.jpg)
តារាចម្រៀងស្រី ពេជ្រ សោភា និងគូស្នេហ៍ថ្មីតារាសម្តែងរូបសង្ហាលោក ឆឹម សក្កដា។ អុីនស្តាក្រាម
ភ្នំពេញ៖ ប្រហែលជាមកពីសម្ព័ន្ធភាពសិ្នទ្ធស្នាលរវាងតារាមួយគូវ័យប្រហាក់ប្រហែលគ្នាមួយជាតារាចម្រៀងស្រីកំពូលនៅហង្សមាស និងម្នាក់ជាតារាសម្តែងប្រុសកំពុងតែល្បីមានភាពរលូនល្អ និងបានប្រមាណជិត ២ ឆ្នាំ ទៅហើយទើបអ្នកគាំទ្រមានការភ្ញាក់ខ្លាំងនៅពេលឃើញតារាចម្រៀងស្រីកាន់តែស្រស់ស្អាត ពេជ្រ សោភា បង្ហើរសារមួយឃ្លាដែលហាក់ដូចជាចង់បង្កប់ន័យប្រាប់ពីដំណឹងល្អនៃសម្ព័ន្ធភាពស្នេហ៍របស់ខ្លួននោះ។
គ្រាន់តែតារាចម្រៀងស្រីល្បី និងជាគ្រូបង្វឹកនៃកម្មវិធីប្រឡងចម្រៀងលំដាប់ពិភពលោក The Voice Cambodia អ្នកនាង ពេជ្រ សោភា បានបង្ហើរសារមួយឃ្លាខ្លីអមទៅនឹងរូបថតកៀកកិតជាមួយតារាប្រុស ឆឹម សក្កដា ថា៖ «ជិតដល់ថ្ងៃហើយ ថែរាងសិន ខ្លាចអត់ស្អាត» តាមអ៊ីនស្តាក្រាមភ្លាមនោះ ក៏មានមហាជនយ៉ាងច្រើនបានចាប់អារម្មណ៍យ៉ាងខ្លាំង ហើយក៏ចូលទៅចុច Likes និង Comments សួរនាំដេញដោលបញ្ជាក់ន័យឲ្យកាន់តែច្បាស់ពីសារនេះមួយរំពេច។
ក្រៅពីចុច Likes នោះក៏មានការចោទសួរសឹងតែដូចគ្នាជាច្រើនបានលើកឡើងដើម្បីចង់បានចម្លើយត្រឡប់វិញពីតារាចម្រៀងស្រី អ្នកនាង ពេជ្រ សោភា តែម្តងថា៖ «ជិតដល់ថ្ងៃរៀបការមែន ឬអាយដល? ស្រឡាញ់គ្នាយូរៗ មុខដូចគ្នា! អបអរសាទរផង ចង់ឃើញថ្ងៃពិសេសនេះយូរហើយ!»។
ចំណោមសំណួរមានន័យដដែលៗ ដោយសារចង់ដឹងជាដំណឹងពិតរបស់តារាចម្រៀងស្រី ធ្លាប់មានប្រវត្តិជាអ្នកលក់ទឹកអំពៅអ្នកនាង ពេជ្រ សោភា មានស្រុកកំណើតនៅខេត្តព្រៃវែង រូបនេះ យ៉ាងណានោះ គឺគេក៏មិនបានឃើញមានសារតបប្រាប់វិញទេ។
ដោយឡែកតារាចម្រៀងស្រី បច្ចុប្បន្ននិយមបកស្រាយបទចម្រៀងរ៉េប និងញាក់ៗ គ្រាន់តែបានបកស្រាយប្រាប់មកភ្នំពេញប៉ុស្តិ៍ ដោយខ្លីប៉ុណ្ណោះពាក់ព័ន្ធនឹងសារខាងលើនោះ ដោយសារនាងជាប់រវល់នឹងការងារ Live វីដេអូលក់ផលិតផលអាហារបំប៉នសុខភាពខ្លួនថា៖ «សាររបស់ខ្ញុំ ដែលទើបនឹងបង្ហោះនោះ គឺចង់ប្រាប់ថា ជិតដល់ថ្ងៃខួបកំណើតរបស់ក្មួយរបស់ខ្ញុំប៉ុណ្ណោះ ហើយដោយសារខ្លាចមិនស្អាតនោះ ទើបខ្ញុំត្រូវថែរក្សារាង»។
ចំពោះសម្ព័ន្ធភាពនៃស្នេហារវាងតារាចម្រៀងស្រី ពេជ្រ សោភា និងលោក ឆឹម សក្កដា ហាក់មានភាពរលូនល្អមកហើយផងដែរ បើទោះបីជាមិនទាន់បានបញ្ជាក់ច្បាស់លាស់ពីសម្ព័ន្ធភាពរវាងខ្លួន និងតារាសម្តែងប្រុសឈានដល់កម្រិតណាក្តី តែគេឃើញតារាចម្រៀងស្រីល្បី អ្នកនាង ពេជ្រ សោភា ហាក់បានបង្ហាញតម្រុយខ្លះហើយសម្រាប់បុរសរូបសង្ហាលោក ឆឹម សក្កដា៕
