.jpg)
រូបថតកុមារ រៀននៅសាលាឆាន់ ឯទឹកដីខេត្តកំពតដែលអ្នកនាង ពេជ្រ សោភា ប្រកាសជួយសាងសង់សាលារៀន។ រូបថត ហ្វេសប៊ុក ហុង មិនា
ភ្នំពេញៈ ជាតារាចម្រៀងដែលកំពុងមានប្រជាប្រិយភាពតាមរយៈចង្វាក់ញាក់កន្ត្រាក់អារម្មណ៍អ្នកនាង ពេជ្រ សោភា តារាចម្រៀងជ្រកក្រោមទ្រនំហង្សមាសកំពុងតែមមាញឹកនឹងការងារសិល្បៈរួមទាំងការសម្តែង និងការថតនូវស្ប៉តពាណិជ្ជកម្មផ្សេងៗជាច្រើន។
ទន្ទឹមនឹងការរវល់ខ្លាំងនេះអ្នកនាង ពេជ្រ សោភា ក៏ត្រូវបានហ្វេន និងអ្នកប្រើប្រាស់បណ្តាញសង្គមចាប់អារម្មណ៍យ៉ាងខ្លាំងក្នុងការធ្វើការងារសង្គម ចុះចែកនូវសម្ភារសិក្សាដូចជាកាតាប និងសៀវភៅ និងទឹកចិត្តសប្បុរសធម៌សាងសង់សាលាដល់ក្មេងៗនៅលើទឹកដីខេត្ដកំពត។
តារាចម្រៀងជ្រកក្រោមទ្រនំហង្សមាសអ្នកនាង ពេជ្រ សោភា បានប្រាប់ឲ្យ ភ្នំពេញ-ប៉ុស្តិ៍ ដឹងថា៖ «ធ្វើឡើងដោយចិត្តខ្លួនឯង មិនមែនចង់បានមុខមាត់អីទេ ហើយអ្វីដែលសំខាន់គឺចង់ធ្វើសាលាឲ្យក្មេងចង់ឲ្យពួកគាត់មានសាលាសមរម្យអីដែរព្រោះនៅទីនោះដាច់ស្រយាល ក្មេងៗគឺរៀននៅសាលាឆាន់របស់លោក (សង្ឃ) ហ្នឹង។ អ៊ីចឹងដល់ពេលវត្តមានកម្មវិធីអ៊ីចឹងពួកគាត់អត់បានរៀនទេ»។
ដោយធ្លាប់ជាកុមារឆ្លងកាត់ការលំបាកអ្នកនាង ពេជ្រ សោភា បានរំឭកថា៖ «ដោយសារតែខ្ញុំកាលពីក្មេងធ្លាប់រៀននៅសាលានៅស្រុកអ៊ីចឹងជាទូទៅ ធ្លុះធ្លាយ អ៊ីចឹងធ្លាប់យល់ពីអារម្មណ៍ហ្នឹងហើយ។ ខ្ញុំធ្វើនេះទៅតាមសមត្ថភាពដែលខ្ញុំអាចធ្វើបាន»។
នៅថ្ងៃទី ៣ ខែមេសាខាងមុខនេះអ្នកនាង ពេជ្រ សោភា នឹងធ្វើដំណើរទៅទីកន្លែងនោះផ្ទាល់ដើម្បីរៀបគម្រោងសាងសង់សាលារៀនបើទោះបីជាផ្លូវពិបាកក្នុងការធ្វើដំណើរយ៉ាងណាក៏ដោយ។ សម្រាប់ការសាងសង់ អ្នកនាងបានឲ្យដឹងថាគឺមើលទៅតាមទិដ្ឋភាពជាក់ស្តែងថាអាចស្ថាបនាបានអគារចំនួនមួយខ្នង ឬ ២ ខ្នងព្រោះនៅទីនោះកុមារទាំងអស់មានចំនួនប្រមាណ ៥០ ទៅ ៦០ នាក់។
ចំណែកការបង្ហោះសារថា៖ «ឈប់ស្រឡាញ់ឡានហើយ» អ្នកនាង ពេជ្រ សោភា បានបកស្រាយថា៖ «ឡានរបស់ខ្ញុំខូចហើយខ្ញុំក៏នឹងប្តូរឡានថ្មីនៅពេលខាងមុខដែរ ប៉ុន្តែអ្វីដែលសំខាន់គឺការជួយកុមារទាំងនេះជាមុនសិន»។
ទាក់ទងនឹងការជួយកុមារនេះកន្លងទៅតារាចម្រៀងរូបនេះបានជួយក្មេងៗជាច្រើនដូចជាកុមារនៅមន្ទីរពេទ្យគន្ធបុប្ជា កុមារកំព្រា និងកុមារដែលត្រូវបានគេរំលោភបំពាន និងចុងក្រោយកុមារដែលគេចាក់សាំងដុត ព្រោះតែលួចលុយមួយម៉ឺនរៀល។ ប៉ុន្តែអ្នកនាងបានអះអាងថាមិនដែលបង្ហោះរូបភាព ឬវីដេអូទាំងនោះលើបណ្តាញសង្គមទេ ទើបតែលើកនេះសម្រេចចិត្តបង្ហោះស្វែងជំនួយពីសប្បុរសជនជួយកុមារនៅកំពត៕
