សៀមរាប: ក្រោយពិព័រណ៍លើកដំបូង «I DON’T BELONG HERE» ក្នុងក្រុងភ្នំពេញ អ្នកសិល្បៈវ័យក្មេង ៣ នាក់ដែលផ្ដួចផ្ដើមឡើងពីចំណូលចិត្ដសិល្បៈសហសម័យ ស្ដ្រី និងហ្វាសសិនដូចគ្នាបានកំពុងធ្វើកិច្ចការរួមគ្នាជាលើកទី ២ ហើយនឹងបង្ហាញស្នាដៃពិព័រណ៍ថ្មីឈ្មោះ «១៨០°» ក្នុងក្រុងសៀមរាប។
ចំពោះគម្រោងលើកទី ២ នេះក្រុមសិល្បៈនិយមលេងខ្លួនច្រឡំក្មេងអនាថា HOMELESS Artists Collective ចង់បង្ហាញនូវអ្វីដែលជាចំណងមិត្ដភក្ដិថ្មោងថ្មី និងចែករំលែកបទពិសោធជាអ្នកតំណាងអ្នកសិល្បៈជំនាន់ថ្មី តាមរយៈការពុះពារជម្នះទស្សនៈយល់ច្រឡំលើពួកគេ។
«១៨០°» ជាចំណងជើងពិព័រណ៍ដែលត្រូវបានតាំងបង្ហាញនៅវិចិត្រសាល MIRAGE Contemporary Art Space សំដៅលើគោលដៅផ្ទុយគ្នានូវចំណេះដឹងសិល្បៈរបស់ពួកគេដែលជ្រើសរើសវិធីផលិតស្នាដៃសិល្បៈបែបថ្មីខុសពីអ្នកសិល្បៈជំនាន់មុន។
លោក ស៊ីវ សេរី ជានាយកវិចិត្រសាលដែលបានរៀបចំពិព័រណ៍នេះបានឲ្យដឹងថា៖ «១៨០° គឺជាពិព័រណ៍ដ៏សំខាន់មួយសម្រាប់វិចិត្រសាល MIRAGE។ យើងក៏បានជួបនូវអ្នកសិល្បៈជាច្រើនរូបផងដែរ។ យើងដឹងពីគុណតម្លៃនៃការបំពេញកិច្ចការរួមគ្នាព្រមទាំងចែករំលែកទស្សនៈរួមគ្នា។ ពួកគេចេះគាំទ្រគ្នា ហើយនេះជាអ្វីដែលយើងចង់ធ្វើ ចង់គាំទ្រនិងធ្វើការជាមួយអ្នកសិល្បៈផ្សេងៗ»។
ពិព័រណ៍ដ៏ប្លែកភ្នែកនេះបានបង្ហាញពីស្នាដៃច្នៃម៉ូដសម្លៀកបំពាក់ដោយយកលំនាំតាមការឌីហ្សាញបស្ចិមប្រទេសសតវត្សរ៍ទី ១៧ របស់លោក ឆាង ស៊ាងហៃ អាយុ ២៣ ឆ្នាំ។
ក្នុងបណ្ដុំស្នាដៃតាំងរួមគ្នានេះក៏មានគំនូររបស់លោក សូ សុទ្ធសុវណ្ណគង់ ហៅ ក្វាន់ អាយុ ២១ ឆ្នាំ ជាវិចិត្រករស្វ័យសិក្សាពីគំនូរលើជញ្ជាំងរំលេចនូវសំណេរសំស្ក្រឹតជាមួយគំនូរលើជញ្ជាំងរួមនឹងចំណូលចិត្ដលើប្រអប់ម្សៅផាត់មុខ។
ស្នាដៃដ៏ប្លែកភ្នែកមួយបែបទៀតជាចម្លាក់កាច់ដែក និងបោះពុម្ពរបស់លោក ស៊ីន ម៉ានី អាយុ ២៩ ឆ្នាំជាវិចិត្រករស្វ័យសិក្សាលើសិល្បៈសហសម័យដែលបង្ហាញពីអន្ដរទំនាក់ទំនងដ៏ស្មុគស្មាញរវាងខ្លួនយើង និងបរិស្ថានជុំវិញរវាងអ្នកដទៃ និងខ្លួនឯងក៏ដូចជារវាងសហគមន៍ និងបុគ្គលម្នាក់ៗ។
អំឡុងពេលបើកសម្ពោធពិព័រណ៍នេះក្រុមអ្នករៀបចំចង់កោតសរសើរចំពោះគំនិតបង្ហាញពីវាលវដ្តសង្សារនៃជីវិតបច្ចុប្បន្នរបស់លោក ក្វាន់។
Kasia Sumislawska នាយកផ្នែកទំនាក់ទំនងនៅវិចិត្រសាល MIRAGE បាននិយាយថា៖ «យើងលើកទឹកចិត្ដដល់មហាជនចូលរួមក្នុងការពិសោធនេះ។ សម្រាប់រាត្រីបើកសម្ពោធ យើងបានស្នើសុំឲ្យភ្ញៀវយកសម្លៀកបំពាក់ ដូចជា អាវយឺត។ ពួកគេនឹងមានឱកាសទទួលបាននូវការបោះពុម្ពលើអាវស្វែងយល់ពីទិចនិកបោះពុម្ព និងបរិច្ចាគអាវចាស់ៗដល់អ្នកក្រីក្រ»។
ពិព័រណ៍ ១៨០° របស់ HOMELESS Artists Collective បើកដំណើរការនៅវិចិត្រសាល MIRAGE Contemporary Art Space លើវិថីឧកញ៉ាអ៊ុំឆាយ ក្រុងសៀមរាបចាប់ពីថ្ងៃទី ១៥ ខែកុម្ភៈ ដល់ថ្ងៃទី ១៥ ខែមេសា៕