរូបមកពីស្រុកព្រែកប្រសព្វ ខេត្ដក្រចេះ រូបនេះ បានឃើញទិដ្ឋភាពជាក់នឹងភ្នែកពេលធ្វើដំណើរទៅបណ្ដាខេត្ដដទៃ រូបគេពិតជាភ្ញាក់ផ្អើលខ្លាំងមែនទែន។
ប៉ុន្ដែទស្សនីយភាពខ្លះនៃសម្រស់ធម្មជាតិកំពុងតែរសាយបាត់បន្ដិចម្ដងៗយ៉ាងស្ងៀមស្ងាត់។
នាសប្ដាហ៍នេះ លោក ហ៊ាន រង្សី ដែលបានប្រើជំនាញផ្នែកថតរូបរបស់ខ្លួន គួបនឹងការបណ្ដុះបណ្ដាលការថតរូបបែបសិល្បៈ បានដាក់បង្ហាញរូបថតភ្នំថ្ម ២ ផ្ទាំង ដែលកំពុងត្រូវបានជីកកកាយបន្ដិចម្ដងៗ ក្រោមប្រធានបទ «រាបសល់តែឈ្មោះ» សម្រាប់ការចូលរួមពិព័រណ៍ «បន្សាំ» ដែលមានរយៈពេល ២ សប្ដាហ៍។
ម្ចាស់ស្នាដៃ «រាបសល់តែឈ្មោះ» ដែលជាការស្វែងរកទំនាក់ទំនងរវាងមនុស្សជាតិ និងធម្មជាតិ ហ៊ាន រង្សី ឱ្យដឹងថា៖ «ការជំរុញចិត្ដឱ្យបង្កើតប្រធានបទនេះកើតឡើងតាំងពីនៅកុមារភាពពេលអានសៀវភៅរៀបរាប់ទាំងទំហំ កម្ពស់ ភាពរឹងមាំ និងសម្រស់ពីសំណាក់អ្នកនិពន្ធ ដែលធ្វើឱ្យខ្ញុំនឹកស្រមៃឃើញទិដ្ឋភាពជួរភ្នំស្រស់ត្រកាល ដិតជាប់ក្នុងខួរក្បាល»។
សហការី ភ្នំពេញ ប៉ុស្ដិ៍ រូបនេះនិយាយថា៖ «ពេលខ្ញុំបានធ្វើដំណើរកាត់ខេត្តនានាក្នុងតំបន់ខ្ពង់រាប ខ្ញុំជួបទិដ្ឋភាពទាំងនោះពិតមែន។ ប៉ុន្ដែភ្នំមួយចំនួនដែលស្ថិតនៅអមតាមដងផ្លូវត្រូវបានចោះ ដាប់ កាប់ និងជីកកាយយ៉ាងស្ងៀមស្ងាត់ដោយសល់តែឈ្មោះ»។
មហាជននឹងបានឃើញរូបថត និងការបរិយាយត្រួសៗរបស់អ្នកថតរូប ហ៊ាន រង្សី និងសិល្បករដទៃទៀត នៅវិចិត្រសាល Sa Sa Art Projects ក្រោមការសម្របសម្រួលរបស់លោកគ្រូ លីម សុខចាន់លីណា។
«បន្សាំ» គឺជាឈ្មោះពិព័រណ៍បញ្ចប់ការសិក្សាថ្នាក់ថតរូបសហសម័យ និងឯកសារ ដែលរៀបចំសម្រាប់បណ្ដុះបណ្ដាលអ្នកថតរូបសិល្បៈរយៈពេល ៣ ខែ ដើម្បីផ្ដល់ឱកាសឱ្យពួកគេក្លាយជាសិល្បករជំនាន់ថ្មី និងបង្ហាញស្នាដៃដល់មហាជនទូទៅ ក៏ដូចជាការចែករំលែកចំណេះដឹងបន្ដផងដែរ។
ពិព័រណ៍ «បន្សាំ» បានបើកសម្ពោធថ្ងៃទី ៤ វេលាម៉ោង ៦ ល្ងាច និងបន្តរហូតដល់ថ្ងៃទី ២០ ខែកុម្ភៈ ដោយមានស្នាដៃទាំងអស់ ៦៨ ផ្ទាំង របស់សិស្សចំនួន ៩ នាក់ ដែលម្នាក់ៗមានរូបថតចន្លោះពី ៦ ទៅ ១២ ផ្ទាំង។
លោក លីម សុខចាន់លីណា គ្រូបង្រៀនជំនាញថតរូបបែបសិល្បៈសហសម័យ កំពុងរៀបចំរូបថតពិព័រណ៍ «បន្សាំ»។ហ៊ាន រង្សី
លោក លីណា វ័យ ៣៤ ឆ្នាំ ប្រាប់ថា៖ «សិស្សខ្លះធ្វើពីការស្វែងយល់ផ្ទាល់ខ្លួនរបស់គាត់។ ជាក់ស្ដែង ខ្លះបង្ហាញជាអ្នកស្រឡាញ់ភេទដូចគ្នា ខ្លះពីម៉ែដោះដែលមើលក្មេងៗ ខ្លះនិយាយពីរបៀបរបបសង្គមក្នុងការរស់នៅ ខ្លះពីការអភិវឌ្ឍនៃទីក្រុង ដែលធ្វើឱ្យប៉ះពាល់សំណង់បុរាណ និងខ្លះទៀតធ្វើអំពីកន្លែងទឹកស្អុយ»។
លោកបន្ដថា៖ «ដូច្នេះពេលនិយាយពីបញ្ហាទាំងអស់នេះ គឺវាដូចនិយាយពីសង្គម និយាយពីកូវីដ ១៩ ការពាក់ម៉ាស់ និងនិយាយពីទឹកស្អុយផ្សេងៗ យើងក៏មានគំនិតថា ប្រជាជននឹងបន្តរស់នៅជាមួយវាយ៉ាងដូចម្ដេច? អ៊ីចឹងហើយទើបយើងចេញពាក្យថា បន្សាំ សម្រាប់ពិព័រណ៍ជំនាន់ទី៣ នេះ»។
ស្ថិតក្នុងចំណោមសិក្ខាកាមទាំង ៩ នាក់ លោក ខេង សុខណេត និយាយពីកម្លាំងជំរុញចិត្តលោកក្នុងការយករូប ១ ក្នុងចំណោមរូបទាំង ៨ របស់ខ្លួនដែលលោកពេញចិត្តជាងគេមកបកស្រាយ។
លោកបង្ហើបថា៖ «រស់នៅតាមដងទន្លេមេគង្គ និងជិតបឹង ខ្ញុំឧស្សាហ៍មើលទៅកាន់ទឹកបឹងទន្លេ និងឃើញរស្មីភ្លឺផ្លេកៗ លើផ្ទៃទឹកចាំងប៉ះជាមួយព្រះអាទិត្យ ប្រៀបបានដូចជាខ្ញុំបានឃើញហ្វូងដួងតារានៅលើមេឃ។
ម្ចាស់ស្នាដៃពន្លឺចម្រុះពណ៌បែបសហសម័យរូបនេះ បានបន្ដថា៖ «ទិដ្ឋភាពទាំងនោះពិតជាស្រស់ស្អាតណាស់។ ខ្ញុំធ្លាប់គិតថា វាមិនកើតអ្វីទេដោយខ្ញុំគ្រាន់តែចោលសំរាម និងបង្ហូរកាកសំណល់ខ្លះៗចូលក្នុងទឹក។ ផ្ទុយទៅវិញ ទង្វើនេះអាចបង្កឱ្យមានការបំពុលទឹកដូចសព្វថ្ងៃ»។
លោកបញ្ជាក់ថា៖ «ហេតុនេះ ខ្ញុំសម្រេចចិត្តយក Galaxy Pollution ជាប្រធានបទក្នុងការបញ្ចប់វគ្គសិក្សារបស់ខ្ញុំ ដោយខ្ញុំយកការបំពុលទឹកជាមួយសំរាមឱ្យក្លាយជា Galaxy។ វាមានភាពស្រស់ស្អាតទាក់ភ្នែកដូចបានទៅលេងភពមួយផ្សេងទៀតដែលជាល្បាយពពុះទឹកស្អុយ និងសំរាម»។
លោកបង្ហាញសារថា៖ «ខ្ញុំសង្ឃឹមថា ការងារនេះនឹងអាចរំឭកឱ្យមនុស្សយើងគិតឡើងវិញពីបញ្ហាសំរាម និងកាកសំណល់ ដែលមនុស្សបង្កឡើង ដើម្បីកាត់បន្ថយការប្រើប្រាស់ ជាពិសេស សម្ភារប្លាស្ទិកឱ្យសល់តិចបំផុតដែលយើងអាចធ្វើទៅបាន»។
លោក លីណា ជាអ្នកគ្រប់គ្រង ១ នៅសាលាគម្រោងសិល្បៈស-ស បានឱ្យដឹងថា ពួកគេមានទេពកោសល្យ និងភាពខ្លាំងរៀងៗខ្លួន។ រូបខ្លះងាយមើលយល់សម្រាប់មនុស្សទូទៅ តែរូបខ្លះទៀតតម្រូវឱ្យមានការវិភាគ និងស្វែងយល់ច្រើន។
លោក ខេង សុខណេត និងរូបថតពន្លឺកាឡាក់ស៊ី រវាងពន្លឺ ពពុះទឹកស្អុយ និងសំរាម។ ហ៊ាន រង្សី
ដោយមិនបានពន្យល់ពីហេតុផលច្រើន លោក ហ៊ាន រង្សី ស្នើមហាជនអ្នកទស្សនាត្រិះរិះពិចារណាអំពីអត្ថន័យនៃរូបថតរបស់លោកជាជាងការបកស្រាយរបស់ម្ចាស់ស្នាដៃ។
នៅក្នុងការតាំងពិព័រណ៍នេះ លោក លីណា បានប្រាប់ថា វាជាការបង្ហាញស្នាដៃធម្មតា តែបើសិនមានទស្សនិកជនគាត់ចាប់អារម្មណ៍ក៏ដូចជាការលើកទឹកចិត្តដល់សិល្បករ ពួកគេអាចជាវរូបថត ដែលមានតម្លៃមធ្យមពី ២៥០ ដុល្លារ ក្នុង ១ ផ្ទាំង។
លោកថា៖ «ដើម្បីក្លាយជាជាងថតរូបអាជីព សិស្សមិនមែនចេះត្រឹមតែការថតរូបទេ។ ពួកគេត្រូវមានចំណេះដឹងទូទៅឱ្យបានច្រើនទាំងជីវិតរស់នៅ ទាំងសង្គម ទាំងនយោបាយ ដើម្បីឱ្យគាត់កាន់តែយល់ស៊ីជម្រៅ និងអភិវឌ្ឍខ្លួនឯងបន្តទៀត»។
លោកសុំមហាជនចូលរួមទស្សនាពិព័រណ៍នេះ និងគាំទ្រការផលិតស្នាដៃ ដើម្បីឱ្យពួកគេបន្តផលិតទៀត។
សម្រាប់ព័ត៌មានបន្ថែម សុំចូលទៅកាន់ទំព័រហ្វេសប៊ុកគម្រោងសិល្បៈស-ស @sasaartprojects៕
