.jpg)
តារាសម្តែង ចម្រៀង និងជាគ្រូបង្រៀនរបាំបុរាណសម័យនៅសាលាខ្លួនឈ្មោះព្រះកាយច័ន្ទក្លិប។ រូបថត សហការី
ភ្នំពេញៈ ក្រោយពីប្រកាសបើកសាលាបង្រៀននូវជំនាញសិល្បៈសម្រេចក្តីបំណងកាលពីក្មេងមានសិស្សចូលរៀនជាហូរហែរយៈពេលប្រមាណ ២ ខែមកនោះ តារាស្រីវ័យ ២៤ ឆ្នាំដែលកំពុងឡើងកូដខ្លាំងចាប់បានឱកាសថតកុនជាហូរហែ ឬអាចថានាងក្លាយជាតួស្រីម៉ូយផលិតកម្មទូរទស្សន៍ប៉ុស្តិ៍លេខ ៥ កញ្ញា ព្រះកាយ ច័ន្ទ មកបន្ថែមជំនាញរាំបែប K-Pop កូរ៉េ មួយជំនាញទៀតនៅសាលាខ្លួន។
កញ្ញា ព្រះកាយ ច័ន្ទ តារាចម្រៀង និងសម្តែងស្រី រាងស្ល៊ីម ដែលមានប្រវត្តិផុសចេញពីសិល្បការិនីបុរាណ និងមានឪពុកជាសិល្បករជើងចាស់លោ្ខនបាសាក់នោះបានប្រកាសចេញពីគណនីហ្វេសប៊ុកផ្ទាល់ខ្លួន ព្រះកាយ ច័ន្ទ បានសរសេរផ្សាយថា៖ «សូមជម្រាបថាចាប់ពីខែ ៤ តទៅយើងនឹងផ្តើមបើកបង្រៀនហើយ!មានថ្នាក់របាំបុរាណ (ចាប់ពីវ័យ ៤ ឆ្នាំឡើងទៅ) ការសម្តែង ដើរម៉ូដ រាំសម័យ និងប្រពៃណីដែលហាត់រៀននៅថ្ងៃសៅរ៍ និងថ្ងៃអាទិត្យជាមួយសាលាព្រះកាយ ច័ន្ទក្លិប»។
តារាសម្តែងស្រីរាងស្ល៊ីម ម៉ៅដាច់ថតកុនភាគប្រចាំប៉ុស្តិ៍លេខ ៥ កញ្ញាព្រះកាយ ច័ន្ទ។ហុង មិនា
តារាស្រីដែលទើបបានបញ្ចប់ជំនាញសិល្បៈរបាំបុរាណចេញពីសាកលវិទ្យាល័យភូមិន្ទវិចិត្រសិល្បៈ ហើយក៏មានជំនាញដើរម៉ូដ សម្តែង និងរាំ កញ្ញា ព្រះកាយ ច័ន្ទ បានបន្តថា៖ «តាមពិតទៅការរាំបែប K-POP កូរ៉េនេះ មានតាំងពីបើកវគ្គនានារបស់របាំខ្មែរមក តែមិនសូវផ្សព្វផ្សាយដោយយល់ថា ចង់ឲ្យរបាំខ្មែរមានសិស្សចូលរៀនសិន ចាំមកប្រូម៉ូតរបាំ K-POP។ តាមគម្រោងនាងខ្ញុំបើកវគ្គបង្រៀនថ្ងៃសៅរ៍ និងថ្ងៃអាទិត្យសិន ព្រោះថានាងខ្ញុំមិនទាន់មានពេលទំនេរអាចបង្រៀននៅថ្ងៃផ្សេងៗក្រៅពីនេះបាននៅឡើយ លុះត្រាតែពេលខ្ញុំថតកុនភាគក្រោយៗនេះចប់សិនទើបអាចឆ្លៀតបន្ថែមម៉ោងផ្សេង»។
ក្រោយពីប្រកាសមកក៏មានការចាប់អារម្មណ៍ពីប្រិយមិត្តយុវវ័យខ្លាំង ចំពោះដំណឹងបើកសាលាបង្រៀនជំនាញសិល្បៈ ខណៈតារាស្រីដែលក្តោបបានសុទ្ធតែតួឯកកុនភាគរបស់ផលិតកម្មប៉ុស្តិ៍លេខ ៥ កញ្ញា ព្រះកាយ ច័ន្ទ បានបង្ហើបថា៖ «ពិតជាមិនគួរឲ្យជឿមែនបងគ្រាន់តែនាងខ្ញុំបានប្រកាសតាមហ្វេសប៊ុកភ្លាមប្រមាណ ២-៣ ថ្ងៃមកនោះក៏មានប្អូនៗដែលចាប់អារម្មណ៍ និងបាន Confirm តាមបណ្តាញសង្គមមានចំនួនជាង ៣០ នាក់រួមទាំងប្រុសទាំងស្រីបានចូលរៀនជំនាញសិល្បៈនៅសាលាខ្ញុំហើយ»។
យ៉ាងណាការបើកនូវសាលាបង្រៀនជំនាញសិល្បៈពហុជំនាញមានរបាំបុរាណ សម័យ ប្រពៃណី ដើរម៉ូដ ការសម្តែងនិងរបាំ K-POP នៅសាលារបស់ព្រះកាយ ច័ន្ទក្លិប ដែលនាងបង្រៀនផ្ទាល់នោះ សិស្សត្រូវបង់ប្រាក់ប្រចាំខែក្នុងតម្លៃសមរម្យអាចរៀនបានទាំងអ្នកមានជីវភាពធូរធារ និងមធ្យមដោយសិស្សក៏មាន ២ ជម្រើសដើម្បីរើសយកជំនាញចូលចិត្ត៕
