.jpg)
ក្រុមសិល្បករជាតារាចម្រៀង និងសម្តែង ចូលរួមហាត់សមល្ខោនខោល ដើម្បីជួយផ្សព្វផ្សាយរកមូលនិធិព្រឹត្តិការណ៍សម្តែងល្ខោនខោលខ្នាតធំ ចុងឆ្នាំ ២០២០។ ហុង មិនា
ភ្នំពេញ៖ ក្រោមស្មារតីស្រឡាញ់សិល្បៈវប្បធម៌ជាតិ និងបង្ហាញពីឆន្ទៈរបស់ខ្លួននោះ ឃើញមានក្រុមយុវជន និងសិល្បករ ដែលជាតារាចម្រៀង និងតារាសម្តែងប្រុសៗ បានស្ម័គ្រចិត្តទៅហ្វឹកហាត់ទម្រង់សិល្បៈបុរាណល្ខោនខោល ដើម្បីត្រៀមចូលរួមការសម្តែងក្នុងព្រឹត្តិការណ៍សម្តែងល្ខោនខោលខ្នាតធំមួយ នៅចុងឆ្នាំ ២០២០ នេះ ប្រសិនបើស្ថានភាពនៃការឆ្លងជំងឺកូវីដ ១៩ លែងមានកើតនូវក្តីបារម្ភនោះ។
យ៉ាងណាមិញ កាលពីរសៀលថ្ងៃទី ៧ ខែ មិថុនា ឆ្នាំ ២០២០ ថ្មីៗនេះ មានក្រុមសិល្បករជាតារាចម្រៀង និងតារាសម្តែង រួមមាន លោក ឌី វ៉ាន់ដា លោក ចន ស័ក្ត លោក ហៃ ប៉ោហុង លោក នូ ឧសភា លោក រស់ រាជ្ជសាល លោក ចន្ថា ដារ៉ា លោក អ៊ុន សុទ្ធា លោក ធៀន លោក សន ពិសិដ្ឋ លោក នេន ទុំ លោក ដារ៉ាត់ លោក សិរី វង្ស លោក រាជ្យបុត្រ នាគមាស លោក ពឹង ពុទ្ធិស័ក្ក លោក យុទ្ធ និស្ស័យ លោក កូដូម៉ូ លោក សយ រតនៈ លោក ពង្ស ពុទ្ធិស័ក និងលោក ថៃ សាន បានចូលរួមហាត់សមល្ខោនខោល ជាមួយនឹងលោកគ្រូ អ្នកគ្រូ និងលោកគ្រូបច្ចេកទេស គឺព្រឹទ្ធាចារ្យ ព្រឿង ឈៀង នៅឯមជ្ឈមណ្ឌលហ្វឹកហ្វឺននៃកងយោធពលខេមរភូមិន្ទ (ស្តាតចាស់)។
ការមកហាត់សមពេលនេះ គឺដើម្បីចូលរួមផ្សព្វផ្សាយ និងស្វែងរកមូលនិធិបន្ថែមក្នុងការរៀបចំព្រឹត្តិការណ៍ធំនៅដំណាច់ឆ្នាំ ២០២០ ព្រោះថានៅខ្វះថវិកាជាច្រើន សម្រាប់ការផលិតសម្ភារ និងកម្មវិធី។ នេះបើតាមការបង្ហើបពីលោក ស៊ុប សក្ករ៉ា ជាប្រធានគណៈកម្មការរៀបចំព្រឹត្តិការណ៍សម្តែងល្ខោនខោល។
ក្រុមយុវជន និងសិល្បករស្ម័គ្រចិត្តហាត់របាំល្ខោនខោល ដើម្បីត្រៀមសម្តែងព្រឹត្តិការណ៍ធំមានអ្នកសម្តែង ២០០ នាក់ ចុងឆ្នាំ ២០២០។ហុង មិនា
លោក ស៊ុប សក្ករ៉ា បានបញ្ជាក់ថា៖ «សម្រាប់ការចូលរួមពីក្រុមតារាទាំងអស់នេះ មិនមែនជាការសម្តែងនោះឡើយ ពោលគឺគ្រាន់តែជាការថតផ្សព្វផ្សាយអំពីកម្មវិធីយើង ដោយមានការបង្ហាត់បង្រៀនពីលោកគ្រូ អ្នកគ្រូ និងសិស្សសាលាមួយចំនួន។ យើងមិនមានបំណងចាក់ផ្សាយនៅតាមទូរទស្សន៍ឡើយ គឺយើងថតដើម្បីផ្សព្វផ្សាយតាមផេកផ្សេងៗ សម្រាប់ព្រឹត្តិការណ៍ល្ខោនខោល ហើយនឹងបញ្ចូលទៅគណនីហ្វេសប៊ុកតារានីមួយៗដែលបានចូលរួមហ្វឹកហាត់ប៉ុណ្ណោះ។ អ្នកចូលរួមទស្សនាអាចបរិច្ចាគដោយផ្ទាល់ ឬតាមគណនីធនាគារ ដែលបានរៀបចំ ឬក៏តាមរយៈតារាសម្តែងជា Idol ក្នុងចិត្តពួកគេក៏បាន ខណៈអ្នកចូលរួមយើងមានកំណត់ មិនអាចបើកទូលាយធំឡើយ ដោយសារយើងស្ថិតក្នុងភាពការពារនៃការឆ្លងជំងឺកូវីដ ១៩»។
កញ្ញា ពេជ្រ ចរណៃ ស្ម័គ្រចិត្តបង្ហាត់កីឡាល្បុក្កតោ ដើម្បីត្រៀមសម្តែងព្រឹត្តិការណ៍ធំមានអ្នកសម្តែង ២០០ នាក់ ចុងឆ្នាំ ២០២០។ហុង មិនា
ដោយសារការសម្តែងល្ខោនខោល ក៏មានឈុតឆាកប្រើទម្រង់ក្បាច់គុនល្បុក្កតោផងនោះ ទើបតារាសម្តែងស្រី និងជាអ្នកគ្រូបង្ហាត់កីឡាល្បុក្កតោ កញ្ញា អ៊ិត កន្និកា ហៅកញ្ញា ពេជ្រ ចរណៃ ក៏បានស្ម័គ្រចិត្តមកបង្ហាត់ក្រុមយុវជនខ្មែរ ដែលមានឆន្ទៈស្ម័គ្រចិត្តចូលរួមសម្តែងទម្រង់ល្ខោនខោលនៃព្រឹត្តិការណ៍សម្តែងដ៏ធំមួយ មានអ្នកសម្តែងចំនួន ២០០ នាក់។
កញ្ញា ពេជ្រ ចរណៃ បង្ហើបថា៖ «តាមគម្រោងព្រឹត្តិការណ៍នេះ យើងត្រូវការក្រុមយុវជនស្ម័គ្រចិត្តចំនួន ២០០ នាក់ ដើម្បីចូលសម្តែងទម្រង់សិល្បៈល្ខោនខោល ដែលនឹងត្រៀមធ្វើនៅចុងឆ្នាំ ២០២០ ឬអាចលើកពេល ខណៈពេលបច្ចុប្បន្ននេះ យើងរើសបានចំនួនប្រមាណ ១០០ នាក់ហើយ។ ការហ្វឹកហាត់មានចំនួន ២ ថ្ងៃនៅក្នុង ១ សប្តាហ៍ គឺថ្ងៃសៅរ៍ និងថ្ងៃអាទិត្យ ដោយការហាត់ល្ខោនខោលចាប់ផ្តើមនៅចន្លោះម៉ោង ២ ទៅ ម៉ោង ៥ ខណៈការហាត់ល្បុក្កតោចាប់ពីម៉ោង ៥ ទៅម៉ោង ៧ យប់។ ដោយឡែក ភាពចាំបាច់ដែលចង់ឲ្យយុវជនខ្មែរមកហាត់កីឡាល្បុក្កតោនោះ ក៏ព្រោះតែការសម្តែងល្ខោនខោល ក៏មានឈុតប្រើក្បាច់គុនល្បុក្កតោ និងដើម្បីសម្តែងទម្រង់ក្បាច់គុននេះតែម្តងនាពេលប្រារព្ធព្រឹត្តិការណ៍នោះ»។
គួររំឭកថា ល្ខោនខោលខ្មែរ ត្រូវបានចុះបញ្ជីបេតិកភណ្ឌពិភពលោកនៅថ្ងៃទី ២៨ ខែ វិច្ឆិកា ឆ្នាំ ២០១៨ ក្នុងកិច្ចប្រជុំលើកទី ១៣ នៃគណៈកម្មការអន្តររដ្ឋាភិបាល សម្រាប់ការការពារបេតិកភណ្ឌអរូបីរបស់អង្គការ UNESCO នៅទីក្រុងព័រល្វី នៃសាធារណរដ្ឋម៉ូរីស ខណៈល្ខោនខោលនេះ ស្ថិតនៅក្នុងបញ្ជីបេតិកភណ្ឌអរូបី ដែលត្រូវការសង្គ្រោះបន្ទាន់៕
ក្រុមយុវជន និងសិល្បករស្ម័គ្រចិត្តហាត់របាំល្ខោនខោល ដើម្បីត្រៀមសម្តែងព្រឹត្តិការណ៍ធំមានអ្នកសម្តែង ២០០ នាក់ ចុងឆ្នាំ ២០២០។ហុង មិនា
