បាត់ដំបងៈ តារាចម្រៀងវ័យក្មេងជាអតីតបេក្ខជនទទួលបានជយលាភីពីកម្មវិធីប្រឡងចម្រៀងលំដាប់ពិភពលោក The Voice Kid Cambodia រដូវកាលទី ១ ពេជ្រ ថៃ នៅតែមានសន្ទុះខ្លាំងក្នុងអាជីពជាតារាចម្រៀង និងកាន់តែមានប្រជាប្រិយភាព ដោយសារតែសម្បូរវោហារ និងភាពក្រមិចក្រមើម។
ម្ចាស់ពានកម្មវិធីប្រឡងចម្រៀងថ្នាក់ពិភពលោកសម្រាប់កុមារដែលទទួលបានការបោះឆ្នោតគាំទ្រច្រើនជាងគេពីមហាជនខ្មែរទាំងក្នុង និងក្រៅប្រទេសមានទាំងទេពកោសល្យក្នុងការច្រៀងគួបផ្សំជាមួយភាពកំប្លុកកំប្លែងធ្វើឲ្យទស្សនិកជនសើចបិទមាត់មិនជិត ពេជ្រ ថៃ ដូចជាមានការកាក់កបខ្លាំងក្នុងវិស័យសិល្បៈ។
ទោះបីខ្លួននៅក្មេងតែអាចស្រូបចំណូលពីវិស័យសិល្បៈឲ្យឪពុកម្ដាយធ្លាយរហូតដល់មីង ដែលទើបតែធ្វើពិធីឡើងគេហដ្ឋានថ្មីកាលពីថ្ងៃទី ២៦ ខែមីនាកន្លងទៅថ្មីៗនេះ។
តារាចម្រៀងវ័យក្មេងរូបនេះបានផ្តល់បទសម្ភាសមកកាន់ភ្នំពេញប៉ុស្តិ៍ទាក់ទងជាមួយផ្ទះថ្មីដែលទើបនឹងប្រារព្ធពិធីហើយថា៖ «ផ្ទះនឹងខ្ញុំធ្វើឲ្យមីង ហើយខ្ញុំធ្លាប់បានធ្វើហើយមួយហើយ។ អ៊ីចឹងពេលខ្ញុំចង់មកគេងនៅផ្ទះខាងនេះក៏បានផ្ទះខាងនោះក៏បានដែរ»។
ពេជ្រ ថៃ បានឲ្យដឹងទៀតថា៖ «ការចំណាយវិញអស់ជាង ១ ម៉ឺនទេ តែមីងគាត់មិនឲ្យខ្ញុំចេញទាំងអស់ទេគឺគាត់ជួយចេញខ្លះដែរ»។
តារាតូចច្រមក់រូបនេះបានរំឭកដូច្នេះថា៖ «កាលប្រឡងយើងត្រូវចំណាយអស់ច្រើន ត្រូវខ្ចីលុយគេផងហើយត្រូវលក់គោអស់ ២ នឹមទៀត ព្រោះត្រូវឡើងចុះទៅមកភ្នំពេញដើម្បីប្រឡង អ៊ីចឹងហើយបានត្រូវចំណាយអស់ច្រើន តែនៅពេលនេះខ្ញុំបានសងលុយគេរួចហើយ»។
ដោយទទួលស្គាល់ថាខ្លួនមានជីវភាពធូរធារគ្រាន់បើហើយនោះ ពេជ្រ ថៃ ជាតារាចម្រៀងប្រុសវ័យក្មេងជោគជ័យក្នុងវិស័យសិល្បៈអាជីពជាតារាចម្រៀងក៏មានរថយន្តជិះផ្ទាល់ខ្លួនដែរដោយមានកូនប្រុសរបស់ម្តាយមីងជាអ្នកជូនទៅមកពេលទៅបំពេញការងារនៅតាមខេត្តក៏ដូចជានៅភ្នំពេញជាដើម។
ក្នុងឆ្នាំនេះដែរ តារាចម្រៀងមាឌតូច ចូលចិត្តធ្វើឲ្យអ្នកទស្សនាសើចសប្បាយមិនចេះជិនណាយ ពេជ្រ ថៃ កំពុងតែរៀនត្រៀមប្រឡងសញ្ញាបត្រមធ្យមសិក្សាបឋមភូមិ និងរៀនត្រៀមសម្រាប់ប្រឡងសិស្សពូកែអក្សរសាស្ត្រខ្មែរផងដែរ។
សម្រាប់ពិធីបុណ្យចូលឆ្នាំខាងមុខនេះ ពេជ្រ ថៃ ក៏មានបទចម្រៀងចំនួន ៣ បទដែលបទទី ១ ចាប់ដៃគូជាមួយលោក Step និងអតីតបេក្ខភាពរួមជំនាន់ប្រកួត ឡុង លីគ័ង្គ «បុកបាស» បទទី ២ ចាប់ដៃគូជាមួយ ឡុង លីគ័ង្គ រួមជាមួយម្ចាស់ពានរដូវកាលទី ២ ទេព ពិសិដ្ឋ «នំបញ្ចុកយាយខ្ញុំ» និងបទចុងក្រោយនៅមិនទាន់ចេញ MV នៅឡើយទេ។
បន្ទាប់ពីបានទទួលជយលាភីក្នុងការប្រឡងរយៈពេលជិត ២ ឆ្នាំមកសម្ទុះនៃការគាំទ្រពីមហាជនរបស់តារាវ័យក្មេងរូបនេះ គឺនៅតែមានជាបន្តបន្ទាប់ និងមានការចូលរួមក្នុងការប្រគំតន្ត្រីធំៗស្ទើរតែគ្រប់កម្មវិធីផងដែរ៕