.jpg)
កាបូបកំប្លោករចនាជាមួយផាមួងលក់ចន្លោះពី ២៥ ទៅ ៥០ ដុល្លារ។ កំប្លោកត្រូវបានជ្រលក់ពណ៌ និងហាលក្ដៅមុនពេលត្បាញជាសម្ភារ។ រូបថត សហការី
សៀមរាប៖ សូត្រខ្មែររមែងត្រូវបានផលិតជាផាមួងដ៏ល្បីល្បាញសម្រាប់ស្លៀកពាក់ក្នុងឱកាសបុណ្យទានផ្សេងៗ ខណៈកំប្លោកគ្រាន់តែជារុក្ខជាតិមិនមានប្រយោជន៍អ្វីក្រៅពីផ្កាសម្រាប់ជាអន្លក់ទឹកគ្រឿងដ៏ឈ្ងុយឆ្ងាញ់នោះទេ។
ជាអ្នកគាំទ្រផលិតផលក្នុងស្រុក ជាពិសសការកែច្នៃកំប្លោកជាសម្ភារប្រើប្រាស់ផ្សេងៗ អ្នកស្រី ដែង កុសល បានរចនារវាងសូត្រផាមួងខ្មែរ និងកំប្លោកជាកាបូបនារី ក៏ដូចជាសម្ភារសិប្បកម្មជាច្រើនទៀត ដែលមានការទទួលគាំទ្រពីសំណាក់ប្រជាពលរដ្ឋខ្មែរក្នុង និងក្រៅប្រទេស។
ម្ចាស់ ផ្ដៅ ម៉ាឃីត អ្នកស្រី កុសល រៀបរាប់ពីគុណប្រយោជន៍ និងគុណភាពសម្ភារផលិតពីកំប្លោកថា៖ «ជាក់ស្ដែង ខ្ញុំជាអ្នកប្រើប្រាស់ផ្ទាល់។ កាបូបដែលខ្ញុំទិញកាលពី ៧ ឆ្នាំមុនពេលនេះវានៅតែអាចប្រើប្រាស់បានដល់សព្វថ្ងៃ។ លើសពីនេះ វាថែមទាំងជាការគាំទ្រសិប្បកម្មខ្មែរ និងការពារដល់បរិស្ថានផងដែរ»។
បើទោះជា ផ្ដៅ ម៉ាឃីត លក់ផលិតផលកំប្លោកក៏ដោយ ក៏ផ្ដៅគឺជាសសរស្ដម្ភសំខាន់នៃការទ្រទ្រង់កំប្លោកឱ្យមានភាពរឹងមាំ។ ដូច្នេះ អ្នកស្រី កុសល បានជ្រើសរើសផ្ដៅ ជាឈ្មោះហាងរបស់ខ្លួន។
ដោយបានច្នៃចេញជារាងមូល ជ្រុង និងការេ ជាមួយទំហំតូច ធំ កាបូបកំប្លោក ត្រូវបានរចនាយ៉ាងស្អាតដោយការបន្ថែមការឌីហ្សាញជាមួយក្រមា និងហូលផាមួងខ្មែរមានចម្រុះពណ៌ ដែលវេញជុំវិញរំលេចជាខ្សែបូ ផ្កាភ្ញី អង្កាំ ខណៈគ្រឿងតុបតែងខ្លះត្រូវបានវេញជាឈ្មោះអតិថិជន។
អ្នកស្រី កុសល បានប្រាប់ ភ្នំពេញ ប៉ុស្ដិ៍ថា៖ «វាជាការលើកកម្ពស់ផលិតផលខ្មែរដែលត្បាញដោយដៃផ្ទាល់។ គោលបំណងសំខាន់មួយ គឺយើងបានផ្ដល់សិទ្ធិអំណាចទៅស្ត្រី តាមរយៈការបង្កើតជំនាញ និងការងារផ្សេងៗដល់ប្រជាជនក្រីក្រមួយចំនួននៅតាមទីដាច់ស្រយាលនៃតំបន់សៀមរាប។ ពួកគាត់អាចមានជីវភាពធូរធារជាងមុនពេលទទួលបានការកុម្ម៉ង់បន្ដពី ផ្ដៅ ម៉ាឃីត ច្រើន»។
ការឌីហ្សាញស្រស់ស្អាត និងប្លែកទាំងនេះ នាំឱ្យផលិតផលរបស់ ផ្ដៅ ម៉ាឃីត ទទួលបានចំណាប់អារម្មណ៍ពីសំណាក់បងប្អូនខ្មែរនៅក្រៅប្រទេស។
ម្ចាស់ ផ្ដៅ ម៉ាឃីត បានឱ្យដឹងថា កាបូបដែលយកពីសិប្បកម្មនៅសៀមរាបខ្លះមិនទាន់រួចរាល់ទាំងស្រុងទេដោយហាងផ្ដៅ ម៉ាឃីត ជាអ្នកកែច្នៃបន្ថែម ក៏ដូចជាឌីហ្សាញម៉ូដប្លែកៗទៅតាមចំណូលចិត្ដអតិថិជន។
អ្នកស្រីបន្ដថា៖ «ដំបូងឡើយយើងមានអតិថិជននៅបរទេសដែលពួកគាត់ស្រឡាញ់ប្រទេសខ្មែរ និងចង់បានជារបៀបក្រមា។ យើងយកវាមកសាកល្បង និងមើលឃើញថា ការរចនាបញ្ចូលគ្នាពិតជាស្រស់ស្អាត និងធ្វើឱ្យកាន់តែមានសោភណភាពពេលលាយជាមួយផាមួង»។
អ្នកស្រីបាននិយាយថា៖ «យើងក៏ចាប់ផ្ដើមផលិត ហើយមើលឃើញថា មានសម្ទុះគាំទ្រច្រើន។ យើងបានផ្ញើទៅក្រៅប្រទេសចន្លោះពី ២ ទៅ ៣ ពាន់កាបូបរួចហើយ»។
អ្នកស្រី ដែង កុសល ម្ចាស់ហាង ផ្ដៅ ម៉ាឃីត ដែលបើកសម្ពោធចុងឆ្នាំ២០១៩ នៅរាជធានីភ្នំពេញ។ រូបថត សហការី
បើសិនជាសំដៅទៅលើភ្ញៀវបរទេសតែម្ដងនៅមិនទាន់មានច្រើននោះទេ ពីព្រោះស្ដ្រីម្ចាស់ហាងវ័យ ៤៨ ឆ្នាំរូបនេះ បានឱ្យដឹងថា ផ្ដៅ ម៉ាឃីត ទើបតែបើកនៅក្នុងអំឡុងពេលចាប់ផ្ដើមភាពវឹកវរនៃជំងឺកូវីដកាលពីចុងឆ្នាំ ២០១៩ ដែលនាំឱ្យធ្លាក់ចំនួនភ្ញៀវទេសចរ។
អ្នកស្រីអះអាងថា អតិថិជនដែលបានប្រើប្រាស់ពួកគាត់តែងតែមានការពេញចិត្ត និងកោតសរសើរទៅដល់ការជ្រើសរើសកំប្លោកដែលល្អ រឹងមាំ និងស្អាត។ កំប្លោកប្រើជាប់រយៈពេលយូរ និងមិនមានធុំក្លិន ឬសត្វល្អិតស៊ីនោះទេ។ ខាងសិប្បកម្មមានវិធីសាស្ត្រកម្ចាត់ផ្សិត និងសត្វល្អិតក្នុងកំប្លោកបានល្អ។
យ៉ាងណាមិញ មិនសុទ្ធតែមនុស្សទាំងអស់បានគាំទ្រដល់ផលិតផលកំប្លោករបស់អ្នកស្រី កុសល នោះទេ។ ម្ចាស់ហាងរូបនេះ បានលើកឡើងថា អតិថិជនខ្លះ មិនស្គាល់ និងមិនគាំទ្រផលិតផលក្នុងស្រុក។
អ្នកស្រីបានប្រាប់ថា៖ «គាត់បែរជានិយាយថា កាបូបខ្មែរសោះ តម្លៃចង់ស្មើនឹងកាបូបស្បែក។ គាត់មិនយល់ពីគុណតម្លៃ និងការលំបាកបងប្អូនសិប្បករយើងដែលធ្វើដំណើរតាមព្រែកបឹងបួ ដើម្បីស្វែងរកកំប្លោកល្អៗ និងចំណាយពេលជិត ១ ខែទម្រាំធ្វើបានមួយ»។
ក្រៅពីកាបូបកំប្លោកដែលពេញនិយមខ្លាំងជាងគេផ្ដៅ ម៉ាឃីត មានផលិតផលកំប្លោកជាច្រើនទៀតសម្រាប់តម្រូវការអតិថិជន រួមមាន កន្ទេលក្រាលអង្គុយលេង កន្ទេលក្រាលញ៉ាំបាយ កម្រាលតុ កន្ត្រក ធុងសំរាម កៅអី និងមួកជាដើម។
សម្ភារប្រើប្រាស់កំប្លោកទាំងអស់នោះ មានតម្លៃចាប់ពី ២៥ ទៅ ៥០ ដុល្លារ ដោយអាស្រ័យទៅតាមការរចនាម៉ូដ និងទំហំរបស់វា។
ដោយបានអរគុណចំពោះការគាំទ្រផលិតផលសិប្បកម្មខ្មែរ ពីស្នាដៃស្ដ្រីខ្មែរ ម្ចាស់ហាង ផ្ដៅ ម៉ាឃីត ដែលមានទីតាំងនៅរាជធានីភ្នំពេញ មានបំណងនាំយកផលិតផលជាតិទៅកាន់ទីផ្សារអន្ដរជាតិថែមទៀត។
អ្នកស្រីប្រាប់ថា៖ «ខ្ញុំមានគំនិតពង្រឹងការច្នៃបន្ថែមលើគ្រឿងសង្ហារិមពីកំប្លោកថែមទៀត។ ដូច្នេះសូមឱ្យបងប្អូននៅតែជួយគាំទ្រផលិតផលយើងផង»។
សម្រាប់ព័ត៌មានបន្ថែមអំពីផលិតផលកំប្លោក សុំចូលទៅកាន់ទំព័រហ្វេសប៊ុក @pdaovmarket៕
