ភ្នំពេញៈ តើអ្វីទៅជាស្វាមី? ពាក្យស្វាមីស្មើនឹងពាក្យប្ដីដែរឬទេ បើប្រើទៅតាមឋានៈរបស់មនុស្ស? ចុះហេតុអ្វីបានជាមនុស្សស្រីចាំបាច់ជ្រើសរើសស្វាមី?
ពិតមែនហើយបើតាមពាក្យចាស់លោកថា ធ្វើស្រែក៏ត្រូវតែរើសពូជស្រូវល្អដែរ ទើបបានផលល្អ និងបានផលច្រើន។
ម្យ៉ាងវិញទៀតបើធ្វើខុសមួយឆ្នាំអាចគង់ត្រូវឆ្នាំក្រោយ តែការជ្រើសរើសស្វាមី បើខុសម្តងហើយ គឺថាខុសមួយជីវិតពិបាកនឹងកែកុនវិញណាស់។ ដូច្នេះអ្នកជាស្ត្រីគួរតែចេះជ្រើសស្វាមីដោយប្រុងប្រយ័ត្ន ក្រែងលោប៉ះចំលើស្វាមីខ្លះណាមាននៅក្នុងជំពូកស្វាមីទាំង ៧ ដូចមានខាងក្រោមតាមការបកស្រាយពីគេហទំព័រ ៥០០០ ឆ្នាំ។
ជំពូកទាំងនោះត្រូវបានបកស្រាយដូច្នេះថា៖ «ទី ១ វធកាស្វាមីគឺសំដៅស្វាមីដូចពេជ្ឈឃាត ដែលរង់ចាំតែរករឿងវាយតប់ និងសម្លាប់ភរិយាខ្លួន ចិត្តមិនត្រាប្រណីគឺដូចពេជ្ឈឃាតដែលគ្មានភាពត្រាប្រណី ចំពោះអ្នកទោសរបស់ខ្លួន។ រីឯទី ២ ចោរស្វាមី សំដៅស្វាមីដូចជាចោរ មិនត្រង់នឹងភរិយាខ្លួន ចាំតែលួចបំបាត់ទ្រព្យសម្បត្តិ ឬ លាក់លៀមរឿងអ្វីៗនឹងប្រពន្ធ ហាក់ដូចជាចោរ ដែលរង់ចាំតែលួចទ្រព្យគេ និងលាក់បំបាំងរឿងអាក្រក់របស់ខ្លួនមិនឲ្យគេដឹង។ ទី ៣ អយ្យាស្វាមី សំដៅស្វាមីដែលមានលក្ខណៈដូចជាចៅហ្វាយគឺចាំតែចង្អុលបញ្ជា បើខុសស្ដីបន្ទោស ប្រើប្រពន្ធធ្វើការដូចជាខ្ញុំបម្រើរបស់ខ្លួនអ៊ីចឹង»។
ចំណែក ៤ ជំពូកផ្សេងទៀតក៏ត្រូវបានបរិយាយថា៖ «ទី៤ បិតាស្វាមីសំដៅស្វាមីលក្ខណៈដូចជាឪពុក មានចិត្តស្រឡាញ់ថ្នាក់ថ្នមប្រពន្ធដូចកូន និងចេះមើលការខុសត្រូវ រវាំងមិនឲ្យកូនធ្វើខុស ការពារកូនៗគ្រប់ទិសទី។ ជំពូកទី ៥ ជេដ្ឋាស្វាមីសំដៅស្វាមីប្រៀបដូចបងប្រុស ស្រឡាញ់ថែទាំប្រពន្ធ ដូចបងប្រុសស្រឡាញ់ប្អូន និងការពារប្អូន។ ទី ៦ សខីស្វាមី សំដៅស្វាមីដូចជាមិត្តភក្តិ គឺថាទុកភរិយាខ្លួនស្មើនឹងមិត្តភក្តិហើយពេលជួបគ្នាក៏រីករាយ បានអ្វីក៏ចែករំលែកគ្នាតាមនាទីមិត្តគោរពមិត្ត រួមសុខរួមទុក្ខ។ ចំណែកទី ៧ ទាសាស្វាមី សំដៅស្វាមីដូចទាសា ស្ដាប់បង្គាប់ភរិយា ធ្វើការគ្រប់បែបយ៉ាងមិនឲ្យភរិយាខ្លួនព្រួយបារម្ភឡើយ»។
ស្វាមីជំពូកទី ១ ទី ២ និងទី ៣ មិនល្អឡើយ ខណៈអស់លោកជាស្វាមីគួរចៀសវាងចេញកុំប្រព្រឹត្ត ហើយអាចរើសយកណាមួយនៅក្នុងចំណោមជំពូក ៤ ផ្សេងទៀតបាន៕