.jpg)
តារាសម្តែងស្រីជាថៅកែផ្អក ប្រហក់ ម៉ាំ កញ្ញា ពៅ លីដា។ ភ្នំពេញ ប៉ុសិ៍្ត
ភ្នំពេញៈ សុខៗក៏ស្រាប់តែឃើញតារាសម្តែងស្រីរាងតូចច្រឡឹង មានចរិតស្លូតបូត តែងតែស្តាប់តាមគន្លងធម៌ម្តាយ ជាថៅកែលក់ផ្អក ប្រហុក ម៉ាំ កញ្ញា ពៅ លីដា បង្ហោះសារបែបក្តៅក្រហាយក្នុងចិន្តានឹងរឿងអ្វីមួយនៅមិនទាន់ដឹង ឡើងផ្អើលមហាជនតាមបណ្តាញសង្គមតែម្តង។
ជាសារដ៏កម្រនឹងឃើញមានលក្ខណៈខឹងសម្បា ហួសចិត្តយ៉ាងខ្លាំងផូស្តចេញហ្វេសប៊ុករបស់តារាសម្តែងស្រីស្រស់សោភា កំពុងតែកាក់កបការងារសិល្បៈសឹងគ្មានពេលទំនេរ បន្ថែមលើរបររកស៊ីក្រៅសិល្បៈបើកសាឡន លក់ផ្អក លក់ត្រសក់ចាវ ជ្រក់ស្ពៃគីមឈី និងផ្អក ត្រីប្រៃ ពៅ លីដា ខ្លាំងណាស់។
តែពេលនេះ បែរជាដាច់ចិត្តបញ្ចេញកំហឹងខ្លួនតាមបណ្តាញសង្គមយ៉ាងដូច្នេះថា៖ «ទីកន្លែងដែលមានអ្នកធ្វើការងារល្អ សេវាកម្មល្អ ទើបកន្លែងអ្នកមានភាពរីកចម្រើន!មិញទៅទៀត ទើបដឹងថា សេវាកម្មគឺ ០០! នៅមានតទៀត ទ្រាំមិនចង់បានទេលោក!ឈ្លើយណាស់ដល់ពេលម្ចាស់ចូលទៅ បែរសម្តែងជាតួស្លូតភ្លាម សាហាវជាងតួកុនទៀត ស្លូតអស់ត្រឹមខ្ញុំហ្នឹងហើយ តែគេចេះតែបង្ខំ»។
រំពេចនោះក៏មានអ្នកចូលទៅសួរនាំទាំងជាប្រិយមិត្ត និងមិត្តសិល្បៈ ដើម្បីជជីករកដើមទងនៃបញ្ហាថា៖ «តើ ពៅ លីដា កើតមានបញ្ហាអ្វីទៅ? នាងកំពុងតែមានបញ្ហាជាមួយនឹងអ្នករួមអាជីពនៃសិល្បៈដូចគ្នា ឬនឹងអ្នកណាផ្សេង?»។
តារាសម្តែងស្រីស្រស់សោភា មានថ្ពាល់ខួច ដែលកំពុងតែកបនឹងការថតកុនភាគស្ទើរគ្មានពេលទំនេរនោះក៏បានបង្ហើបប្រាប់ភ្នំពេញប៉ុស្តិ៍ពីដើមទងនៃបញ្ហាខាងលើថា៖ «មិនមែនជាបញ្ហានៅក្នុងការងារសិល្បៈទេបង!គឺខ្ញុំទៅកន្លែងគ្លីនិកឯកជនមួយដើម្បីពិនិត្យសុខភាព ដោយនាងខ្ញុំឈឺវិលមុខ ហើយដល់ពេលគិតលុយ និងទិញថ្នាំ ខ្ញុំឲ្យុប្អូនទៅគិត ស្រាប់តែបុគ្គលិកនៅទីនោះថា ឲ្យអ្នកជំងឺមកគិតខ្លួនឯងទើបបាន ហើយខ្ញុំនៅជិតហ្នឹង គឺប្រហែលជា ១ ម៉ែត្រពីគ្នាសោះហ្នឹង បែរជាឆ្លើយថាមិនព្រម។ ដល់ពេលខ្ញុំងើបទៅគិតលុយបានគេព្រម ហើយចរិតឡើងឈ្លើយហ្មងបង!តែនៅទីនោះខ្ញុំមិនថាអីទេដោយមិនចង់ឲ្យកើតមានរឿង ពេលមកដល់ផ្ទះ ក៏នឹកខឹងក្នុងចិត្តព្រោះថា គេធ្វើជ្រុលលើខ្លួនឯង ប្អូនខឹងខ្លាំងពេកក៏ផូស្តតែម្តង!»។
កញ្ញា ពៅ លីដា តារាសម្តែងមានស្រុកកំណើតនៅខេត្តកំពង់ចាមរូបនេះបានបន្តថា៖ «យ៉ាងណា នាងខ្ញុំពិតជាមានអារម្មណ៍សោកស្តាយជំនួសម្ចាស់ណាស់ ដែលគ្លីនិក ឬកន្លែងនោះ ដែលមើលទៅហាក់មិនបានដឹងពីឥរិយាបថបុគ្គលិកខ្លួនច្បាស់ ជាពិសេសទង្វើបត់បែនបែបខ្វះសីលធម៌ចំពោះភ្ញៀវជាអ្នកជំងឺ ពេលទៅរកសេវាកម្មនៅទីកន្លែងខ្លួន តែបែរជាធ្វើឲ្យភ្ញៀវមានការខកចិត្តយ៉ាងខ្លាំងទៅវិញ»។
តារាស្រីស្រស់ផូរផង់រូបនេះ ក៏បញ្ជាក់ដែរពីឥរិយាបថបែបមើលស្រាលមនុស្ស ឬវាយតម្លៃមនុស្សពីសម្បកក្រៅរបស់បុគ្គលិកនៅគ្លីនិកនោះដែរថា៖ «កាលនោះ នាងខ្ញុំបានជិះរ៉ឺម៉ក Pass App និងស្លៀកពាក់សាមញ្ញ ថែមទាំងពាក់ស្បែកជើងផ្ទាត់ទៀត ទៅពិនិត្យសុខភាពគឺនាងខ្ញុំផ្តាសាយធំដែលចេះតែវិលមុខនោះ គឺពួកគេក៏មើលលើមើលក្រោម ហើយនិយាយបែបមិនសមរម្យមកលើគ្រួសារខ្ញុំបែបនេះដែរ»៕
