ក្រុងណៃពិដោ: ពុទ្ធសាសនិករាប់ពាន់នាក់បាននាំគ្នាសម្រុកទៅកាន់មេរុចម្រុះពណ៌នៅមីយ៉ាន់ម៉ា ដើម្បីរាំ ច្រៀង និងគោរពចុងក្រោយចំពោះការបូជាព្រះសង្ឃល្បីមួយអង្គ។
ព្រះចៅអធិការវត្ដ កាយ ឡាថា ទើបមានព្រះជន្ម ៤៨ វស្សាពេលលោកសុគតកាលពីឆ្នាំមុនពីជំងឺមហារីកគ្រាប់ឈាមក្នុងភូមិមូដុន។ ពិធីបូជាព្រះសពបានធ្វើឲ្យប្រជាជនចំណុះជើងវត្ដប្រើពេល ៩ ខែដើម្បីអង្គាសប្រាក់ ៨ ម៉ឺនដុល្លារ ដែលជាពិធីដ៏ខ្ជះខ្ជាយសម្រាប់ប្រទេសក្រីក្របំផុតមួយនៅអាស៊ីដែលពលរដ្ឋ ១ ភាគ ៣ រស់នៅក្រោមបន្ទាត់ភាពក្រីក្រ។
បើយោងតាមព្រះតេជគុណ កាយ ធូវ៉ា មានសង្ឃដិកាប្រាប់ AFP ថាក្រុមព្យុហយាត្រាបានគ្រងសម្លៀកបំពាក់ស្អាតបាតធ្វើដំណើរទៅកាន់មេរុមួយដែលកសាងឡើងពីឈើ និងឫស្សីដោយប្រើថវិកាអស់ ៣៣០០០ ដុល្លារ។ សំណង់កម្ពស់ជាច្រើនជាន់ និងរានហាលធំរំលេចពន្លឺពណ៌ចម្រុះនេះតំណាងឲ្យឋានសួគ៌។
ព្រះភិក្ខុព្រះជន្ម ៥០ វស្សាខំស្រែកប្រណាំងនឹងសំឡេងមនុស្សរាំតាមតន្ដ្រីលាន់ទ្រហឹងនៅក្នុងអារាម អួងវ៉ាបាហ្សានា ថា៖ «នេះជាមរណភាពរបស់ព្រះតេជគុណដែលជាវីរជនក្នុងសាសនារបស់យើង ហើយយើងទាំងអស់គ្នាពិតជាមានការសោកស្ដាយចំពោះការបាត់បង់នេះ»។
រយៈពេល ៧ ថ្ងៃដើមខែកន្លងទៅនេះមហាជនបាននាំគ្នាឡើងជណ្ដើរឈើនៃមេរុដើម្បីទស្សនាព្រះសពតម្កល់ក្នុងមឈូសចំហដែលទ្រដោយទូករចនាម៉ូដនាគរាជដ៏ភ្លឺចែងចាំង។
ក្រៅពីជំនឿមុតមាំលើពុទ្ធសាសនានៅប្រទេសភូមា ប្រមុខសង្ឃជាបុគ្គលមានឥទ្ធិពលក្នុងសង្គមមីយ៉ាន់ម៉ាដែលជាតួអង្គផ្ដល់ឱវាទអប់រំ ដោះស្រាយជម្លោះក្នុងស្រុក និងជួយរៃអង្គាសប្រាក់កសាងផ្លូវ និងហេដ្ឋារចនាសម្ព័ន្ធដទៃទៀត។
កាលពីខែវិច្ឆិកាពិធីបូជាព្រះសពព្រះសង្ឃដែលពុទ្ធបរិស័ទគោរពខ្លាំងនៅរដ្ឋការ៉េនរឹតតែចំណាយច្រើនថែមទៀតដោយថវិកាចុះបញ្ជីបានចាយអស់ជាង ៦០ ម៉ឺនដុល្លារ។
ពិធីបុណ្យបូជាព្រះសពបានបញ្ចប់កាលពីថ្ងៃអាទិត្យ ខណៈពុទ្ធសាសនិកមកជូនដំណើរព្រះតេជគុណចុងក្រោយដោយការស្ទាបកាន់មឈូស មុនពេលដុតភ្លើងបូជា៕ HR