ភ្នំពេញៈ បង្កការភ្ញាក់ផ្អើលផ្តើមពីការផូស្តរូបភាពចំនួន ២ សន្លឹកដែលចេញពីគណនីហ្វេសប៊ុករដ្ឋមន្ត្រីក្រសួងព័ត៌មានលោក ខៀវ កាញារីទ្ធ ដែលបានចូលរួមនៅក្នុងពិធីមង្គលការរបស់គូស្នេហ៍ជនពិការភ្នែកទាំងប្តីប្រពន្ធ ដែលស្ថិតនៅម្តុំតំបន់នៃគេហដ្ឋានរបស់លោក ជា សុផារ៉ា នោះក៏បានបង្ហើរឡើងជាមួយសារថា៖ «ចាប់ផ្តើមពិធីកាត់សក់។ លោក ពែកមី មកជួយដោយមិនយកកម្រៃអ្វីទាំងអស់»។
រូបថតទាំង ២ សន្លឹក ដែលផូស្តនោះ ជាសកម្មភាពនៃក្រុមតារាកំប្លែងល្បី នាយ ពែកមី និងអ្នកនាងខ្ញុង កំពុងតែច្រៀងកាត់សក់បង្កក់សិរីសួស្តី ជ័យមង្គលទៅដល់គូស្វាមី ជាជនពិការភ្នែកទាំងប្តីប្រពន្ធ បានរៀបការកាលពីថ្ងៃម្សិលមិញ ខណៈគេឃើញវត្តមានមន្ត្រីថ្នាក់ដឹកនាំជាន់ខ្ពស់ច្រើនរូបចូលរួមផងដែរ។
កាន់តែគួរឲ្យចាប់អារម្មណ៍ និងកោតសរសើរខ្លាំងនោះ គឺតារាចម្រៀងប្រពៃណីខ្មែរលោក ពែកមី ជាមួយដៃគូគឺអ្នកនាង ខ្ញុង បានស្ម័គ្រចិត្តរួមគ្នាទៅច្រៀងកាត់សក់ ដោយមិនគិតប្រាក់ពីម្ចាស់ដើមការឡើយ ដោយអ្នកទាំង ២ ជួយក្នុងចេតនា អាណិតអាសូរ និងស្រឡាញ់ទៅដល់បងប្អូនជនពិការគ្រប់រូប។ នាយ ពែកមី បង្ហើបប្រាប់ភ្នំពេញប៉ុស្តិ៍ថា៖ «ខ្ញុំ និងអ្នកនាង ខ្ញុង បានស្ម័គ្រដោយចិត្តស្មោះសម្រាប់ការច្រៀងក្នុងពិធីកាត់សក់នេះជូនដល់ប្តីប្រពន្ធជាជនពិការភ្នែកទាំង ២។ ហើយនេះក៏ចង់បញ្ជាក់ដល់ពួកគាត់ថា កុំអស់សង្ឃឹម បើទោះបីជាពួកគាត់មានភាពពិការភ្នែកមិនអាចមើលឃើញអ្វីនៅជុំវិញខ្លួនក្តី ក៏នៅមានបងប្អូនខ្មែររួមទាំងមន្ត្រីជាន់ខ្ពស់យ៉ាងច្រើនចូលរួមលើកទឹកចិត្តដោយក្តីស្រឡាញ់ ខណៈរូបខ្ញុំ និងនាង ខ្ញុង សុំចូលរួមជួយច្រៀង ដោយមិនបានគិតពីប្រយោជន៍ចង់បានមុខមាត់អ្វីនោះឡើយ»។
តាមធម្មតាការច្រៀងក្នុងពិធីកាត់សក់មួយរោងៗ ដែលក្រុមតារាកំប្លែង និងក្រុមចម្រៀងប្រពៃណីរបស់នាយ ពែកមី ត្រូវទៅសម្តែងនោះអាចមានតម្លៃទៅតាមស្ថានភាពនៃក្រុមគ្រួសារម្ចាស់ដើមការយ៉ាងហោចណាស់ពីតម្លៃរយដុល្លាររហូតដល់ពាន់ដុល្លារឯណោះ តែឱកាសចូលរួមលើកទឹកចិត្តបងប្អូនជនពិការនេះ នាយ ពែកមី និងអ្នកនាង ខ្ញុង មិនយកប្រាក់ឡើយ។
នាយ ពែកមី បញ្ជាក់ថា៖ «តាមធម្មតា ខ្ញុំ និងដៃគូនៃក្រុមចម្រៀងប្រពៃណីមង្គលការបែបនេះ សម្រាប់ការកាត់សក់ បង្កក់សិរីសួស្តី ជ័យមង្គលទៅដល់គូស្វាមីភរិយា មួយរោងវិញ នាពេលបច្ចុប្បន្ននេះគឺមានតម្លៃ ៥០០ ដុល្លារ ហើយព្រឹកមិញនេះ ឯកឧត្តម ខៀវ កាញារីទ្ធ បានជូនរង្វាន់ខ្ញុំចំនួន ១០០ ដុល្លារ នោះ ខ្ញុំក៏បានចងដៃពួកគាត់បន្ថែមផងដែរ»។
គួរបញ្ជាក់ថា ក្នុងឱកាសពិធីមង្គលការបងប្អូនជនពិការបែបនេះ កាលឆ្នាំមុន នាយករដ្ឋមន្ត្រីខ្មែរលោក ហ៊ុន សែន និងលោកជំទាវ មានវត្តមានចូលរួម ខណៈឆ្នាំនេះលោក ខៀវ កាញារីទ្ធ ជាតំណាងដ៏ខ្ពង់ខ្ពស់៕