The Phnom Penh Post Search

Search form




Logo of Phnom Penh Post newspaper Phnom Penh Post - ពេជ្រ សោភា និង ទេព បូព្រឹក្ស ស្ម័គ្រចិត្ត​ច្រៀង​ឥត​គិតថ្លៃ​នៅ​រាត្រី​ផ្សព្វផ្សាយ​ពី​មហារីក​សុដន់




ពេជ្រ សោភា និង ទេព បូព្រឹក្ស ស្ម័គ្រចិត្ត​ច្រៀង​ឥត​គិតថ្លៃ​នៅ​រាត្រី​ផ្សព្វផ្សាយ​ពី​មហារីក​សុដន់

Content image - Phnom Penh Post
សកម្មភាព​រាំ​ក្នុង​ការ​ប្រគំ​តន្ត្រី​កាល​ពី​ឆ្នាំ​មុន។ ហុង មិនា

ពេជ្រ សោភា និង ទេព បូព្រឹក្ស ស្ម័គ្រចិត្ត​ច្រៀង​ឥត​គិតថ្លៃ​នៅ​រាត្រី​ផ្សព្វផ្សាយ​ពី​មហារីក​សុដន់

ភ្នំពេញ: តារា​ចម្រៀង​ស្រី​ល្បី​ពីរដួង​ពី​ទ្រនំ​ហង្សមាស​គឺ​អ្នកនាង ពេជ្រ សោភា និង​កញ្ញា ទេព បូព្រឹក្ស នឹង​ស្ម័គ្រចិត្ត​ចូលរួម​ច្រៀង​សម្ដែង​ដោយ​ឥត​គិតថ្លៃ ក្នុង​ព្រឹត្តិការណ៍​សប្បុរសធម៌ Fit for Hope ជាមួយ AIA នៅ​ថ្ងៃ​ទី ២១ ខែ​តុលា ចុង​សប្ដាហ៍​នេះ នៅ​ទីលាន​កីឡា Central Park Sports Complex បឹងកក់ ដើម្បី​លើក​កម្ពស់​ការ​យល់ដឹង​ពី​ជំងឺ​មហារីក​សុដន់​ដែល​ធ្វើឲ្យ​ស្ត្រី​កម្ពុជា​ប្រមាណ ៥០០ នាក់​បាត់បង់​ជីវិត​ជា​រៀងរាល់​ឆ្នាំ។

ខែ​តុលា ត្រូវ​បាន​សម្គាល់​ជា​អន្តរជាតិ​ថា ជា​វេលា​ផ្សព្វផ្សាយ និង​លើក​កម្ពស់​ការ​យល់ដឹង​ពី​ជំងឺ​មហារីក​សុដន់​ទូទាំង​ពិភពលោក។ បើ​យោង​តាម​អង្គការ​សុខភាព​ពិភពលោក ជំងឺ​ដ៏កាច​សាហាវ​នេះ​បាន​យាយី​ជីវិត​ស្ត្រី ពិសេស​នៅ​ប្រទេស​មាន​ចំណូល​ទាប​តែម្ដង។

នៅ​ប្រទេស​កម្ពុជា មន្ទីរពេទ្យ​ព្រះសីហនុ មជ្ឈមណ្ឌល​នៃ​ក្ដីសង្ឃឹម (SHCH) ដែល​បាន​ផ្ដល់​សេវា​សុខភាព​ឥត​គិតថ្លៃ​ដល់​ប្រជាជន ១,៣ លាន​នាក់ គិត​ត្រឹម​ខែ​កក្កដា ឆ្នាំ ២០១៧ នេះ ក៏ដើរ​តួនាទី​សំខាន់​ក្នុងការ​ពិនិត្យ និង​ផ្ដល់​ប្រឹក្សា​លើ​ជំងឺ​មហារីក​សុដន់​ផងដែរ។

លោក ហាក់ បញ្ញារ័ត្ន ប្រធាន​ផ្នែក​ទំនាក់ទំនង​សាធារណៈ និង​ទីផ្សារ នៃ​ក្រុមហ៊ុន AIA បាន​ឲ្យដឹង​ថា៖ «ដោយសារ​តែ​យើង​ឃើញ​ថា​ខាង​មន្ទីរពេទ្យ​ព្រះសីហនុ​ហ្នឹង​តែង​តែ​ជួយ​ពិនិត្យ​អ្នក​កើត​ជំងឺ​មហារីក​រាប់ពាន់​នាក់​ដោយ​ឥត​គិតថ្លៃ ហើយ​ខាង​មន្ទីរពេទ្យ​ក៏ត្រូវ​ការ​ជំនួយ​បន្ថែម ដូច្នេះ​យើង​ក៏​រៀបចំ​ព្រឹត្តិការណ៍​សប្បុរសធម៌ Fit for Hope ជាមួយ AIA នេះ​ឡើង»។

Content image - Phnom Penh Post
តារាចម្រៀង​និយម​ស្លៀក​ពាក់​ប្លែកៗ និង​ពូកែ​ក្បាច់រាំ កញ្ញា ទេព បូព្រឹក្ស​និង​អ្នកនាង​ពេជ្រ សោភា។

យោងតាម ប្រធាន​ផ្នែក​ទំនាក់​ទំនង និង​ទីផ្សារ រូបនេះ ព្រឹត្តិការណ៍​ក៏ផ្ដល់​ជូន​នូវការ​ពិនិត្យ​រក​ជំងឺ​មហារីក​សុដន់​ដោយ​ឥត​គិតថ្លៃ ការ​ធ្វើ​លំហាត់​ប្រាណ​យោគៈ និង​ការរាំ Zumba ជាមួយ​គ្រូ​ជំនាញ​ផ្ដល់ជូន​ពី​ក្លិប​ហាត់ប្រាណ​លំដាប់​ខ្ពស់ The Place ផងដែរ។

ដើម្បី​ញ៉ាំង​ឲ្យ​បរិយាកាស​កាន់តែ​រីករាយ លោក ហាក់ បញ្ញារ័ត្ន បាន​បញ្ជាក់​ឲ្យដឹង​ថា៖ «ក្រុមហ៊ុន​បាន​សហការ​ជាមួយ​តារា​ចម្រៀង ពេជ្រ សោភា កញ្ញា ទេព បូព្រឹក្ស ក្រុម SmallWorld, SmallBand និង​កញ្ញា ចិត្ត កញ្ចនា ដែល​ពួកគាត់​បាន​ស្ម័គ្រចិត្ត​មក​ច្រៀង​ដោយ​មិន​បាន​គិតថ្លៃ​ឡើយ ដើម្បី​ប្រមូល​ថវិកា​បរិច្ចាគ​ជូន​មន្ទីរពេទ្យ ព្រះសីហនុ មជ្ឈមណ្ឌល​នៃ​ក្ដីសង្ឃឹម»។

សម្រាប់​សកម្មភាព​ដទៃ​ទៀត​ចាប់​ពី​ម៉ោង ៨ ព្រឹក ដល់​ម៉ោង ៨ យប់ នៅ​ថ្ងៃ​ទី ២១ ខែ​តុលា​ខាងមុខ​នេះ លោក​ក៏បាន​រៀបរាប់​ឲ្យដឹង​ផងដែរ​ថា៖ «នៅ​ពេល​ព្រឹក មាន​ការផ្ដល់​ជូន​នូវការ​ពិនិត្យ​ជំងឺមហារីក​សុដន់​ដោយ​ឥត​គិតថ្លៃ​ពី​គ្រូពេទ្យ​ជំនាញ ហើយ​បើ​ស្ត្រី​ដែល​ទៅ​ចូលរួម​នោះ គាត់​មានការ​អៀនខ្មាស ខាង​ក្រុមហ៊ុន AIA នឹង​ផ្ដល់​ជូន​នូវ Coupon ឲ្យ​គាត់​ទៅ​ពិនិត្យ​នៅ​មន្ទីរពេទ្យ​ផ្ទាល់​តែម្ដង។ កម្មវិធី​បន្ទាប់ មានការ​រៀបចំ​ជាស្តង់​ពណ៌​ផ្កាឈូក ដែល​លក់​ផលិតផល ចំណី​អាហារ វត្ថុ​អនុស្សាវរីយ៍ និង​មាន​លក់​អាវយឺត​ពណ៌​ផ្កាឈូក និង​បូ តម្លៃ ២៥ ០០០ រៀល សម្រាប់​ពាក់​ចូលរាំ Zumba និង​ហាត់​យោគៈ​ដោយ​ឥត​គិតថ្លៃ ហើយ​ថវិកា​បាន​ពីការ​លក់​អាវយឺត​នេះ​នឹង​ត្រូវ​យក​ទៅ​បរិច្ចាគ​ជូន​មន្ទីរពេទ្យ​ព្រះសីហនុ​ផងដែរ»៕

Content image - Phnom Penh Post
សកម្មភាព​រាំ​ក្នុង​ការ​ប្រគំ​តន្ត្រី​កាល​ពី​ឆ្នាំ​មុន។ ហុង មិនា

Content image - Phnom Penh Post

អត្ថបទគួរចាប់អារម្មណ៍