.jpg)
លោក នីកូ និងកញ្ញា ពេជ្រ សូលីកា នាពេលថតសម្តែងឈុតនានាក្នុងកុនភាគរឿង «អាពាហ៍ពិពាហ៍ចៃដន្យ» របស់ផលិតកម្មហង្សមាស។ ហ្វេសប៊ុក
ភ្នំពេញៈ ក្រោយពីក្តាប់បានឱកាសក្លាយជាតួឯកស្រីក្នុងការថតកុនភាគដំបូង របស់ផលិតកម្មហង្សមាស ជាមួយនឹងដៃគូចម្រៀងប្រុសលោក នីកូ ដែលកំពុងដំណើរការថតបណ្តើរៗទៅហើយនោះ ក៏ស្រាប់តែឃើញអតីតតារាចម្រៀងស្រី ស្រស់សោភាកញ្ញា ពេជ្រ សូលីកា បង្ហើរសារបែបទើសចិត្តខ្លាំងទៅនឹងអ្នករិះគន់លើខ្សែភាពយន្តរឿង «អាពាហ៍ពិពាហ៍ចៃដន្យ» ដែលចោទថាជាកុនចម្លងពីថៃ។
ការចោទប្រកាន់ចំៗចេញពីក្រុមប្រិយមិត្តបណ្តាញសង្គមនិយមទំនោររិះគន់ ចំពោះស្នាដៃភាពយន្តនានា ដែលពួកគេធ្លាប់ដឹង ឬ បានទស្សនាភាពយន្ត ដែលមានលក្ខណៈស្រដៀងគ្នានឹងប្រទេសជិតខាងដូចជាថៃ ជាដើមនោះបង្កើតជាសាររិះគន់ថា៖ «កុននេះគេបានថតរួចទៅហើយ ម៉េចបានជាចម្លងពីគេមកថតទៀតអ៊ីចឹង? ម៉េចមិនចេះរកស្នាដៃណា ដែលនិពន្ធដោយខ្លួនឯងបានទេឬ?»។
បើតាមមើលទៅទំនងជាមានការទើសចិត្តខ្លាំងនឹងពាក្យចោទប្រកាន់ខ្លួនថា ចម្លងស្ទីលសម្តែងពីកុនគេនោះ ទើបអតីតតារាចម្រៀងស្រីហង្សមាស ដែលមិនទាន់មានឱកាសមកជ្រកក្រោមទ្រនំចាស់ ក្នុងអាជីពចម្រៀង តែសំណាងល្អ ឆក់បានលាភធំថតកុនជំនួសវិញនោះ បង្ហោះសារតបតអ្នករិះគន់ថា៖ «Dear hater សូមមេត្តាជ្រាប!គ្រប់គ្រាន់នៅ? ខ្ញុំមិនមែនថ្មទេ ខ្ញុំចេះហត់!»។
យ៉ាងណា តារាស្រីធ្លាប់បានសម្រេចចិត្តដើរចេញពីសិល្បៈក្រោយពីបែកធ្លាយរឿងឈឺចាប់ត្រូវបានសង្សារលាក់មុខដកយករថយន្តទំនើបម៉ាក Lexus LS 460 ពណ៌ទឹកសមុទ្រតម្លៃប្រហែល ១១ ម៉ឺនដុល្លារ ហើយក៏ប្តូរមកជិះ Lexus RX 300 ពណ៌សចាស់ តម្លៃជិត ១ ម៉ឺនដុល្លារ វិញនោះក៏មិនបានបកស្រាយលម្អិតពីមូលហេតុនាំឲ្យនាងរង្កៀសចិត្តឡើយ ដោយប្រព័ន្ធទូរស័ព្ទទាក់ទងចូលតែគ្មានអ្នកទទួល។
តែបើតាមការរៀបរាប់ពីតារាសម្តែង និងចម្រៀងប្រុសរូបសង្ហា លោក នីកូ ដែលជាតួឯកប្រុសក្នុងកុនភាគរឿង «អាពាហ៍ពិពាហ៍ចៃដន្យ» ដែរនោះបានពន្យល់ហេតុលើការភាន់ច្រឡំរបស់ប្រិយមិត្តជាក្រុមអ្នករិះគន់ថា៖ «បងប្អូនដែលរិះគន់រឿងនេះថាជាការចម្លងពីខ្សែភាពយន្ដថៃនោះមិនត្រឹមត្រូវឡើយ។ តាមពិតទៅរឿងនេះ មានប្រភពដើមនៅប្រទេសចិន ដែលក្រោយមកមានប្រទេសកូរ៉េ ទិញសិទ្ធិយកមកសម្រួលថតជាកុនកូរ៉េ ហើយបន្ទាប់ប្រទេសថៃ ក៏បានទៅទិញសិទ្ធិថតដែរ។ ទំនងជាពួកគាត់មិនបានជ្រាបពីឫសគល់នៃរឿង ហើយបានទស្សនាតែភាពយន្តថៃ ទើបចោទថាខ្មែរយើងចម្លងពីថៃបែបនេះ»។
តារាចម្រៀងប្រុសរូបសង្ហា ទើបតែដូរពីទ្រនំចាស់សាន់ដេ មកទ្រនំថ្មីហង្សមាស នីកូ បានបន្តថា៖ «ខ្មែរយើង ក៏បានទិញសិទ្ធិពីចិនថតដូចជាប្រទេសខាងលើដែរ យើងមិនបានចម្លងពីថៃទេ។ សូម្បីតែអ្នកនិពន្ធរឿងនេះ ក៏យើងបានរក្សានូវឈ្មោះអ្នកនិពន្ធចិនផងដែរគឺយើងមិនបានលួចចម្លងគេទេ»៕
