The Phnom Penh Post Search

Search form




Logo of Phnom Penh Post newspaper Phnom Penh Post - ព្រះ​សង្ឃ​កម្ពុជា​ចូល​រួម​ធម្មយា​ត្រា​ទៅ​ប្រាសាទ បូរូបុឌួ នៅ​ឥណ្ឌូ​នេស៊ី

ព្រះ​សង្ឃ​កម្ពុជា​ចូល​រួម​ធម្មយា​ត្រា​ទៅ​ប្រាសាទ បូរូបុឌួ នៅ​ឥណ្ឌូ​នេស៊ី

Content image - Phnom Penh Post
ការ​បង្ហោះ​គោម​រាប់ពាន់​ដោយ​មហាជន​​ដ៏​ច្រើន​កុះករ​នៅ​បរិវេណ​ប្រាសាទ​ព្រះពុទ្ធ​សាសនា​មហា​យាន បូរូបុឌួ។ គាំ ច័ន្ទរស្មី

ព្រះ​សង្ឃ​កម្ពុជា​ចូល​រួម​ធម្មយា​ត្រា​ទៅ​ប្រាសាទ បូរូបុឌួ នៅ​ឥណ្ឌូ​នេស៊ី

កោះជ្វា: ជា​ប្រាសាទ​ព្រះពុទ្ធ​សាសនា​មហាយាន​ដ៏ធំ​បំផុត​នៅ​ឥណ្ឌូ​នេស៊ី បូរូបុឌួ​ កាល​ពីថ្មីៗ​កន្លង​ទៅ បាន​ស្វាគមន៍​ព្រះសង្ឃ​កម្ពុជា​ពីរ​អង្គ​ចូលរួម​កម្មវិធី​វិសាខ​បូជា​ ក្រោម​ការ​អញ្ជើញ​ពី​រដ្ឋាភិបាល​របស់​ប្រទេស​នេះ។

ព្រះ​តេជគុណ តី សុបុណ្យ មេគណ​ខេត្ត​ព្រៃវែង ​ដែល​ព្រះអង្គ​បាន​និមន្ត​ចូលរួម​ក្នុង​វេទិកា​ព្រះ​ពុទ្ធ​សាសនា​អន្តរជាតិ​ បូរូបុឌួ មាន​សង្ឃ​ដីកាថា៖ «កម្មវិធី​នេះ​បាន​ធ្វើឲ្យ​យើង​ជ្រះថ្លា​ក្នុងព្រះ​ពុទ្ធ​សាសនា ទោះ​បីទីនេះ​ជា​ប្រទេស​កាន់​សាសនា​អ៊ិស្លាម​ក្តី​ ប៉ុន្តែ​ពួក​គេបាន​ធ្វើ​ឲ្យ​យើងមាន​អារម្មណ៍​កត្ត​ញូ​ចំពោះ​ព្រះ​សម្មា​សម្ពុទ្ធ​សេចក្តីល្អ​នេះបាន​សម្តែង​ឲ្យឃើញ​ពី​ភាត​រភាព​រវាង​​បណ្តា​ប្រទេស​ក្នុង​តំបន់​កាន់​ព្រះពុទ្ធ​សាសនា​ជាមួយ​នឹង​ប្រទេស​ដែល​កាន់​សាសនា​អ៊ិស្លាម​ដូចជា​ប្រទេស​ឥណ្ឌូនេស៊ី​នេះ»។

ការធ្វើ​ការ​ស្មឹង​ស្មាធិ៍​តាំង​ពីព្រឹក​ព្រលឹម​ ធម្ម​យាត្រា ៥ គីឡូម៉ែត្រ​ទៅ​ប្រាសាទ​ថ្ម​បុរាណ​ដោយ​ព្រះសង្ឃ​ដែល​និមន្ត​មកពី​បណ្តា​ប្រទេស​តំបន់​អាស៊ី​កាន់​ព្រះពុទ្ធ​សាសនា​ដូចជា កម្ពុជា ស្រីលង្កា ថៃ នេប៉ាល់ វៀតណាម ឡាវ និងព្រះ​សង្ឃ​ជាម្ចាស់​ផ្ទះ​ គឺជា​លើក​ទីមួយ​ហើយ​ដែល​ឥណ្ឌូនេស៊ី​បាន​រៀបចំ​បុណ្យ​វិសាខ​បូជា​លក្ខណៈ​អន្តរជាតិ​នៅ​ប្រាសាទ​ បូរូបុឌួ បើទោះ​បី​ជាពិធី​បុណ្យ​នេះ​ត្រូវបាន​រដ្ឋាភិ​បាល​ជ្រោមជ្រែង​អស់ ១០ ឆ្នាំមក​ហើយ​ក្តី។

Content image - Phnom Penh Post
ព្រះសង្ឃ​មក​ពី​បណ្ដា​ប្រទេស​តំបន់​អាស៊ី​កាន់​ព្រះពុទ្ធ​សាសនា​មក​ជួបជុំ​គ្នានៅ​បូរូបុឌួ​​។ គាំ ច័ន្ទរស្មី

ប្រាសាទ​ បូរូបុឌួ ត្រូវបាន​កសាង​ពីថ្មភក់​នៅ​សតវត្សរ៍​ទី ៩ នៃ​រាជវង្ស​ ហ្សៃ​លេនដ្រ: ក្នុង​រចនាប័ទ្ម​ពុទ្ធ​សាសនជ្វា។ ប្រាសាទ​នេះ ធ្វើ​ឲ្យអ្នក​ទស្សនា​នៅទ្រឹង​សម្លឹង​ក្បាច់​ចម្លាក់​យ៉ាង​លម្អិត​​រៀបរាប់​អំពី​រឿងរ៉ាវ​ទាក់​ទងនឹង​ព្រះពុទ្ធ​សាសនា។ប្រាសាទ​ទំហំ​ ២០០ ម៉ែត្រ​ការ៉េ​នេះ​ផ្គុំដោយ​ព្រះពុទ្ធ​រូប ៥០៤ អង្គ ដែល​មួយចំនួន​ត្រូវ​បាន​បំពួន​ក្នុងចេតិយ​ ៧២ សង់​នៅ​លើភ្នំ​ហ៊ុមព័ទ្ធ​ដោយ​អ័ព្ទ​ និង​ទេសភាព​ស្អាត​ប្លែក​ហាក់​អណ្តែត​នៅ​កណ្តាល​សួគ៌ា។

លោក​ស្រី រីហ្សគី ហាន់​ដាយ៉ានី ប្រធាន​ផ្សព្វផ្សាយ​តំបន់​អាស៊ី​អាគ្នេយ៍​នៃ​ក្រសួង​ទេសចរណ៍​ឥណ្ឌូនេស៊ី​បានឲ្យ​យើង​ដឹងថា៖ «​រដ្ឋាភិបាល​ឥណ្ឌូនេស៊ី​កំពុង​សិក្សា​ពី​លទ្ធភាព​ក្នុងការ​ធ្វើឲ្យ​ប្រាសាទ​នេះ​មាន​ភាព​រស់រវើក​ឡើង​វិញ​ដោយ​រៀបចំ​ឲ្យ​មាន​ពេល​វេលា​សមស្រប​ណា​មួយក្នុង​បរិវេណ​ប្រាសាទ​ដើម្បី​អនុញ្ញាត​ឲ្យ​ពុទ្ធសាស​និកជន​ទូទៅ​អាច​រៀបចំ​ពិធី​សាសនា​របស់​ខ្លួន​ដោយ​គ្មាន​ការរំខាន​ពី​អ្នក​ទេសចរ»។

រីឯ​ពិធី​បួងសួង​ពេល​ល្ងាច​ត្រូវ​បាន​​បើក​ដោយ​លោក មូហា​ម៉ាត់ ជូ​សស កាឡា ឧបនាយក​រដ្ឋមន្ត្រី​សាធារណរដ្ឋ​ឥណ្ឌូនេស៊ី និង​ថ្នាក់​ដឹកនាំ​ជាន់​ខ្ពស់​របស់​ព្រះពុទ្ធ​សាសនា​ក្នុង​ប្រទេស​នេះ​ដោយ​មានការ​សម្តែង​សិល្បៈ​ដ៏​រស់រវើក​អធិប្បាយ​ពីប្រវត្តិ​​ព្រះ​សមណ​គោតម បន្ទាប់​មកមាន​ការ​បង្ហោះ​គោម​រាប់ពាន់​ដោយ​មហាជន​យ៉ាង​ច្រើន​កុះករ​ ដែល​ជ្រះថ្លា​ក្នុងព្រះ​ពុទ្ធសាសនា បើទោះជា​ពួកគេ​មិនមែន​ជា​ពុទ្ធសាសនិក​ក្ដី៕

អត្ថបទគួរចាប់អារម្មណ៍