ក្រុងឡុងដ៍: កម្មវិធីប្រណាំងសេះបានវិលមកវិញកាលពីថ្ងៃចន្ទ បន្ទាប់ពីផ្អាកជាងពីរខែនៅក្នុងប្រទេសអង់គ្លេស ប៉ុន្តែត្រូវបានវ៉ាផ្ដាច់ដោយកម្មវិធីកីឡាថ្មី គឺការប្រណាំងសត្វព្រាបដែលជាប្រភេទដំបូងត្រូវបានបើកឲ្យដំណើរការឡើងវិញក្រោយការបន្ធូរបន្ថយវិធានការបិទប្រទេសដោយវីរុស កូរ៉ូណា។
កម្មវិធីកីឡាត្រូវបានបិទតាំងពីខែមីនា តែរាជរដ្ឋាភិបាលចក្រភពអង់គ្លេសកាលពីថ្ងៃសៅរ៍បានអនុញ្ញាតឲ្យមានការប្រកួតក្នុងស្រុកឡើងវិញ ដោយគ្មានអ្នកទស្សនាចាប់ពី ថ្ងៃទី ១ ខែមិថុនានេះ។
ការប្រកួតបាល់ទាត់ Premier League គ្រោងបន្ដសកម្មភាពនៅថ្ងៃទី ១៧ ខែមិថុនា ខណៈគណដឹកនាំកីឡាគ្រីឃិតនៅតែរំពឹងថានឹងដំណើរការពេញលេញឡើងវិញអំឡុងរដូវក្ដៅនេះ។
ការប្រណាំងសេះ ជាកម្មវិធីពេញនិយមសម្រាប់អ្នកគាំទ្រកីឡាផ្សាយផ្ទាល់ ប៉ុន្តែវាមានការផ្លាស់ប្ដូរយ៉ាងខ្លាំង ប្រៀបធៀបមុនពេលមានការបិទប្រទេស។ នៅ Newcastle មិនមានអ្នកទស្សនាការប្រណាំងសេះ ១០ ខណៈដែលគ្រូបង្វឹកអ្នកប្រណាំងនិងអ្នករៀបចំ សុទ្ធតែពាក់ម៉ាស។
នាពេលព្រឹកព្រលឹមស្រាងៗ ការប្រណាំងព្រាបបាននាំមកនូវភាពរីករាយគួជាទីចាប់អារម្មណ៍។សត្វបក្សីនេះជាង ៤ ពាន់ក្បាល ដែលជាកម្មសិទ្ធិរបស់សមាជិកសហព័ន្ធបានស្លេនៃកីឡាការប្រណាំងព្រាបនៅភាគខាងជើងប្រទេសអង់គ្លេស ត្រូវបានដាក់ឲ្យចេញដំណើរពីឧទ្យានមួយនៅចម្ងាយ ១៤៥ គីឡូម៉ែត្រ។
លោក យ៉ន ហ្គ្រីនស្យៀល ជាអ្នករៀបចំកម្មវីធី រំពឹងថាព្រាបប្រណាំងទាំង៣៥ ក្បាលរបស់លោកនឹងប្រើរយៈពេល ១ ម៉ោង ៥០ នាទីបន្ទាប់ប្រលែងចេញពីដៃ។
អ្នកជីករ៉ែចូនិវត្ដន៍ អាយុ ៧២ ឆ្នាំរូបនេះ បាននិយាយថាការចាប់ផ្ដើមឡើងវិញត្រូវបានធ្វើឡើងមុនការគ្រោងទុក ដែលធ្វើឲ្យព្រាបជាច្រើនមិនទាន់ត្រៀមខ្លួនរួចរាល់។
ប៉ុន្តែលោកបានបន្តថាការប្រណាំងឡើងវិញនេះនឹងទទួលបានការសាទរយ៉ាងច្រើនពីប្រជាជនក្នុងសហគមន៍ មិនខុសពី «ការដាក់អុកស៊ីសែនចូលទៅក្នុងតំបន់វិញ»នេះឡើយ។
លោកនិយាយថា៖ «ការប្រណាំងជាគ្រឿងលើកទឹកចិត្ដឲ្យពលរដ្ឋក្រោកពីគ្រែ ពីព្រោះពួកគេចូលចិត្ដកីឡានេះខ្លាំង»៕ AFP/RS