The Phnom Penh Post Search

Search form

Logo of Phnom Penh Post newspaper Phnom Penh Post - ពូទិនហ្វី​ អ្នកបញ្ចូល​សំឡេង​តួស្ដេច​កំប្លែង ឲ្យ​ទស្សនិកជន​សើច​ចុកពោះ




ពូទិនហ្វី​ អ្នកបញ្ចូល​សំឡេង​តួស្ដេច​កំប្លែង ឲ្យ​ទស្សនិកជន​សើច​ចុកពោះ

Content image - Phnom Penh Post
លោក ជា ចាន់ប៉ូ ហៅ​ពូទិនហ្វី ជាអ្នក​បញ្ចូល​សំឡេង​ភាពយន្ដ​ ជាពិសេស​តួអង្គ​ទិនហ្វី​។ Eli Lillis

ពូទិនហ្វី​ អ្នកបញ្ចូល​សំឡេង​តួស្ដេច​កំប្លែង ឲ្យ​ទស្សនិកជន​សើច​ចុកពោះ

ភ្នំពេញ: ខណៈ​ទសវត្សរ៍ ៦០ និង ៧០ ឧស្សាហកម្ម​ភាពយន្ដ​ខ្មែរស្ទុះ​ឡើងខ្លាំង​សម្រាប់​ជាគំរូ​ដល់តារា​សម័យ​ក្រោយ ទំនោរ​និយម​ទស្សនា​ភាពយន្ដ​បរទេស​របស់​ក្មេងកើត​ក្រោយ​សង្គ្រាម​បង្កើត​បានជា​ឧស្សាហកម្ម​ថ្មីមួយ នោះគឺ តារា​លេង​សំឡេង​ដែល​បញ្ចូល​សំឡេង​ឲ្យតួអង្គ​យ៉ាង​ស្ទាត់ជំនាញ។

ការបញ្ចូល​សំឡេង​ក្នុង​ភាពយន្ដ​ផ្ដើមនៅ​កម្ពុជា​ក្នុង​ទសវត្សរ៍ទី ៥០ ក្រោម​លម្ហូរ​នៃ​ភាពយន្ដ​ថៃ និង​ឥណ្ឌា។ សិល្បករ​ផ្នែក​បញ្ចូល​សំឡេង​ដំបូង​បំផុត​គឺជាបុរស​ឈ្មោះ អ៊ូ ផូ ដែល​ជួយ​បណ្ដុះបណ្ដាល​សិស្ស​ដំបូង។

ប៉ុន្ដែ​សិល្បករ​បញ្ចូល​សំឡេង​ក្រោយ​សម័យ​ខ្មែរក្រហម​ម្នាក់អាយុ ៥៥ ឆ្នាំ លោក ជា ចាន់ប៉ូ ដែល​មានតែ​ម្ដាយ ពុះពារ​ឆ្លងកាត់​របប​ប៉ុលពត។ ការអប់រំ​ត្រឹមតែ​ថ្នាក់​បឋមសិក្សា លោកបាន​បម្រើ​ការងារ​ជាអ្នក​បញ្ចាំងកុន​ឲ្យរដ្ឋាភិបាល​ថ្មី។

លោកថា៖ «ខ្ញុំជាអ្នក​បញ្ចាំង​កុនឲ្យ​ទាហាន​មើល​តាម​ខេត្ដ»។

ក្រោយមក លោកមក​រស់នៅក្នុង​ខណ្ឌ​ស្ទឹងមានជ័យ ជាទី​ដែល​លោកដើរ​ស្វែងរក​ភាពយន្ដ​ចាស់លើ​តំបន់​គំនរ​សំរាម​ក្នុងក្រុង រួច​បញ្ចាំង​ឲ្យមិត្ដ​ភក្ដិ និងបញ្ចូល​សំឡេង​ផ្ទាល់។

សម្រាប់​អាជីព​ដំបូងនេះ កង្វះខាត​បច្ចេកវិទ្យា​បង្ខំឲ្យ​រូបលោក​បញ្ចូល​សំឡេង​ផ្ទាល់​ក្នុងពេល​បញ្ចាំង។ លោកត្រូវ​ស្ពាយ​សៀវភៅ​អត្ថបទ​រឿង​តាមខ្លួន ៦០ ទំព័រ ហើយ​នៅពេល​លោក​ត្រូវបាន​ហៅមក​បញ្ចូល​សំឡេង លោក​ត្រូវនាំ​ទាំង​ក្រុមការងារ​ម្នាក់ទៀត​សម្រាប់​ភាពយន្ដ​រយៈពេល ៩០ នាទី​ពេញ។

វាអាចជា​ការងារ​នឿយហត់​ខ្លាំង ដោយ​លោកបាន​ពន្យល់ថា៖ «អ្នក​ត្រូវតែ​ចេះ​បត់បែន​ក្នុង​ការប្រើ​អារម្មណ៍ ទាំងការ​យំស្រែក សើច សប្បាយ ស្ងប់ស្ងាត់ ឬចរិត​ឈ្លើយ»។

ពេញមួយ​ទសវត្សរ៍​ទី ៨០ លោក ប៉ូ បាន​បញ្ចូល​សំឡេង​ភាពយន្ដ​ពីវៀតណាម សូវៀត និង​អាល្លឺម៉ង់​ខាងកើត។ ខណៈ​កម្ពុជា​បើកទំព័រ​ភាពយន្ដ​ក្នុង​ទសវត្សរ៍​ទី៩០ លោក​ក្លាយជា​តារា​បញ្ចូល​សំឡេង​ក្នុង​ភាពយន្ដ​ហុងកុង ជាពិសេស តួអង្គ​ស្ដេច​កំប្លែង និង​ជា​ផលិតករ ស្ដេហ្វិន ចូវ ឬ​ទិន ហ្វី។

លោកថា៖ «ខ្ញុំបញ្ចូល​គ្រប់រឿង​ទាំងអស់ តែ​ទស្សនិកជន​ស្គាល់ខ្ញុំ​ច្បាស់​តាមរយៈ​តួអង្គ​ទិន ហ្វី។ ដូច្នេះ ពួកគេ​ហៅថា ពូ​ទិន ហ្វី»។

១៥ ឆ្នាំ​មកនេះ តាំងពី​លោក​រៀបការ លោក ប៉ូ តែងតែ​ធ្វើការ​ជាមួយ​ភរិយា។ ពួកគេ​នាំ​ទាំងកូនៗ​ចូលប្រឡូក​ដោយ​ឲ្យជួយ​បកប្រែ​ភាសា​ពី​អង់គ្លេស។

លោកថា លោក​បញ្ចូល​សំឡេង​ភាពយន្ដ​រាប់រយ​រឿង​ហើយ។ លោកបាន​និយាយ​ក្នុង​បែប​សម្ដែង​បញ្ចូល​សំឡេងថា៖ «នៅថ្ងៃ​អនាគត ខ្ញុំចង់​បើក​បង្រៀន​ជំនាញ​បញ្ចូល​សំឡេង​ក្នុង​ភាពយន្ដ ប៉ុន្ដែ​ពេលនេះ ខ្ញុំក៏​ស្វាគមន៍​សិស្ស​ដែល​ចង់រៀន​ជំនាញ​នេះ​ផងដែរ។ ខ្ញុំ​រីករាយ​ក្នុងការ​ផ្ទេរ​ចំណេះដឹង​របស់ខ្ញុំ​ទៅកាន់​ពួកគាត់»៕

អត្ថបទគួរចាប់អារម្មណ៍