The Phnom Penh Post Search

Search form




Logo of Phnom Penh Post newspaper Phnom Penh Post - ពី​រោងចក្រ​ស្ករស ​ក្លាយ​ជាតំបន់​ទេសចរណ៍​វប្បធម៌​តន្ត្រី​ស្គរ​ចិន

ពី​រោងចក្រ​ស្ករស ​ក្លាយ​ជាតំបន់​ទេសចរណ៍​វប្បធម៌​តន្ត្រី​ស្គរ​ចិន

Content image - Phnom Penh Post
សំណង់​ប៉ម​ខ្ពស់​នៅ​អតីត​រោង​ចក្រ​ផលិត​ស្ករស​​ដែល​ប្រែក្លាយ​ជាកន្លែង​អភិរក្ស​ស្គរ​។ គាំ ច័ន្ទរស្មី

ពី​រោងចក្រ​ស្ករស ​ក្លាយ​ជាតំបន់​ទេសចរណ៍​វប្បធម៌​តន្ត្រី​ស្គរ​ចិន

ក្រុងកាវស៊ុង: ក្រុង​កៅស៊ុង នៃ​ទឹកដី​កោះ​តៃវ៉ាន់ ដែល​គ្រាន់ តែ​ជិះ​បក្សី​ស្លាប​ដែក​ប្រមាណ ជា ៣ ម៉ោង ក៏អាច​ទៅ​ដល់​បាន​ដោយ​ងាយ​នោះ មាន​តំបន់​ទេសចរណ៍​ដ៏​ទាក់ទាញ​ជាច្រើន មិនថា​ដែន​សមុទ្រ​ពោរពេញ​ដោយ​ពន្លឺ​ថ្ងៃ កន្លែង​កម្សាន្ត​បែប​កែច្នៃ ឬក៏​ប្រភេទ​សិល្បៈ​វប្បធម៌​ឡើយ។

ក្នុង​ចំណោម​តំបន់​ទេសចរណ៍​ទាំង​នោះ ក្រុង​កៅស៊ុង ដែល​មាន​អាកាសធាតុ​បែប​ត្រូពិក ស្ទើរតែ​ដូចគ្នា​នឹង​នៅ​កម្ពុជា​នោះ មាន​កន្លែង​មួយ​ដែល​ស្រូប​ទាញ​ភ្ញៀវទេសចរ​រាប់ម៉ឺន​នាក់មក​ស្វែង​យល់ពី​ឧបករណ៍​តូរ្យតន្ត្រី​ស្គរ​បុរាណ ក៏ដូចជា​លេង​កម្សាន្ត​ក្នុង​បរិវេណ​អតីត​រោងចក្រ​ស្ករស​ដ៏ធំ បង្កប់​នូវ​រឿងរ៉ាវ​ប្រវត្តិសាស្ត្រ។

ជាមួយ​នឹង​សំណង់​ប៉ម​ឆ្លាក់ អក្សរ​ចិន​យ៉ាងខ្ពស់​សន្លឹម អតីត​រោងចក្រ​ផលិត​ស្ករស ដែល​ត្រូវបាន​បោះបង់​ដោយ​ជប៉ុន​ក្រោយ​សង្គ្រាម​លោក​លើក​ទីពីរ ត្រូវបាន​ប្រែក្លាយ​ជា​ឧទ្យាន​សិល្បៈ​ច្នៃប្រឌិត​ឈ្មោះថា ស្គរ​ដប់ (Ten Drum Ciao-tou Creative Park)។

ស្ថិតនៅ​លើផ្លូវ តាង​ចាង សង្កាត់​ស៊ាវទូ ទីក្រុង​កាវស៊ុង តំបន់​ទេសចរណ៍​អតីត​រោងចក្រ​ផលិត​ស្ករស​នេះ មាន​បរិវេណ​ធំ សំណង់​ឃ្លាំង​ស្ដុក​ចាស់ៗ និង​អគារ​កញ្ចក់​ច្នៃប្រឌិត​ថ្មីៗ​ជាច្រើន​ខ្នង។

ភ្ញៀវទេសចរ​ត្រូវ​បាន​អនុញ្ញាត​ឲ្យចូល​ទស្សនា​ដោយ​ឥតគិត​ថ្លៃ ប៉ុន្តែ​សម្រាប់​ការ​ចូលរៀន​ទូងស្គរ និងការ​ទស្សនា​ការសម្ដែង​ដោយ​ក្រុម​តន្ត្រី​ស្គរ​ល្បីល្បាញ នៅ​ទីនោះ ទាមទារ​ឲ្យមាន​ការជាវ​សំបុត្រ​ចូល។

Content image - Phnom Penh Post
ការ​សម្ដែង​វាយស្គរ​ដ៏ជក់ចិត្ដ​ពី​សិល្បករ​រូប​ស្រស់។ រូប សហការី

ការបង្រៀន​ពី​របៀប​លេង​ឧបករណ៍​ស្គរនេះ​មាន​រយៈពេល​ប្រមាណ​ជា ២០ នាទី ដោយ​លោកគ្រូ​ចិន​តៃវ៉ាន់ ប្រើ​ភាសា​អង់គ្លេស គំនូស​សញ្ញា​ងាយៗ និងការ​បង្ហាញ​ឲ្យភ្ញៀវ​ធ្វើតាម បង្កើត​បាន​ជាសំឡេង​ស្គរ​ប្រគំ​យ៉ាង​ស៊ីចង្វាក់ ស្ដាប់ទៅ​បីដូច​ជាភ្លេង​អ្នកក្លាហាន​ចេញ​ប្រយុទ្ធ​ក្នុង​ខ្សែ​ភាពយន្ត​ភាគ​បុរាណ​ចិន។

បន្ទាប់​ពី​ចប់ការ​បង្រៀន​វាយ​ស្គរ ភ្ញៀវ​ក៏អាច​រីករាយ​ទស្សនា​បន្ទប់​ដាក់​តាំង​ឧបករណ៍​ស្គរ រួចបន្ត​ទៅ​មើល​ការសម្ដែង​តន្ត្រី​ស្គរ ដែល​ធ្លាប់​ជាប់​ពានរង្វាន់​ល្បីៗ​ក្នុង​សកលលោក​ដូចជា Grammy Best World Album Award និង World Traditional Music Award ដ៏​ល្បីល្បាញ​ផងដែរ។ ជាមួយ​កាយវិការ​ដ៏ស្វាហាប់​ពី​សិល្បករ​រូបសង្ហាៗ​អម​ដោយ​បទភ្លេង​ធ្វើឲ្យ​រញ្ជួយ​បេះដូង ទេសចរ​ចម្រុះ​ជាតិ​សាសន៍​ហ៊ោ និង​ទះដៃ​ទ្រហឹង​ពេញ​សាល។

ក្រោយ​បញ្ចប់​ដំណើរ​កម្សាន្ត​នៅ​អតីត​រោងចក្រ​ស្ករ ដែល​បាន​ក្លាយ​ជា​ទីកន្លែង​អភិរក្ស​សិល្បៈ​តន្ត្រី​ស្គរ​ក៏ដោយ ភ្ញៀវទេសចរ​នៅតែ​អាច​ក្រេប​រសជាតិ​ទឹកស្ករ​អំពៅ​ដ៏ត្រជាក់ ដើម្បី​ផ្សើម​បំពង់ក​ក្រោម​កម្តៅ​សូរ្យសែង​ដ៏​ចែងចាំង៕

Content image - Phnom Penh Post
អ្នក​ទេសចរ​ហាត់​​វាយស្គរ​ពីលោក​គ្រូ​ចិនតៃវ៉ាន់។ ឈឹម ស្រីនាង

អត្ថបទគួរចាប់អារម្មណ៍