The Phnom Penh Post Search

Search form




Logo of Phnom Penh Post newspaper Phnom Penh Post - ពែក មី ចំណាយ​ប្រាក់ $៨ ម៉ឺន សង់ផ្ទះ​ជូន​ឪពុក​ម្តាយ​នៅ​ខេត្ត




ពែក មី ចំណាយ​ប្រាក់ $៨ ម៉ឺន សង់ផ្ទះ​ជូន​ឪពុក​ម្តាយ​នៅ​ខេត្ត

Content image - Phnom Penh Post
លោក ចែម ចាន់តារា ហៅ នាយ ពែក មី។ វុទ្ធី

ពែក មី ចំណាយ​ប្រាក់ $៨ ម៉ឺន សង់ផ្ទះ​ជូន​ឪពុក​ម្តាយ​នៅ​ខេត្ត

ភ្នំពេញៈ រូប​ថត​ស្លៀក​ខោ​ខ្លី​ពណ៌​ទឹក​ប៊ិកឥត​ពាក់អាវ​អង្គុយ​កាត់​ដែកក្បែរ​របង​ដើម​ឫស្សី​ និង​ពត់​ដែក​ ដើម្បី​ក្រង​ធ្វើ​គ្រោង​ឆ្អឹង​ធ្វើ​សសរគ្រឹះ​បេតុងបី​បួន​សន្លឹក​ របស់​លោក ចែម ចាន់តារា ហៅ​ ពែក មី ដែល​ជា​តារា​កំប្លែង​មិនចេះ​រីង​ស្ងួត​​ទាំង​កាយ​វិការ និង​ពាក្យ​ពេចន៍​កំប្លុក​កំប្លែង​នោះ បាន​​បង្កើត​នូវ​ចម្ងល់​គេ​សួរដេញ​ដោល​គ្នា​ពេញ​ហ្វេស​ប៊ុក។

អ្នក​ខ្លះថា ​ប្រហែល​ជា​លោក ពែក មី​ ​ថតកុន​​រឿង​ជីវិតកម្មករ​សំណង់ទេ​ដឹង​ព្រោះថា​ឥឡូវ​នេះ​ គាត់មានលុយ​កាក់​ច្រើន​ហើយ​​ជួលគេទៅ ចាំ​បាច់​ធ្វើខ្លួនឯង​នាំហត់​អី?​ ​ខ្លះ​ថា​ពិត​មែន​ព្រោះ​ហ្វេសប៊ុក​ ពែក មី ​ថា​ធ្វើ​ផ្ទះ​​ជូន​ម្តាយឪពុ​កមែន និង​មិន​ជួលគេព្រោះ​ខ្លួន​ធ្លាប់​ធ្វើ​ការងារ​នេះ​មុន​ពេល​ល្បី​ជាតារាកំប្លែង​ប្រចាំ​ទូរទស្សន៍​ស៊ីធីអិន។

អ្នកខ្លះទៀត​ថា​ ចុះ​ម៉េច​មិនទិញ​ផ្ទះ​នៅ​ភ្នំពេញ​វិញ​ ចុះ​ចាំ​បាច់​ទៅ​សង់ផ្ទះធ្វើ​ស្អីទៅ​?ស្រាយ​ចម្ងល់​​នេះ តារា​កំប្លែង​មាន​សម្តី​កំប្លែង​ស្ងួត​ និង​​ពូកែ​លេង​ទឹក​មុខ​បាន​គ្រប់​រសជាតិនៃ​ឈុត​ឆាក​សម្តែង​រឿង​កំប្លែង​លោក ពែក មី ឆ្លើយ​បញ្ជាក់​​ភ្នំពេញ​ ប៉ុស្តិ៍​ ថា៖ «រូបនោះ​គឺ​ខ្ញុំ​ពិត​ជាធ្វើពេល​ចាប់​ផ្តើម​សង់​ផ្ទះ​ជូន​ឪពុក​ម្តាយ​ខ្ញុំ​មែន!មិនមែន​ថត​កុន​ទេ។ ពេល​នេះ​ផ្តើម​ដំណើរ​បាន​ពីរសប្តាហ៍​ហើយ!​ ខណៈ​គ្រោង​សង់​ឲ្យបាន​ចប់​នៅ​ខែមេសា​ឆ្នាំ ២០១៦ ​​ខាង​មុខ​។ ជា​ប្រភេទ​ផ្ទះ​ឈើ​ប្រក់ក្បឿង​ ដែល​មាន​ទំហំ​ ១៨​ x ១៥ ហើយ​មាន​សសរ ៣៥​»។

សម្ភារ​សំណង់​ និងថ្លៃ​​ឈ្នួល​ជាង​គឺ​សុទ្ធសឹង​តែមាន​តម្លៃ​ថ្លៃ​នា​សម័យ​​បច្ចុប្បន្ន​នេះ​ ប្រសិន​បើ​សង់​ផ្ទះខ្នាត​តូច​​ក៏​អស់​ប្រាក់មិន​តិច​ពាន់​ ឬ​ម៉ឺន​ដុល្លារ​ឡើយ ចុះ​ទម្រាំ​ផ្ទះធំដូចជាឪពុក​ម្តាយ ​ពែក មី ​និង​ប្រើ​សម្ភារឈើ​ភាគ​ច្រើន​ទៀត​​នោះ ​រឹត​តែ​ចំណាយ​ច្រើន​។

តារា​កំប្លែង​​វ័យ ៣៥ ឆ្នាំ បង្ហើប​ឲ្យ​ដឹង​ចំនួន​ទឹក​ប្រាក់ដែល​លោក​ខំ​សន្សំ​ និង​ប្រមែ​ប្រមូល​បាន​ពី​ការងារ​កម្លាំង​ញើសឈាម​នៃ​​ការ​ច្រៀង​​កាត់​សក់​មង្គលការ សម្តែង​កុន​ និង​កំប្លែង​យ៉ាង​មមា​ញឹក​ សឹង​ តែ​គ្មាន​ពេលទំនេរ​ដើម្បី​យកមក​​ធ្វើ​ផ្ទះ​នេះ​។

ពែក មី​ ប្រាប់​ថា៖ «​ប្រហែល​ចំណាយ​ប្រាក់ ៨ ម៉ឺនដុល្លារ!​»។

ហេតុផល​ដែល​លោក​ ពែក​ មី មិន​ទិញ​ផ្ទះ​នៅភ្នំពេញ​ជូន​ឪពុក​ម្តាយ​ និង​សកម្ម​ភាព​ដោះ​អាវ ស្លៀក​ខោ​ខ្លី​ កាត់​ដែក និង​ពត់​ដែក​ដូច​ជា​​កម្ម​ករ​សំណង់​នោះ ពែក មី បាន​ប​ញ្ជាក់​​មូល​ហេតុ​មាន​ពីរ​យ៉ាង​ ដែលនាំ​ឲ្យ​សម្រេចចិត្ត​សង់​ផ្ទះ​នៅឯ​ស្រុក​កំណើត​ក្នុង​ភូមិ​ពពែត​ ឃុំពពែត​ ស្រុក​ស្វាយទាប នៅ​ខេត្ត​ស្វាយ​រៀង​​នោះ​ថា៖ «ទី​មួយគឺ​​មក​ពី​ឪពុក​ និង​ម្តាយ​ខ្ញុំ [ឪពុក​ឈ្មោះ ចែម សារិន និង​ម្តាយ​ឈ្មោះ ស៊ឹម ស៊ីម៉ាន]​ គាត់​មិនមាន​បំណង​​ចង់មក​រស់​នៅ​ភ្នំពេញ​ និង​​មិន​ដាច់​ចិត្ត​ពីស្រុកកំណើត​ ចោល​បង​ប្អូន​ និង​អ្នក​ស្រុក​អ្នកភូមិ។ទី​ពីរ​គឺ​​ខ្ញុំ​ផ្ទាល់​នឹក​ឃើញ​ថា បើ​មាន​ផ្ទះ​នៅ​ស្រុក​កំណើតក៏​ល្អ​ម្យ៉ាង​ដែរ​ ខណៈ​ពេល​ទំនេរ​ពី​ការងារ​សិល្បៈ​ ឬ​ពេលមាន​បុណ្យ​ទានម្តង​ៗ​អាច​នាំ​កូន​ចៅ ឬ​បង​ប្អូនទៅ​​លេង​​ស្រុក​​កំណើត​បាន​ដូច​ជាគេ​ដូច​ឯងដែរ​»។

នាយ ពែក មី​ ​ដែលមាន​បង​ប្អូន​បង្កើត ៧ នាក់​នោះ​បន្ថែមដែរ​​ថា៖ «រឿង​សង់​ផ្ទះ​នោះ​ខ្ញុំ​ជា​អ្នក​រៀបចំប្លង់ និង​កាន់​ការងារ​ធ្វើ​ផ្ទះ​នោះខ្លួនឯង​ ហើយ​ពេល​ទំនេរ​ក៏​ឆៀងទៅ​មើល ហើយខ្ញុំ​នៅ​​មិន​ស្ងៀម​ក៏​ជួយធ្វើ​ពួកកម្មករ​នោះ​ទៅ​ ព្រោះ​ថា ​ខ្លួន​ឯង​ក៏​ធ្លាប់​ឆ្លង​កាត់​នូវ​ការងារនេះដែរ​»៕

អត្ថបទគួរចាប់អារម្មណ៍