.jpg)
តារាសម្តែងស្រី និងម៉ូដែលកញ្ញា ពីយ៉ា វេកា មានរូបសម្ផស្សកាន់តែស្រស់ ប្រែប្រួលខុសពីមុនរងមន្ទិលពីមហាជន។ រូបថត ហ្វេសប៊ុក
ភ្នំពេញៈ បើទោះបីជារវល់នឹងការងារសិល្បៈម៉ូដែល និងថតស្ប៉តផ្សាយផលិតផលយ៉ាងណាក្តី ក៏ស្រីស្រស់ រាងស្រលូនសាច់ខ្ចីកញ្ញា ពីយ៉ា វេកា នៅតែអាចឆ្លៀតទៅហាត់ប្រាណ ដើម្បីរក្សាសម្រស់ឲ្យកាន់តែផូរផង់ខុសប្លែកជាងមុន ដែលបង្កមន្ទិលសង្ស័យពីមហាជនថានាងពិតជាបានកែសម្ផស្សមិនខានទេ។
បើមើលទៅតាមភិនភាគ និងរូបសម្ផស្សតារាម៉ូដែលស្រីចូលចិត្តលេងស្ទីល បង្ហាញភាពសិចស៊ីតាមបណ្តាញសង្គមគឺថាកញ្ញា ពីយ៉ា វេកា ពិតជាស្រស់ស្អាតខុសប្លែកជាងមុន លើមុខមាត់ និងភ្នែកដែលមានភាពសមសួនស្អាតជាងមុនមែន។
ហេតុដូច្នេះហើយទើបបានកើតជាចម្ងល់ពីមហាជនលើកឡើងថា៖ «អីយ៉ា! ពីយ៉ា ឥឡូវនេះមិនត្រឹមតែមានរាងស្រស់ស្អាត ហើយសិចស៊ីប៉ុណ្ណោះទេគឺនាងថែមទាំងមានសភាពប្រែប្រួលនៅលើផ្ទៃមុខទៀតផង ជាពិសេសនោះនៅត្រង់ភ្នែក និងចង្កាតែម្តង។ ឆ្ងល់ណាស់ តើភាពប្រែប្រួលនេះកញ្ញាបានទៅកែសម្ផស្សដែរឬទេហ្ន?»។
តារាសម្តែង និងម៉ូដែលរាងស្រឡូន កញ្ញា ពីយ៉ា វេកា។ រូបថត ហ្វេសប៊ុក
តារាម៉ូដែលស្រីស្រស់ រាងស្រឡូនវ័យ ២៥ ឆ្នាំដែលជាកូនពៅក្នុងគ្រួសារបានប្រឡូកសិល្បៈត្រឹមតែជំនាន់ខ្លួន គ្មានសាច់ឈាមជ័រជាអ្នកសិល្បៈសោះកញ្ញា ពីយ៉ា វេកា បង្ហើបប្រាប់ភ្នំពេញប៉ុស្តិ៍ថា៖ «អត់ទេបង!តើខ្ញុំមានពេលពីណាទៅកែសម្ផស្សនោះ បើម្ង៉ៃៗគឺខ្ញុំមានការមមាញឹកខ្លាំងនឹងការងារថតស្ប៉តផ្សព្វផ្សាយ និងការងារម៉ូដែលយ៉ាងហ្នឹងនោះ!»។
បុប្ផារូបស្រស់មានស្រុកកំណើតមកពីខេត្តកំពង់ចាមដែលហ៊ានបង្ហាញភាពសិចស៊ីមិនសូវជាចាញ់តារាសម្តែងសិចស៊ីជារៀមច្បងនានាកញ្ញា ពីយ៉ា វេកា ថា៖ «នាងខ្ញុំមិនបានកែសម្ផស្សអ្វីនោះទេតាំងពីដើមមក។ ចំពោះភាពប្រែប្រួលនានានៅលើមុខមាត់ខ្ញុំនោះអាចមកពីមួយរយៈចុងក្រោយនេះ នាងខ្ញុំបានពត់ធ្មេញ និងឧស្សាហ៍បានហាត់ប្រាណជាប្រចាំ ហើយមើលទៅបានជាបងប្អូនកត់សម្គាល់ថា ខ្ញុំមានភាពប្រែប្រួលផ្ទៃមុខនោះ»។
កាលមុននេះបន្តិចតារាស្រី និងម៉ូដែលចូលសិល្បៈស្របាលគ្នានឹងកញ្ញា ស៊ីស៊ី និងកញ្ញា សុផា លីនដា ដែរនោះហាក់ដូចជាមានការរអ៊ូថា នាងគ្មានផលិតកម្មណាហៅទៅថតកុនឡើយថែមទាំងមិនដឹងមូលហេតុមកពីអ្វី។
តែលើកនេះហាក់ផ្ទុយពីលើកមុនដោយស្រីស្អាត ពីយ៉ា វេកា បង្ហើបប្រាប់ឲ្យដឹងថា៖ «សម្រាប់ការថតកុន នាងខ្ញុំក៏ធ្លាប់បានថតកុនចំនួន ២ រឿងមកហើយដែរ។ ពេលនេះមិនហ៊ានទទួលថតទៀតឡើយចំពោះកុនភាគ ខណៈកុនដុំអាចទទួលបានខ្លះ ដោយសារនាងខ្ញុំបារម្ភខ្លាចមិនមានពេលគ្រប់គ្រាន់សម្រាប់ថតឲ្យគេគឺថតកុនភាគនោះឯង។ ម្យ៉ាងវិញទៀតខ្ញុំក៏ត្រូវការពេលសិក្សាបន្ថែមផង និងរវល់ការងារម៉ូដែល និងថតស្ប៉តផ្សព្វផ្សាយក៏ច្រើនផងដែរ»៕
