.jpg)
ឈុតមួយនៃការថតកុនដុំរឿង «ព្រលឹងល្បុក្កតោ» ដែលតារាស្រី ពេជ្រ ចរណៃ អវត្តមាន។ រូប ហ្វេសប៊ុក
ភ្នំពេញ៖ ថ្មីៗនេះតារាសម្តែងស្រីល្បី ដែលអាចសម្តែងបានគ្រប់ទម្រង់ និងចេះក្បាច់គុនល្បុក្កតោខ្មែរកញ្ញា ពេជ្រ ចរណៃ បានធ្វើឲ្យអ្នកប្រើប្រាស់បណ្តាញសង្គមភ្ញាក់ផ្អើលម្តងទៀត ជាមួយការបង្ហោះរូប ១ សន្លឹក បង្ហាញអារម្មណ៍នឹកអាល័យនាកាលដែលក្រុមសមាជិកសិស្សគុនល្បុក្កតោ ថតកុនដុំរឿង «ព្រលឹងល្បុក្កតោ» ហើយពេលនោះរូបនាងអវត្តមាន។
អ្វីដែលកើតក្តីងឿងឆ្ងល់ពីសំណាក់មហាជននោះគឺថា ក្នុងរូបថត ១ សន្លឹកនោះ បែរជាគ្មានរូបកញ្ញា ពេជ្រ ចរណៃ តែហេតុអ្វីបានជានាងបង្ហោះវា ហើយថែមទាំងក្លែមសារមួយឃ្លាដែរថា៖ «ថតនៅសម័យនេះ តែរំឭកដល់រាប់រយឆ្នាំមុន»។
តារាសម្តែងស្រី និងជាពិធីការិនីរូបស្រស់វ័យ ២៥ ឆ្នាំរូប នេះ ប្រាប់ភ្នំពេញប៉ុស្តិ៍ ទាក់ទងនឹងរឿងនេះភ្លាមៗថា៖ «តាមពិតទៅរូបនេះយូរហើយបង តែខ្ញុំទើបតែយកមកផូស្តវាថ្មីៗនេះ ដោយសារចង់រំឭករឿងកាលពីពេលក្រុមសិស្សគុនល្បុក្កតោថតកុនដុំមានចំណងជើងថា «ព្រលឹងល្បុក្កតោ» ដែលជាការថតកុនមួយមានតួសម្តែង គឺសុទ្ធសឹងជាសិស្សគុនល្បុក្កតោខ្មែរ។ ពេលនោះ នាងខ្ញុំមិនបានថតឡើយ ដោយសារតែនាងខ្ញុំមានជំងឺបេះដូងមិនអាចថតបាន ខណៈដើមឡើយនាងខ្ញុំក៏ត្រូវគេឲ្យថតកុននេះដែរ»។
កញ្ញា ពេជ្រ ចរណៃ បានបន្តថា៖ «កុននោះ គឺជាកុនដុំដែលមានរយៈពេលជាង ១ ម៉ោង ហើយក៏ជិតចាក់បញ្ចាំងតាមរោងកុននានាហើយដែរ ក៏ប៉ុន្តែដោយសារបញ្ហាជំងឺកូវីដ ១៩ បានរីករាលដាលខ្លាំង ទើបខាងរោងកុនទាំងអស់ត្រូវបានផ្អាកបើកការរកស៊ី ទើបរឿងកុននោះក៏ត្រូវពន្យារពេលផងដែរ។ ចំពោះអត្ថន័យនៃកុនរឿង «ព្រលឹងល្បុក្កតោ» នេះគឺមានន័យចង់និយាយពីដំណើរនៃការកកើតក្បាច់គុនខ្មែរល្បុក្កតោនេះ នៅក្នុងភូមិមួយ នាសម័យកាលបុរាណដ៏យូរលង់មកហើយ»។
ក្រោយឆ្លងកាត់ដំណាក់កាលស្ទើរអស់ជីវិតលើគ្រែពេទ្យ តារាសម្តែងស្រីថ្ពាល់ខួច កញ្ញា ពេជ្រ ចរណៃ ដែលអាស្រ័យសទ្ធាសប្បុរសជនក៏បានថវិកាវះកាត់ជំងឺបេះដូងប្រហោងជោគជ័យអស់រយៈពេលច្រើនខែ និងក្រោយមកទៀតក៏ត្រូវមហាជនកោតសរសើររឿងនាងប្រកាសមិនទទួលថតស្ប៉តផ្សព្វផ្សាយជាតិស្រវឹងជាសាធារណៈក្នុងបណ្តាញសង្គមថា៖ «សូមប្រកាសថា ខ្ញុំមិនទទួលថត ឬផ្សព្វផ្សាយគ្រឿងស្រវឹងទេ។ តាំងពីដើមមក នាងខ្ញុំមិនដែលទទួលថតផ្សព្វផ្សាយគ្រឿងស្រវឹងនោះទេ ប៉ុន្តែកន្លងមកខ្ញុំបានត្រឹមតែបដិសេធមិនបើកចំហដោយសារនៅតែមានការទាក់ទងមកខ្ញុំ ដើម្បីឲ្យថតផ្សព្វផ្សាយបែបនេះទៀត ទើបខ្ញុំសម្រេចចិត្តប្រកាសជាសាធារណៈដូច្នេះតែម្តងទៅតាមបណ្តាញសង្គម»៕
