ភ្នំពេញ៖ តារាសម្តែង ចម្រៀង និងគ្រូបង្រៀនរបាំបុរាណ-សម័យ ដែលក្តោបទីផ្សារកុនបានសុទ្ធតែតួឯកក្នុងការថតកុនភាគរបស់ផលិតកម្មប៉ុស្តិ៍លេខ ៥ កញ្ញា ព្រះកាយ ច័ន្ទ បង្ហាញរូបភាពបង្ហាត់បង្រៀនរបាំទៅដល់តារាចម្រៀងពន្លកថ្មី កំពុងតែរះលើវិថីសិល្បៈកុមារី មានសែស្រឡាយព្រះរាជវង្ស ព្រះនាងតូច នរោត្តម ជេនណា បង្កើតភាពភ្ញាក់ផ្អើលដល់មហាជន។
ប្រិយមិត្តពិតជាចាំបានថា កាលពីឆ្នាំ ២០១៩ កន្លងមក តារាស្រីវ័យ ២៥ ឆ្នាំ ដែលកំពុងតែឡើងកូដខ្លាំងចាប់បានឱកាសថតកុនជាហូរហែ ឬអាចនិយាយបានថា នាងជាតួស្រីម៉ូយរបស់ផលិតកម្មប៉ុស្តិ៍លេខ ៥ កញ្ញា ព្រះកាយ ច័ន្ទ ប្រកាសបើកសាលាបង្រៀនជំនាញសិល្បៈចម្រុះ សម្រេចក្តីបំណងកាលពីក្មេង ដែលមានថ្នាក់របាំបុរាណ (ចាប់ពីវ័យ ៤ ឆ្នាំឡើងទៅ) សម្តែង ដើរម៉ូដ រាំសម័យ និងប្រពៃណី ដែលហាត់រៀន នៅថ្ងៃសៅរ៍ និងថ្ងៃអាទិត្យមានឈ្មោះ «សាលាព្រះកាយ ច័ន្ទក្លិប»។
ថ្មីៗនេះស្រាប់តែតារាចម្រៀង និងសម្តែងស្រីមានរាងស្ល៊ីម ដែលមានប្រវត្តិផុសចេញពីសិល្បការិនីបុរាណ និងមានលោកឪពុក គឺជាអតីតសិល្បករជើងចាស់ផ្នែកលោ្ខនបាសាក់នោះ ហាក់ដូចជាមានភាពផុសផុលខ្លាំងទៅនឹងការបង្ហាត់បង្រៀនរបាំបុរាណមួយប្រភេទដល់ព្រះនាងតូច ជេនណា។
ស្រាយចម្ងល់រឿងបង្ហាត់របាំដល់កុមារី ជាសែស្រឡាយនៃព្រះរាជវង្ស នរោត្តមជេនណា នោះ ត្រូវបានលោកឪពុក និងជាអ្នកនាំពាក្យកញ្ញា ព្រះកាយ ច័ន្ទ បានបញ្ជាក់ឲ្យដឹងថា៖ «តាមពិតទៅ ការបង្រៀនរបាំដល់ព្រះនាងតូច ជេនណា នោះគឺដោយសារតែទ្រង់ ជាទូតសុច្ឆន្ទៈរបស់ក្រុមហ៊ុនទូរសព្ទ Cellcard ហើយត្រូវត្រៀមថតការសម្តែងរបាំមួយប្រភេទមានឈ្មោះថា របាំ «ដួងចន្ទ» ខណៈការហាត់នេះចាប់ផ្តើមតាំងពីនៅមុនពេលកើតវិបត្តិជំងឺកូវីដ ១៩ ម្ល៉េះ។ ដោយសារប៉ុន្មានខែនេះជួបវិបត្តិជំងឺនោះ ទើបបានអ្នកគ្រូ [ព្រះកាយ ច័ន្ទ] មិនបានចេញបង្ហាត់ព្រះនាងតូច ទើបតែពេលនេះ បានចាប់ផ្តើមហាត់ឡើងវិញ»។
ក្រោយពីប្រកាសបើកសាលាបង្រៀនជំនាញសិល្បៈ សម្រេចក្តីបំណងកាលពីក្មេងមានសិស្សចូលរៀនជាហូរហែ ខណៈបានបើករយៈពេលប្រមាណជា ២ ខែមកនោះតារាស្រីវ័យ ២៥ ឆ្នាំ ដែលកំពុងឡើងកូដខ្លាំង ចាប់បានឱកាសថតកុនជាហូរហែក្លាយជាតួស្រីម៉ូយផលិតកម្មទូរទស្សន៍ប៉ុស្តិ៍លេខ ៥ កញ្ញា ព្រះកាយ ច័ន្ទ មកបន្ថែមនូវជំនាញរាំបែប K-Pop កូរ៉េ មួយជំនាញទៀតនៅសាលានាង។
តារាចម្រៀង និងសម្តែងស្រី រាងស្ល៊ីម ព្រះកាយ ច័ន្ទ ធ្លាប់បញ្ជាក់ថា ការបើកបង្រៀនមានថ្នាក់របាំបុរាណ (ចាប់ពីវ័យ ៤ ឆ្នាំឡើងទៅ) ការសម្តែង ដើរម៉ូដ រាំសម័យ និងប្រពៃណីដែលហាត់រៀននៅថ្ងៃសៅរ៍ និងថ្ងៃអាទិត្យជាមួយសាលាព្រះកាយ ច័ន្ទក្លិប»៕