.jpg)
អ្នកទស្សនាយ៉ាងច្រើនកុះករចូលរួមកម្មវិធីពិព័រណ៍សិល្បៈចម្រុះនៅកំណាត់ផ្លូវ 2.5 ក្រុងបាត់ដំបង កាលពីចុងសប្តាហ៍កន្លងមក។ រូបថត ជំនោរ-Art Page
ក្រុងបាត់ដំបង៖ បណ្តុំនៃទស្សនីយភាពនៃការសម្តែងសិល្បៈរបាំ ការសម្តែងសៀក ដើរបង្ហាញម៉ូដ ការតាំងបង្ហាញស្នាដៃសិល្បៈនានាដែលបានរៀបចំឡើងលើកដំបូងដោយក្រុមអ្នកសិល្បៈចម្រុះជំនាញ កាលពីចុងសប្តាហ៍កន្លងមកនៅកំណាត់ផ្លូវ 2.5 នៃក្រុងបាត់ដំបង ខេត្តបាត់ដំបងនោះ មិនត្រឹមតែបានជោគជ័យខ្លាំង ទេ ថែមទាំងត្រូវបានមជ្ឈដ្ឋានមហាជន និងអាជ្ញាធរនៃតំបន់ មូលមតិស្នើឲ្យមានការរៀបចំប្រចាំឆ្នាំទៀតផង។
កម្មវិធីពិព័រណ៍សិល្បៈចម្រុះក្រោមប្រធានបទរួមថា «ជំនោរ ART» ដែលបានប្រារព្ធធ្វើនៅលើដងផ្លូវលេខ ២.៥ ស្ថិតនៅក្នុងក្រុង និងខេត្តបាត់ដំបងនោះ កាលពីថ្ងៃទី ២១-២២ ខែ ធ្នូ ឆ្នាំ ២០១៩ កន្លងមកនោះ មានអ្នកទស្សនាចូលរួមយ៉ាងច្រើនកុះករ គ្រប់ស្រទាប់វ័យ ខណៈមានក្រុមអ្នកសិល្បករ-សិល្បការិនី ចំនួន ៧០ រូប បាននាំយកស្នាដៃសិល្បៈខ្លួនដាក់តាំង និងសម្តែងបង្ហាញនូវទស្សនីយភាពសិល្បៈរបស់ខ្លួនផងដែរ នាឱកាសប្រារព្ធធ្វើចំនួន ២ ថ្ងៃនោះ។
ការសម្តែងសិល្បៈសៀក។ រូបថត ជំនោរ-Art Page
កម្មវិធីនេះរៀបចំឡើងក្នុងគោលបំណងលើកកម្ពស់នូវភាពជាក្រុមរបស់សិល្បករ សិល្បការិនី និងការជំរុញឲ្យបងប្អូនមហាជនខ្មែរបានស្គាល់កាន់តែស៊ីជម្រៅ ពីអ្វីជាសិល្បៈ ហើយសិល្បៈបានជួយអ្វីខ្លះទៅដល់ការអភិវឌ្ឍសេដ្ឋកិច្ចសង្គម? តើកម្មវិធីនេះនឹងជួយដល់វិស័យសិល្បៈ និងអ្នកសិល្បៈទាំងអស់ ទទួលបាននូវការគាំទ្របន្ថែមពីសហគមន៍នឹងឆ្ពោះទៅថ្ងៃមុខ។
លោក ប៉ោយ ឈុនលី ជាអ្នករៀបចំនូវព្រឹត្តិការណ៍តាំងពិព័រណ៍ចម្រុះលើកដំបូងនេះបង្ហើបឲ្យដឹងថា៖ «ពិតជាមានការសប្បាយចិត្តយ៉ាងខ្លាំង ក្រោយពីព្រឹត្តិការណ៍ដំបូង ដែលរៀបចំដោយជាតិខ្មែរនេះ ទទួលបានការគាំទ្រច្រើនគឺមានគ្រប់មជ្ឈដ្ឋានទាំងបងប្អូនមហាជន និងអាជ្ញាធរ ហើយអ្វីដែលយើងកាន់តែមានក្តីរំភើបខ្លាំងទៀតនោះ គឺមានសំណូមពរពីបងប្អូនខ្មែរចូលទស្សនា ចង់ឲ្យមានការរៀបចំបានច្រើនដងនៅក្នុងមួយឆ្នាំៗ គឺធ្វើប្រមាណជា ២-៣ លើក ប្រសិនបើអាចធ្វើបាននោះ»។
ដោយសារតែស្នាដៃសិល្បៈនានាត្រូវការពេលវេលាយូរដើម្បីបង្កើត និងទាមទារឲ្យមានក្រុមអ្នកជួយឧបត្ថម្ភគាំទ្រផ្សេងៗ ទើបតំណាងអ្នករៀបចំកម្មវិធីតាំងពិព័រណ៍ស្នាដៃសិល្បៈចម្រុះ គឺលោក ប៉ោយ ឈុនលី ក៏បានបញ្ជាក់ដែរថា៖ «ទោះបីជា មានសំណើដូច្នេះមែនក្តី តែយើងពិតជាមិនអាចធ្វើតាមសំណូមពររបស់បងប្អូនប្រិយមិត្តបាននោះឡើយ ដោយយោងទៅលើកត្តាមួយចំនួន។ ដំបូងគឺពាក់ព័ន្ធទៅនឹងស្នាដៃរបស់ក្រុមអ្នកសិល្បៈយើង ដោយសារតែពួកគាត់មិនអាចបង្កើតស្នាដៃរបស់ខ្លួន បានទាន់ពេលទេ ប្រសិនបើយើងរៀបចំ ២-៣ លើកនោះ ព្រោះវាមានរយៈពេលខ្លីពេកសម្រាប់ពួកគាត់ ខណៈមានស្នាដៃខ្លះត្រូវការពេលរហូតដល់ទៅជិត ១ ឆ្នាំឯណោះ ទើបពួកគាត់អាចសម្រេចផលបាន។
ការចៃ្នម៉ូដពីសំរាម និងប្លាស្ទិក។ រូបថត ជំនោរ-Art Page
ម្យ៉ាងទៀត យើងក៏ត្រូវការជំនួយពីបណ្តាក្រុមហ៊ុននានាផងដែរសម្រាប់ដំណើររៀបចំកម្មវិធីនេះ ព្រោះយើងត្រូវមានក្រុមអ្នករៀបចំកម្មវិធី។ ដូច្នេះយើងក៏សម្រេចថា នឹងរៀបចំជាលក្ខណៈប្រចាំឆ្នាំវិញ ទើបមានលក្ខណៈសមសួន និងស្របគ្នាទាំងក្រុមការងាររៀបចំ និងក្រុមសិល្បករ-សិល្បការិនីយើងផងដែរ»។
កាលពីចុងសប្តាហ៍កន្លងមកនាថ្ងៃទី ២១-២២ ខែ ធ្នូ ឆ្នាំ ២០១៩ មានក្រុមសិល្បករ-ការិនី ប្រមាណ ៧០ រូប ច្រើនជំនាន់ និងជំនាញ បានមកជួបជុំគ្នាមកតាំងពិព័រណ៍ស្នាដៃសិល្បៈបង្ហាញសាធារណជន ដែលប្រារព្ធធ្វើនៅលើកំណាត់ផ្លូវ 2.5 ក្រុងបាត់ដំបង ខេត្តបាត់ដំបង ដោយមានការជំរុញ និងផ្តួចផ្តើមជួយពីសំណាក់នៃអង្គការហ្វារពន្លឺសិល្បៈផងដែរនោះ ទើបរំលេចចេញជាបណ្តុំទស្សនីយភាពនានាមានដូចជា គំនូរ រូបថត ចម្លាក់ គូរហាន់ណា ការផាត់ពណ៌ដំបៅ ឬរបួស បង្ហាញម៉ូដ សម្លៀកបំពាក់កែច្នៃពីសំរាមប្លាស្ទិក អ្នករចនាម៉ូដ តារាបង្ហាញម៉ូដស្នាដៃសិល្បៈ ក្រុមសម្តែងសៀករាំ របាំ និងការរាំ Hip Hop ជាដើម៕
