.jpg)
ក្រុងបាងកក៖ កងជ្រមុជទឹកសង្គ្រោះបានរំដោះព្រះសង្ឃព្រះពុទ្ធសាសនាកំពុងធ្វើសមាធិពីល្អាងធំលេចទឹកក្នុងប្រទេសថៃ ក្រោយហេតុការណ៍ធ្លាប់កើតឡើងចំពោះក្រុមបាល់ទាត់វ័យក្មេងក្នុងឆ្នាំ ២០១៨។
ព្រះតេជគុណ ម៉ាណាស ខេកហ្គូ អាយុ ៤៦ ឆ្នាំ ពេលកំពុងធ្វើធម្មយាត្រា ដែលព្រះសង្ឃនិមន្ដចូលល្អាងភ្នំប្រាសៃង៉ាម ក្នុងខេត្ដភិតសាណូលុក ភាគខាងជើងប្រទេស កាលពីថ្ងៃសៅរ៍ បំណងធ្វើសមាធិ។
ព្រះសង្ឃដែលគ្រងស្បង់ពណ៌ត្នោតធម្មតា បានជាប់នៅក្នុងល្អាងភ្នំដោយសារទឹកជំនន់ហក់ឡើងភ្លាមៗ រហូតដល់ក្រុមសង្គ្រោះចូលទៅសង្គ្រោះព្រះអង្គ។
បុគ្គលិកសង្គ្រោះ វីរ៉ាផុង ចៃហាម បានប្រាប់ AFP កាលពីថ្ងៃសៅរ៍ថា៖ «មូលដ្ឋានសង្គ្រោះបានទទួលការជូនដំណឹងកាលពីថ្ងៃអង្គារ ដោយលោកអាចារ្យម្នាក់ដែលថា ព្រះសង្ឃមួយអង្គបានបាត់ព្រះកាយ ហើយលោកសង្ឃឹមថា ព្រះអង្គប្រាកដជានិមន្ដចូលល្អាងតាំងសមាធិ»។
កងជ្រមុជទឹកត្រូវបានបញ្ជូនកាលពីថ្ងៃអង្គារ តែបានជួបនូវបញ្ហាលំបាក។
លោកបាននិយាយថា៖ «មានចម្រឹងថ្មជាច្រើននៅក្នុងល្អាងភ្នំនោះ ដែលពិបាកដល់ប្រតិបត្ដិការជ្រមុជទឹកចូល។ ភ្លៀងធ្លាក់ខ្លាំងបានបង្ខំពួកគេឱ្យបោះបង់ការប៉ុនប៉ង»។
នៅថ្ងៃពុធ ពួកគេបើកប្រតិបត្ដិការជាលើកទី២ ដែលមានក្រុមការងារ ១០០ នាក់។ ក្រុមតូចមួយបានចូលទៅដល់ព្រះសង្ឃគង់នៅ និងបានផ្ដល់ភួយកៅស៊ូដើម្បីផ្ដល់ភាពកក់ក្ដៅ ខណៈពួកគេត្រួតពិនិត្យព្រះសុខភាព។
លោក វីរ៉ាផុង បានបន្ដថា៖ «កម្ពស់ទឹកបានស្រកនៅថ្ងៃបន្ទាប់ ដែលយើងមិនចាំបាច់ប្រើម៉ាស៊ីនបូមទឹកចេញពីល្អាងឡើយ»។
លោកបានបន្ថែមថា ព្រះសង្ឃមានជំនាញខាងហែលទឹក ធ្លាប់ជ្រមុជទឹកដ៏ប៉ិនប្រសប់ និងអាចសហការបានយ៉ាងល្អជាមួយកងសង្គ្រោះ។ ព្រះសង្ឃបច្ចុប្បន្នស្ថិតនៅក្នុងមន្ទីរពេទ្យដែលមានអាការផ្ដាសាយតិចតួច ហើយបុគ្គលិកពេទ្យនឹងបន្ដត្រួតពិនិត្យសុខភាពព្រះសង្ឃ។
ករណីនេះបានទាក់ទាញឱ្យមានការប្រៀបធៀបជាមួយក្រុមបាល់ទាត់ដ៏ល្បីល្បាញ «ជ្រូកព្រៃ» ដែលបានឡើងទំព័រមុខកាសែតទូទាំងពិភពលោកក្នុងឆ្នាំ២០១៨។
ក្រោយជួបទពិសោធអាក្រក់ ១៨ ថ្ងៃ ក្រុមបាល់ទាត់សមាជិក ១២ នាក់ និងគ្រូបង្វឹកត្រូវបានសង្គ្រោះដោយមានសុវត្ថិភាពពីល្អាងថាមលួង ភាគខាងជើងប្រទេសថៃ ក្រោយពីបេសកកម្មសង្គ្រោះពីបរទេស និងកងនាវាថៃ។
ក្រុមបាល់ទាត់បានក្លាយជាក្រុមល្បីឈ្មោះ និងបានធ្វើដំណើរជុំវិញពិភពលោកតាំងពីហេតុការណ៍នោះកើតឡើង។
សកម្មភាពសង្គ្រោះក៏បានទាញទាញផលិតករភាពយន្ដជាច្រើនមានបំណងផលិតជាភាពយន្ដអំពីប្រតិបត្ដិការសង្គ្រោះ តាមរយៈ Netflix ដែលបានរៀបរាប់សាច់រឿងលម្អិត។
ភាពយន្ដមួយផ្សេងទៀត «The Cave» បានដាក់បញ្ចាក់តាមរោងភាពយន្ដប្រទេសថៃក្នុងឆ្នាំ ២០១៩ ដោយលើកិច្ចការសង្គ្រោះ និងថែមទាំងផ្ដោតលើអ្នកជ្រមុជទឹកបរទេសម្នាក់ផងដែរ៕ AFP/HR
