ភ្នំពេញ៖ ទើបតែទទួលបានពានរង្វាន់ពិសេសនៅប្រទេស ថៃ ជាមួយនឹងតារាប្រុសស្រីខ្មែរផ្សេងៗទៀតក្នុងកម្មវិធីប្រចាំឆ្នាំ ២០២០ នាពេលកន្លងមកនេះ តារាស្រីស្រស់រាងស្រលូនសាច់ខ្ចីកញ្ញា ពីយ៉ា វេកា ក៏ត្រូវបានអ្នករៀបចំកម្មវិធីមហោស្រពភាពយន្តខ្លីចតុមុខនៅឆ្នាំ ២០២០ (CSFF) ជ្រើសជាតារាកិត្តិយសខាងលើកទឹកចិត្តសមិទ្ធករភាពយន្ត។
កាលពីថ្ងៃទី ២៦ ខែ មករា ឆ្នាំ ២០២០ កញ្ញា ពីយ៉ា វេកា ព្រមទាំងក្រុមតារាប្រុសស្រីខ្មែរមួយចំនួនមាន កញ្ញា ដួង ម៉ានិច កញ្ញា ម៉េង ជីមមី លោក ខាត់ វ៉ៃហាំង បានចូលរួមក្នុងកម្មវិធីប្រគល់រង្វាន់នៅទីក្រុងបាងកក ហើយនេះក៏ជាមោទនភាពមួយសម្រាប់កម្ពុជាដែរ ចំពោះឱកាសពិសេស ក្នុងការទទួលបាននូវពានរង្វាន់ Thailand Digital Award 2020 នេះ។
តារាម៉ូដែល និងសម្តែងដែលជាទីចាប់អារម្មណ៍របស់មហាជនកម្ពុជាចូលចិត្តលេងស្ទីលបង្ហាញភាពសិចស៊ីនៅតាមបណ្តាញសង្គមកញ្ញា ពីយ៉ា វេកា ក៏បានបង្ហើបរឿងក្លាយជាតារាកិត្តិយសនៃកម្មវិធីមហោស្រពភាពយន្តខ្លីចតុមុខនៅឆ្នាំ ២០២០ (CSFF) ដែលគ្រោងនឹងប្រព្រឹត្តធ្វើនៅដើមខែកញ្ញា ឆ្នាំ ២០២០ ដែលការទទួលស្នាដៃរឿងខ្លី ដើម្បីប្រកួតប្រជែងរបស់សមិទ្ធករបន្តរហូតដល់ចុងខែឧសភា ខាងមុខដែរថា៖ «នាងខ្ញុំធ្លាប់បានចូលរួមកម្មវិធីជំរំភាពយន្តរបស់មហោស្រពភាពយន្តឆ្នាំ ២០១៦ ក្នុងនាមជាតួសម្តែង សម្រាប់សាច់រឿងទាក់ទងនឹងការជួញដូរផ្លូវភេទ។ ដោយឡែកនៅឆ្នាំ ២០២០ នេះ នាងខ្ញុំត្រឡប់មកគាំទ្រកម្មវិធីមហោស្រពទាំងមូល ក្នុងនាមជាអ្នកផ្តល់កម្លាំងចិត្តដល់ក្រុមការងារនៃយុវសមិទ្ធករ ភាពយន្តខ្លីយើងក៏ដូចជាទស្សនិកជនឲ្យចូលរួមលើកស្ទួយវិស័យភាពយន្តទាំងអស់គ្នាព្រោះថា អនាគតរបស់យុវសមិទ្ធករយើងគឺចាប់ផ្តើមពីភាពយន្តខ្លីនេះ»។
នាមួយរយៈចុងក្រោយនេះ ឧស្សាហ៍ឃើញតារាស្រីម៉ូដែល និងថតស្ប៉តផ្សាយផលិតផល ស្រីស្រស់រាងស្រលូនសាច់ខ្ចី ជាបុប្ផារូបស្រស់មានស្រុកកំណើតនៅខេត្តកំពង់ចាម ដែលហ៊ានបង្ហាញភាពសិចស៊ីមិនសូវជាចាញ់តារាសម្តែងសិចស៊ីរៀមច្បងនានា កញ្ញា ពីយ៉ា វេកា តែងឆ្លៀតចេញទៅហាត់ប្រាណ ដើម្បីរក្សាសម្រស់ឲ្យកាន់តែផូរផង់ខុសប្លែកជាងមុន ក៏បង្កមន្ទិលសង្ស័យពីមហាជនថា បានកែសម្ផស្ស។
តារាម៉ូដែលស្រីស្រស់ រូបរាងស្រលូនវ័យ ២៥ ឆ្នាំ ដែលជាកូនស្រីពៅក្នុងគ្រួសារ កញ្ញា ពីយ៉ា វេកា ក៏ធ្លាប់បង្ហើបប្រាប់ភ្នំពេញប៉ុស្តិ៍ថា៖ «អត់ទេបង! តើខ្ញុំមានពេលពីណាទៅកែសម្ផស្សនោះ បើម៉្ងៃៗ គឺនាងខ្ញុំមមាញឹកខ្លាំងនឹងការងារថតស្ប៉តផ្សព្វផ្សាយ និង ការងារខាងដើរម៉ូដែលយ៉ាងហ្នឹងនោះ!»៕