.jpg)
ភ្នំពេញ : តារាសម្ដែង បង្ហាញម៉ូដ និងជាពិធីការិនី នាងព្រះកាយ ច័ន្ទ ថ្មីៗនេះត្រូវបានគេទម្លាយថា នាងបានលុបចោលគម្រោងការងារសិល្បៈ ទាំងឱកាសហោះហើរទៅទៅច្រៀងសម្ដែងនៅប្រទេសអូស្រា្ដលីផងដែរ ដោយសារតែចំនួនការងារពីទូរទស្សន៍ប៉ុស្តិ៍លេខ ៥ ផ្តល់ឲ្យ ដែលធ្វើឲ្យនាង មិនស្រមៃរកឱកាសបើកលុយនៅខាងក្រៅ។
ក្នុងអំឡុងឆ្នាំ ២០១៧ មុននេះ ព្រះកាយ ច័ន្ទ តារាស្រីដែលមានជំនាញខាងរាំរបាំ ដែលមានឪពុកក៏ជាគ្រូរបាំផងនោះ នាងក៏ធ្លាប់បានចេញទៅសម្តែងនៅប្រទេសអូស្រ្តាលីម្តងរួចហើយ ហើយការជាប់ចិត្តសម្តែងពីប្អូនខ្មែរនៅដែនកោះដ៏ស៊ីវីល័យនោះ តារាស្រីរូបនេះក៏ត្រូវបានស្ពុនស័រទំនាក់ទំនងធានារយកទៅសម្តែងនៅទីជាលើកទី ២ តែការប៉ុនប៉ងចង់ឃើញការសម្តែងពីតារាស្រីរូបនេះជាលើកទី ២ ត្រូវបានបរាជ័យ ក្រោមការបដិសេធពី តារាចម្រៀង និងសម្ដែង កញ្ញា ព្រះកាយ ច័ន្ទ។
ក្នុងហេតុផលនេះ ព្រះកាយ ច័ន្ទ បានពន្យល់ថា៖ «កាលពីចុងឆ្នាំ ២០១៧ នេះ ជាឱកាសលើកទី ២ ដែលខ្ញុំត្រូវចេញទៅសម្តែងនៅប្រទេសអូស្រ្តាលី តែដំណឹងដ៏ល្អនេះ ត្រូវខ្ញុំបដិសេធភ្លាមៗ ដោយមិនស្ដាយលុយដុល្លារ ១ ដុំនោះឡើយ»។
នាងក៏បានបញ្ជាក់ថា៖ «ការបដិសេធនេះ គឺខ្ញុំបញ្ជៀសដើម្បីកុំឲ្យមានបញ្ហាវិវាទជាមួយប៉ុស្ដិ៍លេខ ៥ ព្រោះថា ខ្ញុំបានចុះកុងត្រាជាមួយទូរទស្សន៍មួយនេះដោយមិនអាចបំពាន និងល័ក្ខខណ្ឌបានឡើយ»។
ក្នុងចង្កោមសិល្បៈ ក៏ត្រូវបានទម្លាយថា៖ «ព្រះកាយ ច័ន្ទ ត្រូវថតផ្ដាច់មុខផ្នែករឿងភាគឲ្យទូរទស្សន៍ប៉ុស្ដិ៍លេខ ៥ នេះ ដោយមិនអាចថតឲ្យស្ថានីយ៍ផ្សេងៗបានទេ គឺលើកលែងតែរឿងដុំដែលបញ្ចាំងតាមរោងទើប នាងអាចថតបាន ហើយក្នុងករណីដែលប៉ុស្ដិ៍លេខ ៥ ដាក់រឿងថ្មីឲ្យនាងថត ហើយចំពេលដែលតារារូបនេះត្រូវចេញទៅសម្ដែងនៅក្រៅប្រទេសនោះ ក៏ត្រូវលុបចោលគម្រោងនោះដែរ ហេតុនេះហើយបានជានាង ព្រះកាយ អាក់ខានចេញទៅច្រៀងសម្ដែងនៅអូស្រ្ដាលី»។
ក្នុងនោះដែរ ព្រះកាយ ច័ន្ទ ក៏បានបកស្រាយដែរថា៖ «ខ្ញុំពិតជាលុបចោលគម្រោងចេញទៅអូស្ដ្រាលីនោះមែន តែមិនមានការសោកស្ដាយទេ ព្រោះថាឱកាសក្រោយៗនឹងមានទៀត ហើយខ្ញុំពេញចិត្តក្នុងការធ្វើការជាមួយប៉ុស្ដិ៍លេខ ៥ ដោយសារតែក្រុមការងារផលិតភាពយន្ដដែលខ្មែរសហការជាមួយថៃនោះ បានបណ្ដុះបណ្ដាលឲ្យខ្ញុំទទួលបានបទពិសោធ ច្រើនរហូតមកដល់ពេលនេះ»។
តែយ៉ាងណា ព្រះកាយ ច័ន្ទ មិនបានឲ្យដឹងនោះទេ ពីឱកាសខកខានកើបប្រាប់នៅដែនកោះអូស្រ្តាលី ថា បើគិតជាចំនួនទឹកប្រាក់នាង ខាតបង់ប៉ុន្មាន ខណៈដែលនាង បានក៏អះអាងថា៖ «ខាងប៉ុស្ដិ៍លេខ ៥ បានឲ្យខ្ញុំថតជាតួឯកក្នុង ១ ឆ្នាំ ៣ រឿង ហើយការថតរឿងដុំ និងការធ្វើពិធីការិនីផ្សេងៗទៀតប៉ុស្ដិ៍នេះមិនហាមឃាត់ឡើយ»៕
ហុង មិនា
