.jpg)
តារាសម្ដែង និងគ្រូក្បាច់គុនល្បុក្កតោ កញ្ញា ពេជ្រ ចរណៃ ទៅសួរសុខទុក្ខលោកតា ជ្រីង។ ហ្វេសប៊ុក
ក្រុងតាខ្មៅ: មិនមែនជាជីតា ឬឪពុកជាប់សាច់សាលោហិតនឹងគ្នាអ្វីសូម្បីតែបន្ដិច តែជាទំនាក់ទំនងដែលកើតចេញពីបទពិសោធក្នុងឆាកជីវិតកំព្រីកំព្រារបស់ខ្លួនឯងផ្ទាល់ ដែលឪពុកម្ដាយបានចែកឋានតាំងពីតូចក្រូចឆ្មារ កញ្ញា ពេជ្រ ចរណៃ ទួញយំសោកសង្វេគដោយក្ដីអាណិតអាសូរចំពោះជីវិតដ៏ទុរគតរបស់លោកតាម្នាក់ កំពុងរងាញ័រញាក់ក្នុងជម្រកខ្ទមរខេករខាក ខណៈដៃលើកប្រណមអរគុណទាំងមមីមមើ មិនដឹងថា កូនចៅនរណាមកយំក្រសោបឱបកាយ និងជួយយកអាសាខ្លួនក្នុងគ្រាកាន់តែដុនដាបនេះ។
លោកតា ជ្រីង អាយុ ៨៨ ឆ្នាំរស់នៅអាស្រ័យសំយាបផ្ទះអ្នកជិតខាងក្នុងភូមិប្រាសាទ ឃុំឈ្វាំង ស្រុកពញាឮ ខេត្ដកណ្ដាលរស់នៅឯកាដោយ ពឹងលើរបរដើរត្រុកៗ រើស អេតចាយដើម្បីចិញ្ចឹមក្រពះ។
ដោយមើលឃើញពីសកម្មភាពដើររើសសម្បកដបក្នុងសភាពល្ហិតល្ហៃរបស់លោកតាជរា ខណៈពេលកំពុងថតសម្ដែងភាពយន្ដស្ថិតនៅភូមិសាស្ដ្រស្រុកពញាឮ អ្នកសិល្បៈបានបាត់បង់ភាពកក់ក្ដៅពី ដើមទ្រូងឪពុកម្ដាយរូបនេះ ក៏ចាប់ផ្ដើមឈឺឆ្អាល និងតាមពីក្រោយដំណើររបស់លោកតារហូតដល់ខ្ទមកម្សត់។
ស្ថិតក្នុងសម្លៀកបំពាក់ឈុតសម្ដែងរ៉ូបពណ៌ខៀវបែកស្វាយតុបតែងមុខ មាត់ស្អាតខ្ញង់ កញ្ញា ពេជ្រ ចរណៃ ជាតារាសម្ដែង និងគ្រូគុនខ្មែរល្បុក្កតោ បាននិយាយថា៖ «ក្នុងភូមិលោកតារស់នៅនោះមាន ៧ គ្រួសារ សុទ្ធតែក្រីក្រ។ ប៉ុន្ដែលោកតាជួបការលំបាកខ្លាំងជាងគេ។ គាត់ធ្លាក់ខ្លួនឈឺអត់បានដើររើសសម្បកកំប៉ុងទៀតទេ។ អត់បាយក្រហាយទឹក ហើយគាត់ត្រូវទទឹកទឹកភ្លៀងរហូតដោយសារដំបូលខ្ទមធ្លុះធ្លាយ។ គាត់អត់បានសម្រាន្ដហើយខោអាវ និងមុងភួយរបស់គាត់សើមជោកទាំងអស់»។
ទោះបីជាបុរសចំណាស់នេះមិនមែនជាសាច់ឈាមអ្វីនឹងតារាសម្ដែងវ័យ ២៤ ឆ្នាំរូបនេះយ៉ាងណាក៏ដោយ ក៏កញ្ញា ចរណៃ បន្ដចំណាយពេលជាច្រើនថ្ងៃមើលថែទាំ និងផ្ដល់ថ្នាំសង្កូវ រហូតដល់សុខភាពលោកតាបានធូរស្បើយ។
ក្រៅពីសិល្បៈ ចរណៃ ឆ្លៀតធ្វើការងារមនុស្សធម៌។ ហ្វេសប៊ុក
ដ្បិតសុខភាពបានប្រសើរ ការជួយដល់តាចាស់វ័យ ៨៨ ឆ្នាំ នៅតែបន្ដ ដោយអ្នកគ្រូក្បាច់គុនល្បុក្កតោក្រមាមាសនៅវត្ដថាន់រូបនេះ លើកដៃប្រណមកៀរគរសុំជំនួយពីសប្បុរសជន គួបនឹងថវិកាផ្ទាល់ខ្លួន ត្រៀមរៀបចំសាងសង់ផ្ទះសមរម្យជូនលោកតាសម្រាប់ជ្រកភ្លៀង និងបាំងកម្ដៅថ្ងៃ។
កញ្ញាប្រាប់ថា៖ «យ៉ាងយូរ ៣-៤ ថ្ងៃផ្ទះតូចនឹងធ្វើការសាងសង់រួចរាល់។ ផ្ទះនោះសង់លើផ្ទៃដីរបស់ម្ចាស់ដី ដោយគាត់ក៏មានទឹកចិត្ដអាណិតលោកតាដែរ។ យើងក៏មានកិច្ចសន្យាតិចតួចដោយធានាថា លោកតាអាចរស់នៅក្នុងផ្ទះលើដីនោះរហូតដល់អស់អាយុជីវិត»។
ជាមួយនឹងទឹកចិត្ដមនុស្ស-ធម៌ដើរជួយពលរដ្ឋក្រីក្រត្រូវការជំនួយនៅតាមសហគមន៍ផ្សេងៗ តារាសម្ដែង ដែលធ្លាប់ជួបគ្រោះកាចស្ទើរអស់់អាយុពីបញ្ហាប្រឹសបេះដូង កញ្ញា ពេជ្រ ចរណៃ ក៏ទទួលបានការសង្គ្រោះពីសកម្មភាពសមុទ្រក្រោមទឹកប្រាក់វះកាត់ប្រមាណ ៤ ម៉ឺនដុល្លារផងដែរ។
តារាសម្ដែង ដែលមានទាំងសម្រស់ និងទឹកចិត្ដចំពោះទុរគតជនរូបនេះ បានសុំអំពាវនាវថា៖ «សុំឲ្យពុកម៉ែបងប្អូនសប្បុរសជនទាំងអស់ជួយចែករំលែកក្ដីស្រឡាញ់ និងទានដល់ពលរដ្ឋខ្វះខាតនៅគ្រប់ទីកន្លែងជាពិសេស សុំជួយលោកតាកំពុងជួបការលំបាកខ្លាំង ដើម្បីជួយសង់ផ្ទះជូនលោកតា»៕
