.jpg)
តារាចម្រៀងកញ្ញា ពេជ្រ សូលីកា និងលោក នីកូ។ រូបថត ហ្វេសប៊ុក
ភ្នំពេញ: រំពេចពីឱកាសមាសឱកាសប្រាក់របស់ តារាចម្រៀងមុខស្រស់ លោក នីកូ ដែលសម្រេចបានឱកាសឡើងទៅជាន់កាំជណ្តើរផលិតកម្មហង្សមាស ជួបជុំប្រុសបង្កើត លោក ណុប ប៉ាយ៉ារិទ្ធ ភ្លាមៗនោះដែរ អ្នកគាំទ្រតារាចម្រៀង នីកូ ក៏នឹកដល់ដៃគូសម្តែងឥតខ្ចោះរបស់លោក គឺកញ្ញា ពេជ្រ សូលីកា ថា តើ នីកូ អាចទាញនាងចូលបានដែរទេ បើហង្សមាសក៏ចាប់អារម្មណ៍លើរូបសម្ផស្សនាងដែរនោះ។
គួរររំឭកថា ពេជ្រ សូលីកា ជាដៃគូចម្រៀងសម្ដែងជាមួយលោក នីកូ ដ៏សាកសមជាងគេក្នុងចំណោមតារាយុវវ័យ តាំងពីពួកគេធ្លាប់ជ្រកកោននៅផលិតកម្ម M ជាមួយគ្នាម្លេះ។ តែថ្មីៗនេះលោក នីកូ បានចាកចេញពីផលិតកម្មសាន់ដេទៅចូលរួមជាមួយផលិតកម្មរស្មីហង្សមាស ទើបធ្វើឲ្យអ្នកគាំទ្រតារាចម្រៀងទាំង ២ ចង់ឃើញតារាស្រីស្អាត និងប្រុសសង្ហាររូបនេះចាប់ដៃគូរគ្នាសាជាថ្មីឡើងវិញម្ដងទៀត នៅផលិតកម្មរស្មីហង្សមាស។
អ្នកគាំទ្រពួកគេបង្ហាញការជឿជាក់ថា «អ្នកទាំងពីរ នឹងមានភាពលេចធ្លោរជាថ្មីឡើងវិញជាមិនខាន»។
ទន្ទឹមនោះដែរក៏មានមតិជាច្រើន លើកឡើងក្នុងភាពអន្ទះសារចង់ដឹងថា «តើហង្សមាស នឹងព្រមទទួលយក ពេជ្រ សូលីកា សារជាថ្មីដែរ ឬទេ បើមុននេះ ស្រីស្អាតរូបនេះក៏ធ្លាប់ធ្វើឲ្យហង្សមាស បាក់មុខម្តងហើយនោះ?»។
តាមប្រភពពីអ្នកជិតដិតបំផុតជាមួយផលិតកម្មរស្មីហង្សមាសបានបង្ហើបឲ្យដឹងថា៖ «ហង្សមាស នៅតែចាប់អារម្មណ៍លើស្រីស្អាតរូបនេះអ៊ីចឹងទៅលើរូបសម្រស់ ហើយថាបើ ពេជ្រ សូលីកា ចូលថតភាពយន្ដនឹងល្បីជាថ្មីមិនខាន»។
តែយ៉ាងណា បុគ្គលិតធ្វើការនៅផលិតកម្មហង្សមាសម្នាក់អះអាងថា៖ « ហង្សមាសមិនមានគម្រោងយក ពេជ្រ សូលីកា ចូលធ្វើជាអ្នកចម្រៀងសារជាថ្មីឡើយព្រោះថា ពេលនេះតារាចម្រៀងដែលមាននៅក្នុងដៃហង្សមាសគឺមានសមត្ថភាពច្រើនណាស់ អ៊ីចឹងគេខ្លាចយក ពេជ្រ សូលីកា ទៅជាន់ដានចាស់»។
កញ្ញា ពេជ្រ សូលីកា និងលោក នីកូ។ រូបថត ហ្វេសប៊ុក
តារាចម្រៀង ពេជ្រ សូលីកា ធ្លាប់ធ្វើឲ្យផលិតកម្មរស្មីហង្សមាសខកចិត្តដោយសារតែបទចម្រៀងរបស់នាងដែលថតជា MV ហើយជាមួយលោក ឆន សុវណ្ណរាជ នោះត្រូវលុបចោលទាំងអស់ព្រោះ សូលីកា ទៅចុះកុងត្រាជាន់គ្នានៅផលិតកម្មរ៉ុក ដោយចម្រូងចម្រាស។
យ៉ាងណាក្រៅពីផលិតកម្មហង្សមាសនោះ ពេជ្រ សូលីកា នៅមានផលិតកម្ម ២ ផ្សេងទៀតដែលចាប់អារម្មណ៍លើរូបនាងគឺសាន់ដេ និងថោន។
ប៉ុន្តែតារាចម្រៀងលេចធ្លោខាងសម្ផស្សជាងសំនៀង កញ្ញា ពេជ្រ សូលីកា បែរជាលេចវត្តមានសិល្បៈ ដោយច្រៀងដោយគ្មានផលិតកម្មទៅវិញ។
ទន្ទឹមនឹងនោះ ថៅកែស្រី ហាងបាយអូនអ៊ូក រូបនេះមានភាពហ៊ឺហារខ្លាំងទាំងការលេងម៉ូដរថយន្ដទំនើបៗនិងប្រើប្រាស់សម្ភារៈម៉ាកល្បីៗ មិនចាញ់កំពូលតារាចម្រៀងល្បីជ្រកក្រោមទ្រនំផលិតកម្មធំៗឡើយ៕
តារាចម្រៀង ពេជ្រ សូលីកា ថតឲ្យសម្អាងការ។ រូបថត ហ្វេសប៊ុក
