.jpg)
បុរសដែលកញ្ញា សូលីកា បណ្តើរទៅវត្តនាពេលថ្មីៗ ជាប់មន្ទិលថាជាគូស្នេហ៍ថ្មីរបស់នាង។ រូប ហ្វេសប៊ុក
ភ្នំពេញ៖ ក្រោយពីវិលចូលមកទ្រនំផលិតកម្មហង្សមាសវិញ មិនទាន់បានប៉ុន្មានផងនោះ តារាចម្រៀងស្រីស្រស់ សម្រស់កាន់តែស្អាតផូរផង់ សាច់សខ្ចីកញ្ញា ពេជ្រ សូលីកា ឧស្សាហ៍បង្កើតភា្ញក់ផ្អើល និងទាក់ទាញចំណាប់អារម្មណ៍មហាជនតែម្តង ជាពិសេសរឿងបង្ហាញវត្តមានមុខមាត់បុរសជាគូស្នេហ៍ថ្មី។
ស្របពេលក្នុងរដូវកាលបុណ្យភ្ជុំបិណ្ឌតាមទំនៀមខ្មែរ ស្រាប់តែកញ្ញា ពេជ្រ សូលីកា អតីតម្ចាស់ហាងបាយ «អូនអ៊ូក» រំលេចរូបថតនាំបុរសរូបសង្ហាម្នាក់ទៅអុចធូបសំពះព្រះក្នុងព្រះវិហារ ហាក់ដូចជាគូស្នេហ៍ថ្មីថ្មោងបណ្តើរគ្នាទៅធ្វើបុណ្យនាពេលថ្មីៗនេះ ក៏ត្រូវមហាជនលើកយកមកជជែកគ្នាមួយរំពេចថា៖ «អ៊ីយ៉ា! កញ្ញា ពេជ្រ សូលីកា គ្រាន់តែវិលចូលមកច្រៀងនៅផលិតកម្មហង្សមាសវិញភ្លាម ក៏មានម្ចាស់ចិត្តថ្មីភ្លែតតែម្តង! តើបុរសសង្ហារូបនេះ ជាអ្នកណាទៅហ្ន? ជាអ្នកសិល្បៈ ឬនៅក្រៅសិល្បៈ?»។
មុននេះបន្តិចមានការភ្ញាក់ផ្អើលម្តងហើយ រឿងការទម្លាយបណ្តុំរូបថត Pre-Wedding ជាច្រើនសន្លឹកបានធ្វើឲ្យមហាជនលាន់មាត់គ្រប់គ្នាថា៖ «អុញនោះ! ស្ងាត់ៗ ស្រាប់តែឃើញតារាចម្រៀងស្រីកញ្ញា ពេជ្រ សូលីកា មកទម្លាយរូបថត Pre-Wedding ជាច្រើនសន្លឹកហាក់ចង់បង្ហើបប្រាប់ឲ្យមហាជនបានដឹងថា នាងកំពុងតែត្រៀមខ្លួនចូលរោងការហើយមើលទៅហ្ន? ខណៈតារាស្រីស្អាតរូបនេះ ខណៈពេលកន្លងមកក៏ល្បីដែរថា មានក្រុមកន្លង់ច្រើនណាស់ កំពុងតាមសុំធ្វើជាម្ចាស់បេះដូងនោះ!»។
តែចំពោះបណ្តុំរូបថត Pre-Wedding ទាំងនោះ ត្រូវបានគេដឹងថា តារាចម្រៀងស្រីជ្រកទ្រនំផលិតកម្មហង្សមាស កញ្ញា ពេជ្រ សូលីកា ក្នុងពេលថ្មីៗនេះ គឺនាង និងលោក មូល សារ៉ាវ៉ាន់ ដែលជាពិធីករទូរទស្សន៍ PNN គឺបានថតព្រីវីឌីងឲ្យស្ទូឌីយោមួយមានឈ្មោះថា «Image Hunter Photography» ស្ថិតនៅក្នុងទីក្រុងភ្នំពេញ។
ដោយឡែកចំពោះវត្តមានមុខមាត់បុរសសង្ហាថ្មី ដែលបានបង្ហាញក្នុងរដូវបុណ្យភ្ជុំបិណ្ឌនេះ ក៏មិនត្រូវបានតារាចម្រៀងស្រី ពេជ្រ សូលីកា បកស្រាយឲ្យដឹងថា ត្រូវជាអ្វីនឹងខ្លួនឡើយផងដែរ ខណៈភ្នំពេញប៉ុស្តិ៍ក៏មិនអាចសុំការបញ្ជាក់ពីនាងបានទេពេលទំនាក់ទំនងតាមទូរស័ព្ទ។
តារាចម្រៀងស្រី ដែលមហាជនធ្លាប់យល់ច្រឡំថា នាងក៏មានទំនាក់ទំនងជាមួយនឹងតារាចម្រៀងប្រុសសំឡេងផ្អែម លោក ណុប សម្បត្តិនីកូ ហៅ នីកូ បានលើកទូរស័ព្ទ ហើយក៏បានឆ្លើយយ៉ាងខ្លី ខណៈពេលសួររឿងបណ្តើរបុរសសង្ហានោះថា៖ «សុំទោសផងបង! ពេលនេះ ខ្ញុំកំពុងតែរវល់ថត ហើយចាំទំនេរ ចាំនាងខ្ញុំតេទៅបងវិញ» ក្រោយពីបានប្រាប់ឲ្យដឹងថាសារព័ត៌មាន និងចង់សុំការបកស្រាយនូវចម្ងល់ខាងលើ ហើយនាងក៏បានបិទទូរស័ព្ទមួយរំពេច និងផ្ញើសារតបថា៖ «Call u later, I''m busy»៕
